កីឡាជាតិ
ជាតិ
កីឡាការិនី កែ ឡេង កក់មេដាយមួយទៀតហើយឲ្យកម្ពុជាក្នុងព្រឹត្តិការណ៍ពិភពលោក កីឡាការិនី កែ ឡេង ក្នុងព្រឹត្តិការណ៍ពិភពលោកនៅថៃ។ រូបថត May Ratana
× កីឡាការិនីប៉េតង់ កែ ឡេង បានឈានទៅកាន់វគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ប្រកួត Women’s Petanque World Championships លើកទី១៥ នៅក្នុងទីក្រុងបាងកក ប្រទេសថៃ បន្ទាប់ពីបានយកឈ្នះកីឡាការិនីកាណាដា Maryse Beregeron ក្នុងលទ្ធផល ៤០-២១ លើវិញ្ញាសាវាយយកពិន្ទុ នារសៀលថ្ងៃទី៦ ខែវិច្ឆិកា នេះ។
ជ័យជម្នះនេះ ក៏ជាការបោះជំហានផងដែរបស់អ្នកស្រី កែ ឡេង ក្នុងការឡើងទៅកាន់ការប្រកួតដណ្តើមជើងឯកពិភពលោកពីរលើកជាប់គ្នា បន្ទាប់ពី កីឡាការិនីកំពូលកម្ពុជារូបនេះ ឈ្នះមេដាយមាសជាប្រវត្តិសាស្ត្រជូនជាតិ នាការប្រកួតនៅក្នុងទីក្រុង Montauban ប្រទេសបារាំង កាលពីឆ្នាំ២០១៣ ។
ក្នុងដំណើរឈានមកកាន់វគ្គពាក់កណ្តាលផ្តាច់ព្រ័ត្រនៅឆ្នាំ២០១៥ នេះ កីឡាការិនី កែ ឡេង បានបញ្ចប់ចំណាត់ថ្នាក់លេខ៤ ក្នុងចំណោមកីឡាការិនី៤១នាក់ ដោយស្ថិតនៅក្រោយកីឡាការិនី បារាំង ថៃ និងម៉ាដាហ្គាស្កា ខណៈកីឡាការិនីកាណាដា អេស្ប៉ាញ ទុយនេស៊ី និងឡាវ ឈរក្នុងចំណោមក្រុមកំពូលក្រោយការប្រកួតជម្រុះលើកទីពីរ។
នៅវគ្គមួយភាគបួនផ្តាច់ព្រ័ត្រ កែ ឡេង ត្រូវប៉ះជាមួយកីឡាការិនីកាណាដា Maryse Bergeron ហើយទទួលបានជ័យជម្នះ រហូតដល់ ៤០ទល់នឹង២១ ។ សម្រាប់ការប្រកួតវគ្គ១/២ កែ ឡេង ត្រូវប៉ះជាមួយកីឡាការិនីបារាំង Audrey Bandiera នាវេលាម៉ោង៩យប់នេះ៕
© រក្សាសិទ្ធិដោយ thmeythmey.com