អ្នកកាសែតមកពី៨ប្រទេសបញ្ចប់ការសិក្សារយៈពេល៦សប្តាហ៍នៅកូរ៉េខាងត្បូង

ជាតិ

សង្គមជាតិ

អ្នកកាសែតមកពី៨ប្រទេសបញ្ចប់ការសិក្សារយៈពេល៦សប្តាហ៍នៅកូរ៉េខាងត្បូង

12, Nov 2015 , 4:32 pm

រូបភាព

ដោយ: ថ្មីៗ

សេអ៊ូល៖ កម្មវិធីសិក្សាស្តីពីសារព័ត៌មាន Kwanhun លើកទីបួន ត្រូវរៀបចំឡើងស្ថិតក្រោមការសហការរវាង ក្លិបកាសែតកូរ៉េ Kwanhun និង មូលនិធិសារព័ត៌មានកូរ៉េបានឈានដល់ទីបញ្ចប់ហើយ។ ទោះវគ្គសិក្សានេះបញ្ចប់ទៅក្តី តែបទពិសោធន៍និងចំណេះដឹងដែលអ្នកសារព័ត៌មានទទួលបានពីកម្មវិធីនេះនឹងរួមចំណែកអភិវឌ្ឍវិស័យសារព័ត៌មានក្នុងសង្គមរបស់ពួកគេរៀងខ្លួន។

លោក Kim Byung Ho ប្រធានមូលនិធិសារព័ត៌មានកូរ៉េ (Korea Press Foundation) ដែលអញ្ជើញចូលរួមជាអធិបតីក្នុងកម្មវិធីបិទវគ្គសិក្សានិងចែកវិញ្ញាបនបត្របានថ្លែងថា៖« ខ្ញុំពិតជាអរគុណដែលអ្នកសារព័ត៌មានដែលបានអញ្ជើញចូលរួមដោយយកចិត្តទុកដាក់ក្នុងវគ្គសិក្សារយៈ៦សប្តាហ៍នេះហើយអ្វីដែលពិសេសនោះលោកអ្នកបានជួយផ្សព្វផ្សាយពីប្រទេសកូរ៉េនិងបង្កើនភាពជិតស្និទ្ធជាមួយសារព័ត៌មានកូរ៉េនិងប្រជាជនកូរ៉េទាំងមូលផង។ ខ្ញុំសង្ឃឹមថា អស់លោកនឹងពាំនាំយកបទពិសោធន៍ ចំណេះដឹងថ្មីៗ ទាក់ទិនវិស័យសារព័ត៌មានដែល ពេលនេះត្រលប់ទៅជួយអភិវឌ្ឍវិស័យព័ត៌មានក្នុងប្រទេសរបស់អ្នកវិញ។»

លោកក៏រំពឹងផងដែរថា រាល់អ្នកសារព័ត៌មានដែលបានចូលរួមនឹងដើរតួនាទីជាស្ពានដើម្បីភ្ជាប់ចំណងមិត្តភាពរវាងប្រទេសកួរ៉េជាមួយប្រទេសជាមិត្តដូចជាកម្ពុជាជាដើមឲ្យកាន់តែរឹងមាំនៅពេលខាងមុខ។

ក្នុងកម្មវិធីចែកវិញ្ញាបនបត្រនេះដែរ អ្នកសារព័ត៌មានដែលចូលរួមបានឡើងបង្ហាញពីបទពិសោធន៍ និងចំណេះដឹងដែលខ្លួនទទួលបានពីវគ្គសិក្សាស៊ីជម្រៅនេះ។ អ្វីដែលសំខាន់អ្នកសារព័ត៌មានទាំង ៨រូបបានប្តេជ្ញាថានឹងប្រើប្រាស់ចំណេះដឹងថ្មី និងបទពិសោធន៍ល្អៗទាក់ទិនវិស័យសារព័ត៌មាន ដើម្បីកែលម្អ និងជំរុញឲ្យវិស័យសារព័ត៌មានកាន់តែមានភាពប្រសើរឡើងនៅពេលខាងមុខ។

កម្មវិធីរយៈពេល ៦សប្តាហ៍ មានសារសំខាន់ខ្លាំងសម្រាប់អ្នកសារព័ត៌មាន ព្រោះកម្មវិធីនេះរួមមានទាំងការសិក្សាក្នុងថ្នាក់ជាមួយសាស្ត្រាចារ្យ និងអ្នកជំនាញ រួមជាមួយទស្សនកិច្ចសិក្សាទៅកាន់សា្ថប័នព័ត៌មាន និងស្ថាប័ននយោបាយធំៗ នៅក្នុងប្រទេសកូរ៉េ។ អ្នកចូលរួមមានឱកាសដកស្រង់ចំណេះដឹងថ្មីៗ និងចែករំលែកបទពិសោធន៍ពាក់ព័ន្ធនឹងវិស័យសារព័ត៌មាននិងវិស័យផ្សេងទៀតផងដែរ។

កម្មវិធីសិក្សាជំនាញសារព័ត៌មាននេះមិនត្រឹមតែជួយអ្នកសារព័ត៌មានពង្រីកចំណេះដឹងផ្នែកសារព័ត៌មានប៉ុណ្ណោះទេ តែវាក៏ផ្តល់ឱកាសសម្រាប់ការទទួលបាន ចំណេះដឹងផ្នែកវប្បធម៌ សង្គមសេដ្ឋកិច្ចនិងនយោបាយកូរ៉េផងដែរ។

អ្នកសារព័ត៌មានបរទេសដែលត្រូវបានជ្រើសរើសឲ្យចូលរួមមានចំនួន ៨រូប ក្នុងនោះមាន អ្នកសារព័ត៌មានមកពីស្ថាប័នព័ត៌មានដូចជា ទូរទស្សន៍ ABS-CBN ហ្វីលីពីន CNN ឥណ្ឌូនេស៊ី , The Nation ថៃ, ទីភ្នាក់ងារព័ត៌មានឡាវ (KPL), សារព័ត៌មានរដ្ឋ វៀតណាម Thanh Nien Daily, ទូរទស្សន៍ជាតិមីយ៉ាន់ម៉ា (MRTV), សារព័ត៌មានរដ្ឋអេហ្ស៊ីប (Egyptian Gazette) និងលោក សៅ ផលនិស្ស័យ អ្នកសារព័ត៌មានថ្មីៗ (www.thmeythmey.com) តំណាងឲ្យកម្ពុជា ។

សូមរម្លឹកថាកម្មវិធីសិក្សាផ្នែកសារព័ត៌មាន Kwanhun នេះ ត្រូវបានរៀបចំឡើងដំបូងបំផុតកាលពីឆ្នាំ ២០១២ ហើយកម្មវិធីនេះត្រូវរៀបចំឡើងជារៀងរាល់ឆ្នាំ។ អ្នកសារព័ត៌មានដែលចូលរួមត្រូវបាន ជ្រើសរើសមកពីប្រទេសដែលបានជួយជ្រោមជ្រែងកូរ៉េខាងត្បូងនៅសម័យសង្គ្រាម។ ហើយការផ្តល់ឱកាសដល់អ្នកសារព័ត៌មានដើម្បីរឹតបន្តឹងចំណងមិត្តភាព បង្កើនចំណេះដឹង និងទុកជាការដឹងគុណដល់ប្រទេសជាមិត្តដែលបានជួយជ្រោមជ្រែងប្រទេសកូរ៉េ៕