ការសម្រេចយកចំណូលអង្គរវត្តមកគ្រប់គ្រងបានការសាទរ ប៉ុន្តែរង់ចាំមើលការអនុវត្ត

ជាតិ

សង្គមជាតិ

ការសម្រេចយកចំណូលអង្គរវត្តមកគ្រប់គ្រងបានការសាទរ ប៉ុន្តែរង់ចាំមើលការអនុវត្ត

06, Nov 2015 , 3:09 pm

រូបភាព

ដោយ: ខន ចំប៉ា

ចាប់ពីឆ្នាំ២០១៦តទៅ រដ្ឋាភិបាលនឹងគ្រប់គ្រងអង្គរវត្តទាំងមូល។ រាជរដ្ឋាភិបាលនឹង បង្កើតសហគ្រាសសាធារណៈ ដើម្បីធុរៈកិច្ចគ្រប់គ្រង ដែលមានក្រសួងទេសចរណ៍ និងក្រសួងសេដ្ឋកិច្ច និងហិរញ្ញវត្ថុ ជាអន្តរក្រសួងរៀបចំគណៈកម្មាធិការនេះ។ ការប្រកាសនេះបានទទួលការសាទរពីគ្រប់មជ្ឈដ្ឋាន រួមទាំងអ្នកវិភាគ និងគណបក្សប្រឆាំង។

លោក ឡុង កុសល ប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរា បានថ្លែងសាទរចំពោះការសម្រេចនេះ។ ក្រៅពីថ្លែងអបអរ លោក ឡុង កុសល ក៏ប្តេជ្ញា អនុវត្តន៍តាមការសម្រេចរបស់រាជរដ្ឋាភិបាលឲ្យមានប្រសិទ្ធភាពខ្ពស់បំផុត។

ជុំវិញការគ្រប់គ្រងអង្គរ ក៏បានទទួលការស្វាគមន៍ពីលោក កែម ឡី ផងដែរ។ សម្រាប់អ្នកវិភាគសង្គមរូបនេះ ទោះបីវាហាក់យឺតពេលបន្តិចប៉ុន្តែនេះជាវិធានការល្អ។ ប៉ុន្តែដើម្បីឲ្យល្អជាងនេះ លោក កែម ឡី ជំរុញឲ្យរដ្ឋាភិបាល ត្រូវប្រកាសដេញថ្លៃជាសាធារណៈ ដោយមានការចូលរួមពីក្រុមហ៊ុនឯកជនដែលមានស្តង់ដារអន្តរជាតិ ឬក្រុមហ៊ុនដែលគ្មានទំនាក់ទំនងជាមួយរដ្ឋាភិបាល ដើម្បីឲ្យការគ្រប់គ្រង់ចំណូលប្រកបដោយតម្លាភាព និងប្រសិទ្ធភាព។

ក្រៅពីតំបន់អង្គរ នៅមានរមនីយដ្ឋានបូកគោ តំបន់កោះ និងឆ្នេរជាដើម លោក កែម ឡី ក៏ចង់ឲ្យរដ្ឋាភិបាលបង្កើតរដ្ឋបាលគ្រប់គ្រង់ដោយខ្លួនឯង និងបង្កើតគណៈកម្មការចម្រុះដែលមានការចូលរួមពីវិស័យឯកជន និងសង្គមស៊ីវិល ដើម្បីត្រួតពិនិត្យលើ គ្រប់គ្រងចំណូលផងដែរ។

ចំណែកលោក អេង ឆៃអ៊ាង អនុប្រធានគណៈកម្មការនាយករបស់គណបក្សសង្គ្រោះជាតិ ក៏បានថ្លែងសាទរចំពោះការសម្រេចនេះដែរ ដោយលោកបានលើកឡើងថា៖«កាលណាការងានេះ ធ្វើឡើងដោយមានតម្លាភាព និងការទទួលខុសត្រូវខ្ពស់ គឺយើងសាទរ ប៉ុន្តែបើបង្កើតឡើងដើម្បីបិទបាំងទង្វើអាក្រក់ ឬទុច្ចរិតនោះ នេះជារឿងមួយផ្សេងទៀត»។

តែយ៉ាងណាក៏ដោយ មន្ត្រីជាន់ខ្ពស់គណបក្សសង្គ្រោះជាតិរូបនេះ មិនហ៊ានវិនិឆ្ឆ័យពីប្រសិទ្ធភាពនៃការអនុវត្តនៅឡើយ ដោយអះអាងថាចាំមើលសេចក្តីសម្រេច និងសកម្មភាពរបស់គណៈកម្មការធុរកិច្ចជាមុនសិន។

នាយករដ្ឋមន្ត្រី ហ៊ុន សែន បានប្រកាសក្នុងប្រអប់ Comment លើទំព័រហ្វេសប៊ុកខ្លួនថា «ដំណឹងសំខាន់មួយសម្រាប់ប្រជាពលរដ្ឋទូទាំងប្រទេស គឺចាប់ពីឆ្នាំក្រោយ ២០១៦ទៅ គឺរាជរដ្ឋាភិបាលកម្ពុជា នឹងកាន់កាប់ចាត់ចែងគ្រប់គ្រងអង្គរវត្តទាំងមូលរួមទាំងបុគ្គលិក និងចំណូលចំណាយ»។ ការសរសេររបស់លោកនាយករដ្ឋមន្ត្រី គឺធ្វើឡើងនៅពេលដែលលោកដឹកនាំកិច្ចប្រជុំគណៈរដ្ឋមន្ត្រី នៅព្រឹកថ្ងៃសុក្រនេះ ។

ការគ្រប់គ្រងអង្គរដែលត្រូវរដ្ឋាភិបាលបានផ្តល់សិទ្ធិឲ្យក្រុមហ៊ុនឯកជនធ្វើប្រតិបត្តិការជាច្រើនឆ្នាំកន្លងមកនេះ គឺជាប្រធានបទនៃការរិះគន់របស់គណបក្សប្រឆាំង និងសង្គមស៊ីវិលមួយចំនួន ជារៀងរហូតមក។ វាក៏ជារបៀបវារៈនៃការឃោសនាបោះឆ្នោតផងដែរ៕