កីឡាជាតិ
ជាតិ
កែ ឡេង និងកីឡាករ-ការិនីប៉េតង់ផ្សេងទៀត ត្រៀមប្រជែងជើងឯកពិភពលោកនៅថៃ
× កីឡាករ-កីឡាការិនីប៉េតង់កម្ពុជាកំពុងត្រៀមខ្លួនសម្រាប់ព្រឹត្តិការណ៍ប្រកួតដណ្តើមពានរង្វាន់យុវជននិងនារីពិភពលោកលើកទី១៥ (15th World Championships Youth and Women)នៅក្នុងទីក្រុងបាងកក ប្រទេសថៃចាប់ពីថ្ងៃទី១ដល់ថ្ងៃទី៧ខែវិច្ឆិកា។នៅក្នុងការប្រកួតលំដាប់ពិភពលោកនេះកម្ពុជាធ្លាប់បានមេដាយមាស១និងសំរឹទ្ធចំនួន៣ ។
កីឡាការិនីប៉េតង់កែឡេងដែលត្រូវបានចាត់ទុកជាវីរនារីកម្ពុជាបោះជំហានទៅរកការដណ្តើមមេដាយមាសលើកទីពីរក្នុងការប្រកួតដណ្តើមពានរង្វាន់លំដាប់ពិភពលោកលើវិញ្ញាសាវាយយកពិន្ទុ។កាលពីឆ្នាំ២០១៣កីឡាការិនីដ៏មានបទពិសោធន៍រូបនេះបានបង្ហាញការភ្ញាក់ផ្អើលដោយបាននាំមេដាយមាសពិភពលោកលើកទី១ពីទីក្រុងMontaubanប្រទេសបារាំងសម្រាប់កម្ពុជាហើយប្រមាណពីរឆ្នាំក្រោយមករដ្ឋាភិបាលបានរៀបចំពិធីដង្ហែដ៏ក្នុងរាជធានីភ្នំពេញដើម្បីលើកកិត្តិយសដល់រូបគាត់។
ជាមួយគ្នានេះផងដែរកីឡាការិនីកែឡេងរួមជាមួយមិត្តក្រុមដែលមានកីឡាការិនីអ៊ុកស្រីមុំ, អ៊ុំចន្ទ្រានិងអ៊ុនស្រីយ៉ានឹងបន្តសហការគ្នាលើវិញ្ញាសាវាយជាក្រុម ដោយកាលពីឆ្នាំ២០១៣កន្លងមកកីឡាការិនីទាំង៤រូបនេះបានឈ្នះមេដាយសំរឹទ្ធសម្រាប់កម្ពុជារួចម្តងហើយ។
ក្រុមកីឡាការិនីកម្ពុជាដឹកនាំដោយលោកឌីបូរីម៉ាអគ្គនាយករងសហព័ន្ធកីឡាប៊ូលនិងប៉េតង់កម្ពុជាហើយលោកសុខម៉ុងជាគ្រូបង្វឹក។យោងតាមកាលវិភាគប្រកួតដែលរៀបចំដោយសហព័ន្ធកីឡាប៉េតង់អន្តរជាតិការប្រកួតប្រជែងផ្នែកនារីលំដាប់ពិភពលោកនេះនឹងប្រព្រឹត្តទៅពីថ្ងៃទី៤ដល់ថ្ងៃទី៨ខែវិច្ឆិកានៅបរិវេណសាកលវិទ្យាល័យBangkok Thonburi។
ដោយឡែកបេក្ខជនវ័យក្មេង៤រូបដែលមានអាយុក្រោម១៧ឆ្នាំ រួមមានមួងទិត្យម៉ាណែត, ស្រេងសុរ៉ាឃឹម, ផង់ហាស់សិទ្ធិទេវរាជនិងទីវរដ្ឋានឹងបង្ហាញវត្តមានក្នុងការប្រកួតវាយទោលនិងវាយជាក្រុមដោយព្រឹត្តិការណ៍ប្រកួតដំណើរការពីថ្ងៃទី៣១ខែតុលាដល់ថ្ងៃទី៤ខែវិច្ឆិកាខាងមុខនេះ។ក្រុមយុវជនកម្ពុជាមានលោកសូម៉ៃសុខគាជាប្រតិភូនិងលោកអ៊ុកយ៉ារីជាគ្រូបង្វឹក។
សូមបញ្ជាក់ផងដែរនាការប្រកួតដណ្តើមពានរង្វាន់កីឡាប៉េតង់ពិភពលោកលើកទី១៥នេះទាំងផ្នែកនារីនិងយុវជនមានបេក្ខជនមកពីជាង៤០ប្រទេសដែលជាសមាជិកសហព័ន្ធកីឡាប៉េតង់អន្តរជាតិ។យោងតាមតារាងចំណាត់ថ្នាក់រួមបើគិតត្រឹមព្រឹត្តិការណ៍ប្រកួតនៅទីក្រុងMontaubanប្រទេសបារាំងកាលពីឆ្នាំ២០១៣កម្ពុជាស្ថិតក្នុងចំណាត់ថ្នាក់ទី១៣លើពិភពលោកក្រោយទទួលបានមេដាយមាស១និងសំរឹទ្ធ។បារាំងឈរនៅចំណាត់ថ្នាក់លេខ១ដោយមានមេដាយមាសរហូតដល់ទៅ៤៤ក្នុងចំណោមមេដាយសរុប៨៩ខណៈថៃបែលហ្ស៊ិកអេស្ប៉ាញទុយនីស៊ីនិងអ៊ីតាលីស្ថិតនៅលេខរៀងនាំមុខជាបន្តបន្ទាប់៕
© រក្សាសិទ្ធិដោយ thmeythmey.com