កីឡាជាតិ
ជាតិ
Toyota Mekong Club៖ វឌ្ឍនាកា រកបាន២គ្រាប់ យ៉ាទីជាប់ជាកីឡាករឆ្នើមប្រចាំការប្រកួត
×
បឹងកេតអង្គរបានទទួលជ័យជម្នះ ២-០ លើ Lao Toyota FC នៅក្នុងការប្រកួតជម្រុះពានរង្វាន់ Toyota Mekong Club Championship នៅកីឡដ្ឋាន Chao Anouvong National Stadium ក្រុងវៀងចន្ទន៍ ប្រទេសឡាវ កាលពីល្ងាចថ្ងៃទី១ ខែវិច្ឆិកា ឆ្នាំ២០១៥ ។ ជ័យជម្នះនេះ សម្រេចបានដោយការស៊ុតបាល់បញ្ចូលទីនៅចុងតង់នីមួយៗរបស់ខ្សែប្រយុទ្ធ ចាន់ វឌ្ឍនាកា ខណៈអ្នកចាំទី ស៊ូ យ៉ាទី ដែលបានរារាំងឱកាសជាច្រើនគ្រាប់របស់ម្ចាស់ផ្ទះ ក្លាយជាកីឡាករឆ្នើមប្រចាំការប្រកួត។
ចាន់ វឌ្ឍនាកា ដែលកំពុងត្រៀមខ្លួនទទួលស្បែកជើងមាសក្នុងក្របខណ្ឌមិត្តហ្វូនខេមបូឌានលីកជាមួយនឹងការសម្រេចបាន៣៥គ្រាប់ពីការប្រកួតទាំងពីរជើង បន្តបង្ហាញភាពលេចធ្លោនៅក្នុងទឹកដីឡាវ។ នាជំនួបជាមួយម្ចាស់ផ្ទះ Lao Toyota FC កីឡាករអាយុ២១ឆ្នាំរូបនេះ រកបានគ្រាប់បាល់ទីមួយឲ្យបឹងកេតអង្គរ នៅចុងតង់ទីមួយ ក្រោយការបញ្ជូនរបស់ Ajayi Gbenga ពីស្លាបខាងឆ្វេង ពោលគឺកើតឡើងតែ៥នាទីប៉ុណ្ណោះ បន្ទាប់ពីរូបគេមានវត្តមានជំនួស ឈុន សុធារ័ត្ន។
ពីរនាទីមុនបញ្ចប់ការប្រកួតនៅតង់ទីពីរ ចាន់ វឌ្ឍនាកា បានប្រើបចេ្ចកទេសផ្ទាល់ខ្លួនយ៉ាងអស្ចារ្យដោយអូសបាល់កាត់ខ្សែការពាររបស់ក្រុមឡាវ នាំចូលទៅក្នុងតំបន់គ្រោះថ្នាក់ ហើយស៊ុតបាល់បញ្ចូលទីគ្រាប់ទីពីរ ដើម្បីនាំជ័យជម្នះ ២-០ សម្រាប់បឹងកេតក្នុងវគ្គជម្រុះ Toyota Mekong Club Championship ឆ្នាំ២០១៥ នៅកីឡដ្ឋាន Chao Anouvong National Stadium។
នៅក្នុងការប្រកួតទាំងមូល អ្នកចាំទី ស៊ូ យ៉ាទី ដែលធ្លាប់មានបទពិសោធន៍ក្នុងព្រឹត្តិការណ៍នេះ កាលពីឆ្នាំមុនជាមួយក្លិបភ្នំពេញក្រោននោះ ត្រូវជ្រើសរើសជាកីឡាករឆ្នើមប្រចាំការប្រកួត។ ការព្យាយាមរារាំងមិនឲ្យក្រុមជើងឯកឡាវ ស៊ុតទម្លាញសំណាញ់បឹងកេត បាននាំឲ្យ យ៉ាទី ទទួលបានប្រាក់រង្វាន់១០០០ដុល្លារអាមេរិកក្នុងនាមជា Man of the Match។
លោក ប្រាក់ សុវណ្ណារ៉ា គ្រូបង្វឹកក្រុមបឹងកេតអង្គរ បានធ្វើការផ្លាស់ប្តូរកីឡាករតែពីររូបគត់ ពោលគឺ ចាន់ វឌ្ឍនាកា ចូលជំនួស ឈុន សុធារ័ត្ន ហើយ ខៀវ វិបុល ចូលពង្រឹងតំបន់ការពារជំនួស Esoh Omogba នារយៈពេល១៥នាទីចុងក្រោយ។
សម្រាប់ជំនួបនេះ ផងដែរ កីឡាករ សុខ សុវណ្ណ ហុង ផេង និងសុខ ផេង បានចូលលេងពេញម៉ោងក្នុងជំនួបជាមួយក្រុមដែលដឹកនាំដោយគ្រូបង្វឹកអង់គ្លេស លោក David Booth អតីតគ្រូបង្វឹកភ្នំពេញក្រោនរបស់ខ្លួន។ ជ័យជម្នះក្នុងព្រឹត្តិការណ៍ Toyota Mekong Club គឺជាកាដូដ៏ពិសេសផងដែរសម្រាប់ ហុង ផេង នាថ្ងៃប្រារព្ធខួបកំណើត២៦ឆ្នាំរបស់ខ្លួន។
បឹងកេតនឹងប្រើប្រាស់ទីលានពហុកីឡដ្ឋានជាតិអូឡាំពិកទទួលភ្ញៀវ Yangon United នាល្ងាចថ្ងៃទី២៩ ខែវិច្ឆិកា។ ដោយឡែកនៅល្ងាចថ្ងៃទី២២ ខែវិច្ឆិកា Lao Toyota FC នឹងធ្វើដំណើរទៅជួបជើងឯកមីយ៉ាន់ម៉ា Yangon United នៅកីឡដ្ឋាន Thuwunna Youth Training Center ៕
រូបថត៖ Lao Toyota FC
© រក្សាសិទ្ធិដោយ thmeythmey.com