ជាតិ
សង្គមជាតិ
លោក ហ៊ុន សែន បញ្ជាឲ្យកែលំអរសំណង់ដែលប៉ះពាល់សោភណភាពសួន «សម្តេច ហ៊ុន សែន»
×
លោកនាយករដ្ឋមន្ត្រី ហ៊ុន សែន កាលពីព្រឹកថ្ងៃទី៥ ខែវិច្ឆិកាបានធ្វើដំណើរថ្មើជើងទៅចុះត្រួតពិនិត្យដោយផ្ទាល់ នូវការដ្ឋានសំណង់របស់ក្រុមហ៊ុនNaga world ដែលបានសាងសង់ខុសច្បាប់អនុញ្ញាត និងធ្វើឱ្យមានការប៉ះពាល់ដល់សោភណភាពរាជធានីភ្នំពេញ។
លោក ប៉ា សុជាតិវង្ស អភិបាលរាជធានីភ្នំពេញ បានបញ្ជាក់នៅក្នុងគណនីហ្វេសប៊ុករបស់ខ្លួនថា ក្រោយការបញ្ចប់ពិធីសម្ពោធដាក់ឲ្យប្រើប្រាស់ជាផ្លូវការនូវគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញ ជំហានទី៣រួចមក លោកនាយករដ្ឋមន្ត្រី បាន ចុះពិនិត្យដោយផ្ទាល់ ការដ្ឋានសំណង់របស់ក្រុមហ៊ុន Naga world ដែលបានសាងសង់ខុសច្បាប់អនុញ្ញាត និងប៉ះពាល់ដល់សោភណភាពរាជធានីភ្នំពេញ។
លោកបានដឹងទៀតថា នៅក្នុងអំឡុងពេលចុះត្រួតពិនិត្យនោះដែរ លោក ហ៊ុន សែន បានណែនាំឲ្យអាជ្ញាធរមានសមត្ថកិច្ច និងអ្នកជំនាញពាក់ព័ន្ធទាំងអស់ត្រូវប្រជុំពិភាក្សា និងមានវិធានការណ៍កែលម្អវិញជាបន្ទាន់ ដើម្បីធ្វើយ៉ាងណាឲ្យរក្សាបាននូវលំហរសាធារណៈសម្រាប់ប្រជាពលរដ្ឋមកលម្ហែកំសាន្តនៅសួនសម្តេចហ៊ុន សែនដ៏មានប្រជាប្រិយភាពនេះបានដូចដើម។
បន្ទាប់ពីមានការបញ្ជារបស់ លោកនាយករដ្ឋមន្ត្រី ហ៊ុន សែន ឱ្យមានការប្រជុំពិភាក្សា និងចាត់វិធានការកែលម្អរនោះ នៅរសៀលថ្ងៃទី៥ ខែវិច្ឆិកា នេះ នៅសាលារាជធានីភ្នំពេញនឹងមានការប្រជុំបន្ទាន់មួយ ដើម្បីពិភាក្សាផ្លូវច្បាប់ និងបច្ចេកទេសដើម្បីអនុវត្តឲ្យបានមឺងម៉ាត់នូវបទបញ្ជានេះ៕
© រក្សាសិទ្ធិដោយ thmeythmey.com