ជាតិ
សង្គមជាតិ
អាជ្ញាធរអប្សរាចាប់ផ្តើមការងារពង្រឹងការអភិរក្សរមណីយដ្ឋានភ្នំគូលេន
×
សៀមរាប៖ ដើម្បីឆ្លើយតបនឹងអនុសាសន៍ក្នុងកិច្ចប្រជុំរបស់គណកម្មាធិការអន្តរជាតិសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ ហៅកាត់ថា ICC Angkor កន្លងទៅថ្មីៗ និងដើម្បីគ្រប់គ្រងលានដ្ឋានបុរាណនៅភ្នំគូលេនឲ្យកាន់តែមានប្រសិទ្ធិភាពខ្ពស់នោះ ថ្មីៗនេះអាជ្ញាធរជាតិអប្សរា បានរៀបចំឲ្យមានកន្លែងឆ្មាំយាមបន្ថែមទៀត ដើម្បីពង្រឹងការងារអភិរក្សរបស់ខ្លួន។
រោងឆ្មាំចំនួន២កន្លែងទៀត នឹងត្រូវរៀបចំសាងសង់នៅលើភ្នំគូលេន។ ការងារនេះ បានប្រកាសរៀបចំឡើងដោយអាជ្ញាធរជាតិអប្សរា ដើម្បីពង្រឹងការងារអភិរក្សលានដ្ឋានក្នុងរមណីយដ្ឋានភ្នំគូលេននេះ។ គោលបំណងត្រូវបានអ្នកគ្រប់គ្រង បញ្ជាក់ថា ជាផ្នែកមួយ ដើម្បីពង្រឹងការងារអភិរក្ស ជាពិសេសនោះ ដើម្បីតបតាមការឆ្លើយតបរបស់ គណកម្មាធិការអន្តរជាតិសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ ហៅកាត់ថា ICC Angkor ក្នុងកិច្ចប្រជុំរបស់ខ្លួនកាលពីដើមខែមិថុនាកន្លងទៅ។
ប្រធាននាយកដ្ឋានអភិរក្សប្រាសាទក្រៅឧទ្យានអង្គរ នៃអាជ្ញាធរជាតិអប្សរា លោក ឈាន រដ្ឋា បានបញ្ជាក់ក្នុងបទសម្ភាសន៍តាមទូរសព្ទនៅព្រឹកថ្ងៃសុក្រនេះថា ការបន្ថែមរោងឆ្មាំចំនួន២កន្លែងទៀតនេះ ព្រោះថាកន្លងមករោងឆ្មាំរបស់អាជ្ញាធរជាតិអប្សរាមានតែមួយកន្លែងប៉ុណ្ណោះ។ លោកបន្តថា ការបន្ថែមរោងឆ្មាំនេះ ដើម្បីបង្កើនប្រសិទ្ធិភាពលើការងារអភិរក្សលានដ្ឋានបុរាណទាំងអស់ ដែលមាននៅលើភ្នំគូលេន។
សេចក្តីសម្រេចរបស់រដ្ឋាភិបាលនាពេលកន្លងមក បានសម្រេចឲ្យអាជ្ញាធរជាតិអប្សរា មានសិទ្ធិគ្រប់គ្រងលានដ្ឋានបុរាណទាំងអស់ ដែលមាននៅក្នុងខេត្តសៀមរាប។ សម្រាប់នៅឡើយភ្នំគូលេនក៏ដូចគ្នា គឺលានដ្ឋានបុរាណ ស្ថិតក្រោមការគ្រប់គ្រងរបស់អាជ្ញាធរជាតិអប្សរា និងការងារព្រៃឈើ ស្ថិតក្រោមការគ្រប់គ្រងរបស់ក្រសួងបរិស្ថាន។ «ខាងបរិស្ថានគេមានលានដ្ឋានរបស់គេដាច់ដោយឡែក ហើយយើងមានរោងឆ្មាំរបស់យើង»។ នេះជាការបញ្ជាក់បន្ថែមរបស់លោក ឈាន រដ្ឋា។
ការពង្រឹងការងារអភិរក្សនេះ អាចថាកន្លងមកមានមនុស្សមួយចំនួន បានចូលទៅតាំងទីខុសច្បាប់ នៅទីនោះផង។ តាមការបញ្ជាក់របស់លោក ឈាន រដ្ឋា កន្លងមកធ្លាប់មានតាបសខិលខួច លូចចូលទៅតំបន់ទាំងនោះ តែការស្នាក់នៅគឺមានរយៈពេលខ្លីតែប៉ុណ្ណោះ។ ក្រៅពីការងារអភិរក្ស អាជ្ញាធរជាតិអប្សរារួមនិងស្ថាប័នពាក់ព័ន្ធ កំពុងសិក្សាពីលទ្ធភាពរៀបចំហេដ្ឋារចនាសម្ព័ន្ធទៅកាន់លានដ្ឋានបុរាណៗ ដែលមាននៅលើភ្នំគូលេនផងដែរ ដើម្បីងាយស្រួលដល់ភ្ញៀវទេសចរ ដែលចាប់អារម្មណ៍ទៅនឹងតំបន់ទាំងនោះ។ បច្ចុប្បន្ន មធ្យោបាយតែមួយមុខគាត់ដើម្បីទៅដល់កន្លែងទាំងនោះបាន គឺម៉ូតូ។
គួរបញ្ជាក់ថា រោងឆ្មាំ២កន្លែងដែលគ្រោងនឹងសាងសង់នោះ គឺមានទីតាំងមួយនៅតំបន់ការពារប្រាសាទរោងចិន និង នៅតំបន់ការពារស្រះដំរី។ តាមការបង្ហើបពីមន្ត្រីនៃក្រសួងបរិស្ថាន រដ្ឋាភិបាលគ្រោងដកសិទ្ធិគ្រប់គ្រងរមណីយដ្ឋានភ្នំគូលេន ដែលបច្ចុប្បន្នគឺក្រុមហ៊ុន នគរគោកធ្លក របស់ឧកញ្ញ៉ា សៀង ណាំ កំពុងកាន់កាប់។ រដ្ឋាភិបាលនឹងរៀបចំគ្រប់គ្រងភ្នំគូលេន ហើយនឹងបញ្ចប់យកថ្លៃសំបុត្រ សម្រាប់ភ្ញៀវទេសចរបរទេសផងដែរ៕
© រក្សាសិទ្ធិដោយ thmeythmey.com