កីឡាជាតិ
ជាតិ
Urban បង្កើតព្រឹត្តិការណ៍ប្រណាំងកង់ជួយកុមារកំព្រា កម្ពុជា
×
ក្រុមហ៊ុន Urban Architecture និង Flying Bikes2 នឹងរៀបចំព្រឹត្តិការណ៍ប្រណាំងកង់លក្ខណៈសេរី ដែលមានឈ្មោះថា Fun Race For Orphans ដើម្បីស្វែងរកមូលនិធិជួយដល់កុមារកំព្រាដែលកំពុងជួបការខ្វះខាត នៅថ្ងៃទី១៥ ខែវិច្ឆិកាខាងមុខនេះ។
លោក អេង រិនបូ ថ្លែងក្នុងសន្និសីទកាសែតកាលពីព្រឹកមិញថា ការប្រណាំងកង់លក្ខណៈសេរីនេះ ដើម្បីចូលរួមចំណែកកាត់បន្ថយការខ្វះខាតរបស់កុមារកំព្រាកម្ពុជា ក៏ដូចជាលើកកម្ពស់សុខភាពប្រជាពលរដ្ឋផងដែរ។ លោកបានបញ្ជាក់ថា ការប្រណាំងបែងចែកជា ៣ប្រភេទគឺការប្រណាំងជាក្រុមមានសមាជិក៤នាក់ ការប្រណាំងបែប VIP (អាយុចាប់ពី៣៥ឆ្នាំឡើង) និងការប្រណាំងសម្រាប់កុមារ។
លោកបានបញ្ជាក់ទៀតថា អ្នកចូលរួមប្រណាំងត្រូវបង់ប្រាក់ចុះឈ្មោះចូលរួមប្រកួត ៥ដុល្លារសម្រាប់បេក្ខជនធម្មតា ចំណែកបេក្ខជន VIP ១៥ដុល្លារ ហើយថវិកាដែលបានមកពីការចុះឈ្មោះនឹងយកទៅទិញអាវជូនអ្នកចូលរួមប្រណាំង និងថវិកាដែលនៅសល់យកទៅជួយកុមារកំព្រាកំពុងខ្វះខាតនៅក្នុងប្រទេសកម្ពុជា។
សម្រាប់ទីតាំងនៃការប្រណាំង ដោយចេញដំណើរពីកោះពេជ្រទៅដល់កោះដាច់ រួចជិះជុំវិញកោះនោះតែម្តង។ ការប្រណាំងជាក្រុមធ្វើលក្ខណៈជិះបណ្តាក់ ដោយម្នាក់ៗជិះចម្ងាយ ៦គីឡូម៉ែត្រ ក្នុងរយៈចម្ងាយសរុប ២៤គីឡូម៉ែត្រ ហើយសម្រាប់ការប្រណាំង VIP និងសម្រាប់កុមារគណៈកម្មការមិនទាន់សម្រេចនៅឡើយទេ៕
© រក្សាសិទ្ធិដោយ thmeythmey.com