ជាតិ
សង្គមជាតិ
រដ្ឋាភិបាលជំរុញឲ្យស្រី្តពង្រីកចំណេះដឹងលើវិស័យកសិកម្ម
× សៀមរាប៖ កម្ពុជាជាប្រទេសមួយ ដែលពឹងផ្អែកសំខាន់ទៅលើវិស័យកសិកម្ម។ ក្នុងចំណោមប្រជាពលរដ្ឋដែលប្រកបរបរកសិកម្ម របាយការណ៍រកឃើញថា មានស្ត្រីជាង ៧៥ភាគរយ។
វេទិកាស្តីពីស្ត្រីក្នុងវិស័យកសិកម្ម ត្រូវបានរៀបចំឡើងជាលើកដំបូងនៅក្នុងខេត្តសៀមរាប ក្នុងគោលបំណងដើម្បីជំរុញ និងលើកទឹកចិត្តស្ត្រីខ្មែរ ឲ្យខិតខំ និងពង្រីកសមត្ថភាពខ្លួនឯង ឲ្យកាន់តែប្រសើរឡើង លើវិស័យកសិកម្ម។ ស្ត្រីត្រូវគេមើលឃើញថា ជាស្នូលសំខាន់ ក្នុងការអភិវឌ្ឍន៍វិស័យកសិកម្មកម្ពុជា។
ស្ត្រីធ្វើការលើវិស័យកសិកម្មប្រមាណ៥០នាក់ បានជួបជុំគ្នា នៅក្នុងវេទិកាស្តីពីស្ត្រីក្នុងវិស័យកសិកម្ម ដែលរៀបចំឡើងនៅខេត្តសៀមរាប នៅព្រឹកថ្ងៃទី១២ វិច្ឆិកានេះ។ ជាវេទិកា ដើម្បីចែករំលែករាល់បទពិសោធន៍ផ្សេងៗ ក៏ដូចជាការគាំទ្រចំពោះស្ត្រី និងបុរសធ្វើការរួមគ្នា ក្នុងវិស័យកសិកម្ម។
វេទិកាថ្នាក់ក្រោមជាតិ ស្តីពីស្ត្រីក្នុងវិស័យកសិកម្ម សហការរៀបចំឡើងដោយរដ្ឋាភិបាល និងអង្គការសង្គមស៊ីវិល មានគោលបំណងចែករំលែកបទពិសោធន៍ និងគំនិតច្នៃប្រឌិតថ្មី ដើម្បីគាំទ្រកសិករស្ត្រី និងបុរសធ្វើការរួមគ្នាលើវិស័យកសិកម្ម លើកកម្ពស់កសិករខ្នាតតូច ជាពិសេសកសិករស្ត្រីឲ្យក្លាយជាស្ត្រីឆ្នើមក្នុងការងារកសិកម្ម។ វេទិកាខាងលើ ក៏បានពិភាក្សាលើដំណោះស្រាយទឹក ដែលគេដឹងថា ជាបញ្ហាប្រឈមក្នុងវិស័យកសិកម្មកម្ពុជា។ ក្រៅពីនោះ ទីផ្សារសម្រាប់កសិផល ក៏បានលើកយកមកពិភាក្សារួមគ្នាផងដែរ។
យ៉ាងណា ស្ត្រីជាកសិករដែលបានចូលរួមក្នុងសិក្ខាសាលា បានបង្ហាញអារម្មណ៍សុទ្ធិដ្ឋិនិយម និងត្រេកអរចំពោះ គោលនយោបាយរបស់រដ្ឋាភិបាល ដែលចង់ឲ្យពួកគេពង្រីកចំណេះដឹងលើវិស័យកសិកម្ម។ ទន្ទឹមនឹងនោះ ពួកគេស្នើឲ្យរដ្ឋាភិបាលជួយពួកគេតាមរយៈ ការបង្កើតមុខរបរខ្នាតតូចផ្សេងៗ ដើម្បីទ្រទ្រង់ជីវភាពគ្រួសារ ព្រោះថា ចំណេះដឹងទាក់ទងនឹងវិស័យកសិកម្មរបស់ពួកគេ នៅមានទន់ខ្សោយនៅឡើយ។ នៅមានភាពទន់ខ្សោយ ដែលមិនអាចឲ្យពួកគេពឹងទាំងស្រុងបាននោះទេ។
នាយិកាអង្គការរចនាស្ត្រី អ្នកស្រី ញាន ភួងម៉ាលី បានសាទរចំពោះការរីកចម្រើនចំណេះដឹងផ្នែកកសិកម្មរបស់ស្ត្រីនាពេលបច្ចុប្បន្ននេះ។ តែអ្នកស្រី ភួងម៉ាលី ទទួលស្គាល់ថា មានស្ត្រីមួយចំនួនធំ មិនទាន់ស៊ីជម្រៅលើចំណេះជំនាញនេះនៅឡើយ។ អង្គការរចនាស្ត្រី កំពុងគិតគូរចំពោះលទ្ធភាព បង្កើតមុខរបរខ្នាតតូច ដើម្បីជួយស្ត្រីទាំងនោះបាន។
យោងតាមរបាយការណ៍របស់ធនាគារពិភពលោក World Bank បានបង្ហាញថា ស្ត្រីដែលធ្វើការលើវិស័យកសិកម្ម មានចំនួនជាង ៧៥ភាគរយ ក្នុងនោះស្ត្រីមួយចំនួនធំនៅខ្វះសមត្ថភាព និងបទពិសោធន៍នៅជំនាញមួយនេះ។ ការជ្រើសរើសពូជ និងការបណ្តុះបណ្តាលលើការដាំដុះ ជាគន្លឹះសំខាន់ ដែលអាចឲ្យកសិករជោគជ័យបាន៕
© រក្សាសិទ្ធិដោយ thmeythmey.com