ជាតិ
សង្គមជាតិ
វៀតណាមខុសច្បាប់ ៨នាក់ ត្រូវបានឃាត់ខ្លួននៅបឹងសាឡាង
× សមត្ថកិច្ចនាយកដ្ឋានស៊ើបអង្គេត និងអនុវត្តនីតិវិធី បានឃាត់ខ្លួនជនអន្តោប្រវេសន៍វៀតណាម ចំនួន៨នាក់ ស្ថិតក្នុងសង្កាត់បឹងសាឡាង ខណ្ឌទួលគោក នៅថ្ងៃទី៦ ខែវិច្ឆិកានេះ។ នេះបើតាមការចុះផ្សាយរបស់អគ្គស្នងការដ្ឋាននគរបាលជាតិ។
យោងតាមប្រភពដដែល ជនជាតិវៀតណាចំនួន៨ (ស្រី៣នាក់) ត្រូវបានសមត្ថកិច្ចអន្តោប្រវេសន៍ ឃាត់ខ្លួននៅផ្ទះ១៤ ផ្លូវ៣៣៦ សង្កាត់បឹងសាឡាង ខណ្ឌទួលគោក។ ក្រោយពីសមត្ថកិច្ចសាកសួរ ទើបដឹងថា ជនជាតិវៀតណាមទាំងនោះ បានលួចមកស្នាក់នៅ និងរកស៊ីដោយខុសច្បាប់ក្នុងព្រះរាជាណាចក្រកម្ពុជា ហើយបន្ទាប់មកទើបបញ្ជូនមកកាន់អគ្គនាយកដ្ឋានអន្តោប្រវេសន៍។
តាមការសាកសួររបស់សមត្ថកិច្ច ជនជាតិវៀតណាមនោះគ្មានលិខិតឆ្លងដែន និងទិដ្ឋាការអ្វីទាំងអស់ ពោលគឺពួកគេចូលមកធ្វើការនៅក្នុងប្រទេសកម្ពុជាដោយខុសច្បាប់តែម្តង។ បច្ចុប្បន្នពួកគេត្រូវបានកម្លាំងនគរបាលកសាងសំណុំឯកសារ បញ្ជូនទៅអគ្គនាយកដ្ឋានអន្តោប្រវេសន៍ ដើម្បីកសាងសំណុំរឿងចាត់បញ្ជូនទៅស្រុកកំណើតវិញ។
សូមបញ្ជាក់ថា ជនអន្តោប្រវេសន៍ខុសច្បាប់ ៤៨ជនជាតិ រួមមានប្រមាណជាង៣០០០នាក់ ត្រូវបានសមត្ថកិច្ចឃាត់ខ្លួន និងបណ្តេញចេញពីកម្ពុជា ដោយគិតត្រឹមរយៈពេល ១០ខែ នាឆ្នាំ២០១៥នេះ។ ក្នុងចំណោមជនអន្តោប្រវេសន៍ទាំងនោះ មានជនជាតិវៀតណាម មានប្រមាណជា ៩០%៕
© រក្សាសិទ្ធិដោយ thmeythmey.com