ជាតិ
សង្គមជាតិ
លោក ហុង សុខហួរ អវត្តមានក្នុងសវនាការសុំនៅក្រៅឃុំនៅសាលាឧទ្ធរណ៍ រូបថតមេធាវីលោក ជូង ជូងី ចេញពីសវនាការឧទ្ធរណ៍
×
ភ្នំពេញ៖ សមាជិកព្រឹទ្ធសភាគណបក្សសម រង្ស៊ី លោក ហុង សុខហួរ ពុំបានចូលក្នុងសវនាការសុំនៅក្រៅឃុំនៅសាលាឧទ្ធរណ៍នោះទេ នៅព្រឹកថ្ងៃទី៤ វិច្ឆិកានេះ ពាក់ព័ន្ធនឹងបទចោទក្លែងឯកសារនៃសន្ធិសញ្ញាព្រំដែនកាលពីឆ្នាំ១៩៧៩ ជាមួយប្រទេសវៀតណាម។ មេធាវីលោក ជូង ជូងី មិនបញ្ជាក់ពីមូលហេតុអត្តវមានកូនក្តី។
លោក ហុង សុខហួរ ត្រូវបានចាប់ខ្លួនកាលពីថ្ងៃទី១៥ ខែសីហា ឆ្នាំ២០១៥ បន្ទាប់ពីលោកបានបកស្រាយពីសន្ធិសញ្ញាព្រំដែនកម្ពុជា-វៀតណាម បង្ហោះនៅលើទំព័រ Facebook របស់លោក សម រង្ស៊ី ប្រធានគណបក្សសង្គ្រោះជាតិ។ លោកនាយករដ្ឋមន្ត្រី ហ៊ុន សែន បានចាត់ទុកការបកស្រាយនោះ ជាអំពើខុសច្បាប់ អំពើក្បត់ជាតិ ផ្ទុយនឹងខ្លឹមសារសន្ធិសញ្ញាព្រំដែនកម្ពុជា-វៀតណាម។
លោក ហុង សុខហួរ ត្រូវបានតុលាការចោទប្រកាន់ ៣ករណី គឺ បទក្លែងឯកសារសាធារណៈ បទប្រើប្រាស់ឯកសារសាធារណៈក្លែងក្លាយ និងញុះញង់ឲ្យប្រព្រឹត្តបទឧក្រិដ្ឋ។ ប្រសិនបើតុលាការរកឃើញពិរុទ្ធភាពនោះ លោក ហុង សុខហួរ អាចប្រឈមជាប់ពន្ធនាគារពី ៥ ទៅ ១០ឆ្នាំ។
លោក ហុង សុខហួរ បានដាក់តម្កល់ថវិកាចំនួន ១០លានរៀល ក្នុងសវនាការឧទ្ធណ៍ ដើម្បីស្នើសុំនៅក្រៅឃុំបណ្តោះអាសន្ន នៅសាលាឧទ្ធរណ៍។ បើតាមលោក ជូង ជូងី សាលាឧទ្ធរណ៍នឹងប្រកាសសាលក្រមនៅថ្ងៃត្រង់ ថ្ងៃទី៤ វិច្ឆិកានេះ។
យប់ម្សិលមិញ ប្រធានគណបក្សសង្គ្រោះជាតិ លោក សម រង្ស៊ី បានធ្វើដំណើរមកដល់កម្ពុជា ហើយលោកប្រកាសក្នុងអាកាសយានដ្ឋានអន្តរជាតិភ្នំពេញថា លោកនឹងប្រើវប្បធម៌សន្ទនារវាងគណបក្សប្រជាជនកម្ពុជា និងគណបក្សសង្គ្រោះជាតិ ពិភាក្សាពីការដោះលែងសកម្មជនគណបក្សសង្គ្រោះជាតិចំនួន ១៥នាក់ ក្នុងនោះ រួមទាំង លោក ហុង សុខហួរ ដែរ៕
© រក្សាសិទ្ធិដោយ thmeythmey.com