ជាតិ
សង្គមជាតិ
លោក ស ខេង៖ អាណតិ្តក្រោយ កម្មករកាត់ដេរអាចបោះឆ្នោតនៅជិតកន្លែងធ្វើការ
× ភ្នំពេញ៖ រដ្ឋមន្ត្រីក្រសួងមហាផ្ទៃ លោក ស ខេង និយាយថា ការបោះឆ្នោតនៅអាណត្តិក្រោយនេះ ប្រជាពលរដ្ឋ ពិសេសគឺកម្មករកាត់ដេរចំណាកស្រុកកំណើត អាចបោះឆ្នោតនៅតាមមណ្ឌលជិតកន្លែងដែលពួកគេធ្វើការបាន ដោយពុំចាំបាច់ធ្វើដំណើរទៅបោះឆ្នោតនៅមណ្ឌលចាស់ ដែលពួកគេធ្លាប់បោះឆ្នោតពីមុននោះទេ។
លោក ស ខេង បញ្ជាក់ក្នុងបទឧទ្ទេសនាមដល់និស្សិតសាលាភូមិន្ទរដ្ឋបាល ស្ដីពីការបោះ ឆ្នោត និងកំណែទម្រង់បោះឆ្នោត នៅព្រឹកនេះ ថា ការរៀបចំឲ្យប្រជាពលរដ្ឋបោះឆ្នោត បាននេះ គឺជួយសម្រួលដល់អ្នកមកពីខេត្ត ដែលមកធ្វើការ និងរស់នៅក្នុងទីក្រុង ដោយពួកគេមិនពិបាកធ្វើដំណើរទៅបោះឆ្នោតនៅតាមមណ្ឌលនីមួយនៅឯខេត្ត។
លោក ស ខេង បានថ្លែងបញ្ជាក់យ៉ាងដូច្នេះថា៖«ច្បាប់បានកំណត់ថា អ្នកធ្វើការកន្លែងណាគឺ បោះឆ្នោតនៅកន្លែងនោះ។ ឧទាហរណ៍កម្មករធ្វើការនៅរាជធានីភ្នំពេញ ពីមុននេះ ត្រូវទៅបោះឆ្នោតតាមខេត្ត ស្រុកកំណើត ប៉ុន្តែឥឡូវនេះ គឺធ្វើការនៅរាជធានីភ្នំពេញ រោងចក្រណា គឺបោះឆ្នោតនៅទីកន្លែងនោះ បង្កើតការិយាល័យបោះឆ្នោត នៅកន្លែងនោះ។ នេះវាផលចំណេញជាង ទាំងនិយោជក ទាំងនិយោជិត ប៉ុន្តែវាអាចខាតដល់អ្នករកស៊ីដឹកជញ្ជូន អាចប៉ះពាល់ ព្រោះគេអត់ទៅខេត្តផង គេបោះឆ្នោតនៅហ្នឹងកន្លែង។ នេះវាជាការប៉ះពាល់ហើយ ធ្វើអ្វីមិនដែលត្រូវទាំងអស់ទេ គឺតែងតែមានបញ្ហានេះបញ្ហានោះហើយ»៕
© រក្សាសិទ្ធិដោយ thmeythmey.com