កីឡាជាតិ
ជាតិ
រឿង សោភ័ណ្ឌ ឈ្នះដោយសន្លប់ ខណៈ យ៉េន ឌីណា ជាម្ចាស់ជើងឯក
× នៅក្នុងការប្រកួត ២ ផ្សេងគ្នាកាលពីថ្ងៃទី៣១ ខែតុលា កីឡាករជើងខ្លាំងម្ចាស់ជើងឯកថ្នាក់ជាតិ រឿង សោភ័ណ្ឌ បានបំបាក់កីឡាករជើងខ្លាំងថៃ ឱ្យសន្លប់ជាលើកទី២ ខណៈយ៉េន ឌីណា បានយកឈ្នះកីឡាករជើងខ្លាំង ឡាវ ដោយពិន្ទុក្លាយជាម្ចាស់ជើងឯកគោជល់វគ្គទី២ ក្នុងប្រភេទទម្ងន់ ៦០ គីឡូក្រាម។
កីឡាករ រឿង សោភ័ណ្ឌ បានរក្សាការឈ្នះរបស់ខ្លួនជាលើកទី២ លើកីឡាករ ឆ្លាមដាំ ស៊ីតហ្វាំងម៉ៃ (CHHLAMDAMC SITHFANGMAY) ដោយលើកនេះផ្តួលឱ្យសន្លប់នៅក្នុងទឹកទី៥ ខណៈលើកមុនផ្តួលឱ្យសន្លប់ក្នុងទឹកទី។ បន្ទាប់ពីប្រកួតយ៉ាងស្វិតស្វាញនៅលើសង្វៀន CTN កីឡាករ រឿង សោភ័ណ្ឌ នៅក្នុងទឹក ២ បានប្រើកណ្តាប់ដៃ និងជើងមកលើកីឡាករ ថៃ ពេញៗ លុះដល់ចុងទឹកទី២ សោភ័ណ្ឌ បានធ្វើឱ្យអាជ្ញាកណ្តាលរាប់កីឡាករថៃ ម្តង នៅក្នុងទឹកទី៣ គេទាំង ២ បានប្តូរកណ្តាប់ដៃ និងជើងទៅវិញទៅមក លុះដល់ទឹកទី ៤ គេហាក់ដូចជាប្តូរក្បាច់បន្តិចដោយប្រើកែង និងជង្គង់ ស្នូរជួងនៃទឹកទី៥បានបន្លឺឡើង កីឡាករ រឿង សោភ័ណ្ឌ បានសម្រុកទៅលើកីឡាករ ថៃ ដោយប្រើកណ្តាប់ដៃ និងជើងទៅលើកីឡាករ ថៃចំៗ ចំណែកកីឡាករថៃ បានព្យាយាមវាយបកមកវិញផងដែរ លុះដល់ពាក់កណ្តាលទឹកទី៥ សោភ័ណ្ឌ បានប្រើកណ្តាប់ដៃឆ្វេងម៉ាត់ចំពោះទឹកកីឡាករថៃ បណ្តាលឱ្យសន្លប់នៅពាក់កណ្តាលទឹកនេះតែម្តង។
ចំណែកកីឡាករ យ៉េន ឌីណា ឯណោះវិញបានយកឈ្នះកីឡាករ ឡាវChhanakchhaiSaraphiyim ដោយពិន្ទុ បន្ទាប់ពីប្រកួតយ៉ាងសិ្វតស្វាញរយៈពេល ៥ទឹក នៅលើសង្វៀន CNC ចាប់ពីទឹកទី១ ដល់ទី២ កីឡាករ ២ បានធ្វើការស្ទាបស្ទង់កម្លាំងដូចមានការញញើតគ្នាទៅវិញទៅមក លុះដល់ទឹកទី៣ គេទាំង ២ បានប្រើជើងទាត់ និងប្តូរជង្គង់ដាក់គ្នាទៅវិញទៅមក ចាប់ពីទឹកទី៤ ដល់ទីកទី៥ កីឡាករទាំង ២ បានធ្វើការវាយសម្រុក ប្តូរកែង ជង្គង់ និងប្រើជើងទាត់ដាក់គ្នាទៅវិញទៅមករហូតចប់ទឹកទី៥ ដោយលទ្ធផលកីឡាករ យ៉េន ឌីណា ឈ្នះដោយពិន្ទុ។
នៅមុនពេលនៃការប្រកួតកីឡាករ ឡាវ ChhanakchhaiSaraphiyimបាននិយាយថា ការប្រកួតលើកនេះរូបគេនឹងយកឈ្នះកីឡាករ យ៉េន ឌីណា ទោះបីកាលពីការប្រកួតវិលជុំសន្សំពិន្ទុរូបគេចាញ់ ឌីណា ក៏ដោយ តែពេលនេះរូបគេបានដឹងក្បាច់របស់ ឌីណា អស់ហើយបន្ទាប់បានប្រកួតជាមួយគេម្តងនោះ។
ចំណែកកីឡាករ យ៉េន ឌីណា បាននិយាយថា ខ្ញុំមិនហ៊ាននិយាយទុកមុនថាឈ្នះនោះទេ ទោះបីកីឡាករ ថៃ រូបនេះធ្លាប់ចាញ់ខ្ញុំក៏ដោយ គេបានព្យាយាមហាត់ ខ្ញុំក៏ព្យាយាមហាត់ ដូច្នេះទុកការប្រកួតជាអ្នកកាត់ក្តីទៅចុះ៕
© រក្សាសិទ្ធិដោយ thmeythmey.com