ជាតិ
សង្គមជាតិ
ជនជាប់ចោទ ៣នាក់ វាយតំណាងរាស្ត្រ CNRP អាចជាប់ពន្ធនាគារពី ២ ទៅ ៥ឆ្នាំ រូបថតអគ្គស្នងការដ្ឋាននគរបាលជាតិ
× ភ្នំពេញ៖ តំណាងអយ្យការសាលាដំបូងរាជធានីភ្នំពេញបានចោទប្រកាន់ជនដៃដល់ ៣នាក់ បង្ករបួសស្នាមលើអ្នកតំណាងរាស្ត្រគណបក្សសង្គ្រោះជាតិដែលចូលបង្ហាញខ្លួន ចំពោះមុខគណៈកម្មការស្រាវជ្រាវស៊ើបអង្កេតក្រសួងមហាផ្ទៃ កាលពីថ្ងៃទី៣ វិច្ឆិកា ពីបទល្មើសបង្កហិង្សាដោយចេតនាមានស្ថានទម្ងន់ទោស និងធ្វើឲ្យខូចខាតទ្រព្យសម្បត្តិដោយចេតនាមានស្ថានទម្ងន់ទោស តាមមាត្រា ២១៨ និងមាត្រា ៤១១ នៃក្រមព្រហ្មទណ្ឌ។ នេះបើយោងតាមការចុះផ្សាយរបស់អគ្គស្នងការដ្ឋាននគបាលជាតិ នៅថ្ងៃទី៥ វិច្ឆិកានេះ។
តុលាការបានសម្រេចបញ្ជូនខ្លួនជនជាប់ចោទទាំង ៣នាក់ ទៅឃុំខ្លួនបណ្តោះអាសន្នក្នុងពន្ធនាគារព្រៃស ក្រោយបញ្ចប់ការសាកសួរ នៅរសៀលថ្ងៃទី០៤ ម្សិលមិញ។
តាមមាត្រា ២១៨ នៃក្រមព្រហ្មទណ្ឌ អំពើហិង្សាដោយចេតនា ត្រូវផ្តន្ទាទោសដាក់ពន្ធនាគារពី ២ឆ្នាំ ទៅ ៥ឆ្នាំ និងពិន័យជាប្រាក់ពី ៤លានរៀល ទៅ១០លានរៀល កាលណាបើអំពើ ហិង្សានេះ បានប្រព្រឹត្តដោយមានការគិតទុកជាមុន ការប្រើអាវុធ ឬគំរាមកំហែងនឹងអាវុធ និងដោយមានមនុស្សច្រើននាក់ក្នុងឋានៈជាចារី សហចារី អ្នកផ្តើមគំនិត និងអ្នកសមគំនិត។
រីឯ មាត្រា ៤១១ នៃក្រមព្រហ្មទណ្ឌ ស្ថានទម្ងន់ទោស អំពើប្រព្រឹត្តដោយចេតនា ដោយបំផ្លិចបំផ្លាញ ធ្វើឲ្យទ្រុឌទ្រោម ឬធ្វើឲ្យខូចខាតទ្រព្យសម្បត្តិរបស់អ្នកដទៃនោះ ត្រូវផ្តន្ទាទោសដាក់ ពន្ធនាគារពី ២ឆ្នាំ ទៅ ៥ឆ្នាំ និងពិន័យជាប្រាក់ពី ៤លានរៀល ទៅ១០លានរៀល នៅក្នុង ករណី គឺ ទីមួយ, កាលបើបទល្មើសនេះ បានប្រព្រឹត្តដោយបុគ្គលច្រើនរូប ធ្វើសកម្មភាពក្នុង ឋានៈជាចារី សហចារី អ្នកផ្តើមគំនិត ឬជាអ្នកសមគំនិត ទីពី,កាលបើ បទល្មើសនេះ បាន ប្រព្រឹត្តក្នុងទីកន្លែងជាលំនៅឋាន ទីបី,កាលណាបើបទល្មើសនេះ បានប្រព្រឹត្តនៅក្នុងទីកន្លែង សម្រាប់តម្កល់មូលនិធិតម្លៃ ទំនិញ ឬសម្ភារៈ ទីបួន,បទល្មើសនេះ នាំឲ្យខូចប្រយោជន៍ដល់ សំណង់គ្រឹះស្ថានសាធារណៈ ឬផ្លូវសាធារណៈ ខូចប្រយោជន៍ដំណាំ ឬកសិផល និងនាំឲ្យខូចបង្គោលព្រំដែនអន្តរជាតិ នៃព្រះរាជាណាចក្រកម្ពុជា។
យោងតាមសេចក្តីប្រកាសព័ត៌មានរបស់ ក្រសួងមហាផ្ទៃ ជនសារភាពទាំង៣នាក់ មានឈ្មោះ ចាយ សារិទ្ធ អាយុ៣៣ឆ្នាំ រស់នៅក្រុងតាខ្មៅ ខេត្តកណ្តាល ឈ្មោះ ម៉ៅ ហឿន អាយុ៣៤ឆ្នាំ រស់នៅស្រុកពាមរក៍ ខេត្តព្រៃវែង និង សុត វណ្ណនី អាយុ៤៥ឆ្នាំ រស់នៅក្រុងតាខ្មៅ ខេត្តកណ្តាល។
គួរបញ្ជាក់ថា នៅថ្ងៃទី៥នេះ លោកនាយករដ្ឋមន្ត្រី ហ៊ុន សែន បានបញ្ជាក់ក្នុងពិធីសម្ពោធ ប្រព័ន្ធលូរំដោះទឹកក្នុងរាជធានីភ្នំពេញថា លោកមិនគាំទ្រឲ្យមានបាតុកម្មហិង្សាជាដាច់ខាត។ ហើយថា ប្រសិនមានករណីហិង្សានោះ អ្នកវាយគេដោយខុសច្បាប់ នឹងត្រូវផ្តន្ទាទោសច្បាប់។ លោកនាយករដ្ឋមន្ត្រីបញ្ជាក់ថា ការផ្តន្ទាទោស គឺអាស្រ័យលើសេចក្តីសម្រេចរបស់តុលាការ។
សូមរម្លឹកផងដែរ លោក គង់ សុភា និងលោក ញ៉យ ចំរើន តំណាងរាស្ត្រគណបក្សសង្គ្រោះជាតិ ត្រូវបានជនដៃដល់មួយក្រុមវាយរងរបួសយ៉ាងដំណំ នៅក្រៅវិមានរដ្ឋសភា កាលពីថ្ងៃត្រង់ ថ្ងៃទី២៦ ខែតុលា ឆ្នាំ២០១៥៕
Tag:
តុលាការ
វាយតំណាងរាស្ត្រ
© រក្សាសិទ្ធិដោយ thmeythmey.com