ជាតិ
ចិន សន្យាបំពេញបន្ថែមជំនួយការពារជាតិដល់កម្ពុជា
× ភ្នំពេញ៖ រដ្ឋមន្ត្រីការពារជាតិកម្ពុជា លោក ទៀ បាញ់ បានបើកកិច្ចពិភាក្សាជាមួយរដ្ឋមន្ត្រីក្រសួងការពារជាតិចិនលោក Chang Wanquan នៅទីស្ដីការក្រសួងការពារជាតិ នៅថ្ងៃសុក្រ ទី៦ វិច្ឆិកានេះ ។ ភាគីទាំងពីរ កម្ពុជា-ចិន បានប្តេជ្ញាក្នុងជំនួបពិភាក្សាការងារនោះ បន្តពង្រឹងកិច្ចសហប្រតិបត្តិការលើវិស័យការពារជាតិទៅវិញទៅមក ហើយភាគីចិនសន្យានឹងបន្តបំពេញបន្ថែម រាល់ជំនួសខ្វះខាតដែលបានផ្តល់ឲ្យកម្ពុជា កន្លងមក។
រដ្ឋមន្ត្រីក្រសួងការពារជាតិលោក ទៀ បាញ់ បានចាត់ទុកជំនួបថ្ងៃនេះថា ជាលទ្ធផលដ៏ល្អប្រសើរ គឺបញ្ជាក់ច្បាស់ពីកិច្ចសហប្រតិបត្តិការលើវិស័យការពារជាតិកម្ពុជា-ចិន ជាបន្តបន្ទាប់ ព្រមទាំងបំពេញបន្ថែមនូវចំណុចខ្វះខាតដែលមប្រើឲ្យវិស័យការពារជាតិ ពិសេសគឺ ការហ្វឹកហ្វឺនកងទ័ព ហេដ្ឋារចនាសម្ព័ន្ធរបស់កងទ័ព និងបំពាក់គ្រឿងអាវុធយុទ្ធភ័ណ្ឌ។ ក្រៅពីជំនួបពិភាក្សាការងារ ភាគីទាំងពីរក៏បានចុះហត្ថលេខាលើកិច្ចព្រមព្រៀងការពារជាតិមួយចំនួនផងដែរ ដូចជា កិច្ចសហប្រតិបត្តិការបំពេញបន្ថែមផ្នែកវិទ្យុទាក់ទងកងទ័ព។
លោក ទៀ បាញ់ និយាយយ៉ាងដូច្នេះថា៖«ប្រព័ន្ធការពារអាកាសដែលចិនបានជួយមកកម្ពុជា គឺមានហើយ ប៉ុន្តែនៅមិនទាន់ជាទីពេញចិត្ត...យើងត្រូវបំពេញបន្ថែមឲ្យមានប្រសិទ្ធភាពកាន់តែខ្ពស់...គឺឈានដល់ការបំពាក់បំពេញបន្ថែម ដល់ធុនបាញ់ឆ្ងាយ ហើយលឿនៗមិនអាចគេចបាននោះទេ នេះគឺជាអ្វីដែលយើងចង់បាន»។
រដ្ឋមន្ត្រីការពារជាតិនៃសាធារណរដ្ឋប្រជាមានិតចិន លោក Chang Wanguan អមដំណើរដោយប្រតិភូក្រសួងការពារជាតិនៃកងទ័ពរំដោះប្រជាជនចិន បានចាប់ផ្តើមបំពេញទស្សនកិច្ចផ្លូវការនៅកម្ពុជា ពីថ្ងៃទី៥ ដល់ថ្ងៃទី៨ ខែវិច្ឆិកានេះ។ បន្ទាប់ពីជួបពិភាក្សាជាមួយលោក ទៀ បាញ់ រដ្ឋមន្ត្រីក្រសួងការពារជាតិកម្ពុជា លោក Chang Wanguan និងគណៈប្រតិភូ នឹងជួបសម្តែងការគួរសមជាមួយលោក នាយករដ្ឋមន្ត្រីហ៊ុន សែន នៅរសៀលថ្ងៃទី ៦ វិច្ឆិកានេះ ផងដែរ។ រីឯ នៅព្រឹកថ្ងៃទី ៧ ខែវិច្ឆិកា លោក Chang Wanguan និងគណៈប្រតិភូ នឹងទៅទស្សនាវិទ្យាស្ថានកងទ័ពជើងគោក រួចបន្តដំណើរទៅខេត្តសៀមរាប ដើម្បីទស្សនាប្រាសាទអង្គរវត្ត មុនចាកចេញពីកម្ពុជា៕
© រក្សាសិទ្ធិដោយ thmeythmey.com