វីរនារីកីឡាប៉េតង់ កែ ឡេង ឈ្នះមេដាយមាសពិភពលោកមួយទៀតហើយ

កីឡាជាតិ

ជាតិ

វីរនារីកីឡាប៉េតង់ កែ ឡេង ឈ្នះមេដាយមាសពិភពលោកមួយទៀតហើយ

06, Nov 2015 , 11:56 pm

រូបភាព

កីឡាការិនី កែ ឡេង ឈ្នះមេដាយមាសពិភពលោកជាប់ៗគ្នាលើវិញ្ញាសាវាយយកពិន្ទុ។ រូបថត ហ្វេសប៊ុក May Ratana

ដោយ: អុឹង ចំរើន (Ung Chamroeun)

កីឡាការិនីប៉េតង់ កែ ឡេង បានឈ្នះមេដាយមាសពីរលើកជាប់ៗគ្នាលើវិញ្ញាសាវាយយកពិន្ទុក្នុងព្រឹត្តិការណ៍ Women’s Petanque World Championship បន្ទាប់ពីបានយកឈ្នះកីឡាការិនីទុយនេស៊ី Mouna Beji ក្នុងលទ្ធផល ៣៣ ទល់នឹង២៥នៅវគ្គផ្តាច់ព្រ័ត្រនារាត្រីថ្ងៃទី៦ ខែវិច្ឆិកា នៅក្នុងទីក្រុងបាងកក ប្រទេសថៃ។

នេះជាការទទួលបានមេដាយមាសពីរលើកជាប់ៗគ្នាក្នុងព្រឹត្តិការណ៍ពិភពលោករបស់កីឡាការិនី កែ ឡេង ដោយកាលពីឆ្នាំ២០១៣ គាត់បានឈ្នះរួចម្តងទៅហើយនាការប្រកួតនៅក្នុងទីក្រុង Montauban ប្រទេសបារាំង។

នៅមុនការឈានមកដល់ការឈ្នះមេដាយមាសលំដាប់ពិភពលោក នេះ កីឡាការិនី កែ ឡេង បានបញ្ចប់ចំណាត់ថ្នាក់លេខ៤ ក្នុងចំណោមកីឡាការិនី៤១នាក់នាវគ្គជម្រុះ ដោយស្ថិតនៅក្រោយកីឡាការិនី បារាំង ថៃ និងម៉ាដាហ្គាស្កា ខណៈកីឡាការិនីកាណាដា អេស្ប៉ាញ ទុយនេស៊ី និងឡាវ ឈរក្នុងចំណោមក្រុមកំពូលក្រោយការប្រកួតជម្រុះលើកទីពីរ។

នៅវគ្គមួយភាគបួនផ្តាច់ព្រ័ត្រ កែ ឡេង ត្រូវប៉ះជាមួយកីឡាការិនីកាណាដា Maryse Bergeron ហើយទទួលបានជ័យជម្នះ រហូតដល់ ៤០ទល់នឹង២១ ។ នៅវគ្គ១/២ផ្តាច់ព្រ័ត្រ កីឡាការិនី កែ ឡេង បានយកឈ្នះកីឡាការិនីបារាំង Audrey Bandiera ក្នុងលទ្ធផល ២៨ ទល់នឹង៩ ។ នៅវគ្គផ្តាច់ព្រ័ត្រ គាត់បានបំបាក់ កីឡាការិនីទុយនេស៊ី Mouna Beji ក្នុងលទ្ធផល ៣៣ ទល់នឹង២៥ ៕