លោកស្រី អ៊ុងសាន ស៊ូជី នឹងមានអំណាចធំជាងប្រធានាធិបតី

អន្តរជាតិ

នយោបាយអន្តរជាតិ

លោកស្រី អ៊ុងសាន ស៊ូជី នឹងមានអំណាចធំជាងប្រធានាធិបតី

10, Nov 2015 , 4:49 pm

រូបភាព

ដោយ:

ក្នុងកិច្ចសម្ភាសន៍ជាមួយទូរទស្សន៍សិង្ហបុរី Channel NewsAsia លោកស្រី អ៊ុងសាន ស៊ូជី និយាយថា លោកស្រីគឺជាអ្នកបញ្ជាប្រធានាធិបតីថ្មី ប្រសិនបើលោកស្រីឈ្នះឆ្នោត។ លោកស្រីថ្លែងដូចនេះ ពីព្រោះរដ្ឋធម្មនុញ្ញដែលសរសេរដោយក្រុមយោធា ហាមលោកស្រីដែលមានស្វាមីសញ្ជាតិបរទេស និងកូនប្រុស២នាក់កាន់លិខិតឆ្លងដែនអង់គ្លេស ក្នុងការកាន់តំណែងជាប្រធានាធិបតី។

ថ្លែងទៅកាន់អ្នកយកព័ត៌មានរបស់ទូរទស្សន៍ Channel NewsAsia កាលពីម្សិលមិញ មេដឹកនាំគណបក្សសម្ព័ន្ធជាតិដើម្បីប្រជាធិបតេយ្យ លោកស្រី អ៊ុងសាន ស៊ូជី បានបញ្ជាក់ថា ប្រធានាធិបតីតែងតាំងថ្មីនឹងមិនមានអំណាចអ្វីឡើយ ប្រសិនបើគណបក្សលោកស្រីអាចបង្កើតរដ្ឋាភិបាលបាន។ ជាមួយគ្នានោះ លោកស្រី ស៊ូជី បន្ថែមថា ការតែងតាំងប្រធានាធិបតីថ្មី គឺគ្រាន់តែបំពេញតាមលក្ខខណ្ឌរបស់រដ្ឋធម្មនុញ្ញតែប៉ុណ្ណោះ។

សូមរម្លឹកផងដែរថា នៅមុនពេលបោះឆ្នោតថ្ងៃទី៨ លោកស្រី ស៊ូជី និយាយថា លោកស្រីនឹងមានតំណែងធំជាងប្រធានាធិបតី។ ហើយកាលពីថ្ងៃអង្គារម្សិលមិញនេះទៀត លោកស្រីក៏បានបញ្ជាក់ឡើងវិញថា លោកស្រីនឹងធ្វើជាអ្នកចង្អុលផ្លូវសម្រាប់ប្រធានាធិបតីថ្មី ប្រសិនបើបក្សប្រឆាំងឈ្នះឆ្នោត។

លើសពីនេះទៅទៀត មេដឹកនាំបក្សប្រឆាំងរូបនេះសង្កត់ធ្ងន់ថា ប្រធានាធិបតីថ្មី នឹងទទួលរាល់ការណែនាំពីលោកស្រី ពីព្រោះលោកស្រីជាមេដឹកនាំគណបក្ស។ ម្យ៉ាងទៀត វានឹងមិនប៉ះពាល់ដល់ដំណើរការរបស់រដ្ឋាភិបាលនោះទេ។

កាលពីថ្ងៃអាទិត្យទី៨ ខែវិច្ឆកា ប្រជាជនមីយ៉ាន់ម៉ាប្រមាណ៣០លាននាក់បានចូលរួមក្នុងការបោះឆ្នោត។ គណបក្សប្រឆាំងត្រូវការសំឡេង៦៧ភាគរយនៃកៅអីក្នុងសភាជាតិ ដើម្បីបង្កើតរដ្ឋាភិបាលដោយខ្លួនឯងនិងដើម្បីជ្រើសរើសប្រធានាធិបតី។ មកដល់ពេលនេះ គេមិនទាន់ដឹងថា ឥស្សរជនណានោះឡើយដែលត្រូវទទួលការតែងតាំងជាប្រធានាធិបតី៕