ជាតិ
សង្គមជាតិ
ទេសចរអន្តរជាតិធ្លាក់ចុះជាង១១ភាគរយក្នុងរយៈពេល៩ខែឆ្នាំ២០១៥
× សៀមរាប៖ របាយការណ៍បូកសរុបរបស់មន្ទីរទេសចរណ៍ខេត្តសៀមរាប បានបង្ហាញថា មានភ្ញៀវទេសចរសរុបជិត៤លាននាក់ ដែលមកកម្សាន្តក្នុងខេត្តមួយនេះ។ ជិត៤លាននាក់ ក្នុងរយៈពេល៩ខែ ធ្វើឲ្យមានកំណើនភ្ញៀវទេសចរជាង២ភាគរយ បើប្រៀបធ្រៀបនឹងរយៈពេលដូចគ្នាកាលពីឆ្នាំទៅ។ យ៉ាងណា ការកើននេះតែនៅលើទេសចរជាតិតែប៉ុណ្ណោះ សម្រាប់ទេសចរអន្តរជាតិវិញ របាយការណ៍បញ្ជាក់ថា បានថយចុះជាង ១១ភាគរយ ក្នុងរយៈពេល៩ខែ ឆ្នាំ២០១៥ ។
មានទេសចរសរុបចំនួន ៣,៧៩៥,៤៦៦នាក់ ត្រឹមរយៈពេល៩ខែ ឆ្នាំ២០១៥ ដែលមកកម្សាន្តខេត្តសៀមរាប។ ចំនួននេះ បានកើន ២.១៧ភាគរយ ធៀបនឹងរយៈពេលដូចគ្នាកាលពីឆ្នាំ២០១៤ ដែលកាលនោះ មានភ្ញៀវទេសចរត្រឹម ៣,៧១៤,៧៦០នាក់។ នេះបើយោងតាមរបាយការណ៍ពីមន្ទីរទេសចរណ៍ខេត្តសៀមរាប។
ក្នុងរបាយការណ៍ដដែលនោះ បានបន្តលម្អិតពីចំនួនទេសចរជាតិ និងអន្តរជាតិផងដែរ ដែលក្នុងនោះ មានទេសចរជាតិចំនួន ២,២៤៨,៥៤០នាក់ គឺកើនឡើងចំនួន ១៣.៩៣ភាគរយ ធៀបនឹងឆ្នាំទៅ។ ដោយឡែកទេសចរអន្តរជាតិ មានចំនួនជាង១លាននាក់ដែរ គឺស្មើនឹង ១,៥៤៦,៩២៦នាក់ ដែលធ្វើឲ្យទិន្នន័យនេះ ថយចុះចំនួន ១១.១៥ភាគរយធៀបនឹងឆ្នាំទៅ ដែលមានចំនួនរហូតដល់ជិត២លាននាក់ គឺស្មើនឹង១,៧៤១,១៨១នាក់។
ចំណែកទាក់ទងនឹងទេសចរវិញ ជនជាតិចិនបានឈរនៅលេខរៀងទី១ ដែលមកទស្សនាខេត្តសៀមរាបច្រើនជាងគេ ក្នុងរយៈពេល៩ខែនេះ។ តួលេខបង្ហាញថា មានជនជាតិចំនួន ២៩០,១៨៨នាក់ ស្មើនឹង១៨.៧៦ភាគរយ ដែលធ្វើឲ្យចំនួននេះកើនឡើងជាង១៩ភាគរយ។ ដោយឡែកទេសចរជនជាតិកូរ៉េវិញ ធ្លាក់ចុះជិត១០ភាគរយ។ តួលេខបង្ហាញថា មានជនជាតិកូរ៉េចំនួន ២៣២,០៥០នាក់ ថយចុះ៩.៩៧ភាគរយ ធៀបនឹងឆ្នាំទៅ ដែលមានចំនួន ២៥៧,៧៦៣នាក់។
មិនទាន់អស់នោះទេ ក្នុងរបាយការណ៍របស់មន្ទីរទេសចរណ៍ខេត្តសៀមរាប ក៏បានបន្តទម្លាក់កំណើនទេសចរបរទេសចំនួនទៀតដែរ ក្នុងនោះ ជនជាតិជប៉ុនធ្លាក់ជាង ១៦ភាគរយ វៀតណាមធ្លាក់ចុះ ៤០ភាគរយ និងបារាំង ធ្លាក់ជិត១ភាគរយផងដែរ។ ក្រៅពីនោះ មានថៃ អាមេរិក ម៉ាឡេស៊ី និងអូស្រា្តលី កើនឡើងតិចតួច តែតួលេខរបស់ទេសចរអង់គ្លេសកើនជាង ២៣ភាគរយ។
ជុំវិញរឿងរ៉ាវទាក់ទងនឹងភ្ញៀវទេសចរនេះដែរ កាលពីថ្ងៃទី៣ វិច្ឆិកា អាជ្ញាធរជាតិអប្សរា ក៏បានចេញរបាយការណ៍សង្ខេបមួយ ទាក់ទិននឹងទេសចរអន្តរជាតិ ដែលបានទិញសំបុត្រចូលទស្សនាប្រាសាទអង្គរវត្ត។ ត្រឹម១០ខែឆ្នាំ២០១៥ មានទេសចរចំនួន ១,៦៧៧,៣៥២នាក់ បានទិញសំបុត្រចូលអង្គរ ដែលធ្វើឲ្យទំហំទឹកប្រាក់មានរហូតដល់ទៅ ជិត៤៨លានដុល្លារ គឺស្មើនឹង ៤៧,៦៨១,០៨០ ដុល្លារអាមេរិក កើនឡើងជិត១ភាគរយ ធៀបនឹងឆ្នាំ២០១៤ ៕
© រក្សាសិទ្ធិដោយ thmeythmey.com