អូស្ត្រាលីផ្តល់ជំនួយ៣,៥លានដុល្លារអូស្ត្រាលីបន្ថែមដល់ប្រព័ន្ធផ្សព្វផ្សាយកម្ពុជា

ជាតិ

សង្គមជាតិ

អូស្ត្រាលីផ្តល់ជំនួយ៣,៥លានដុល្លារអូស្ត្រាលីបន្ថែមដល់ប្រព័ន្ធផ្សព្វផ្សាយកម្ពុជា

12, Nov 2015 , 8:19 pm

រូបភាព

ដោយ: ថ្មីៗ

រដ្ឋាភិបាលអូស្ត្រាលី បានសម្រេចបន្តផ្តល់ជំនួយលើប្រព័ន្ធផ្សព្វផ្សាយកម្ពុជា ក្នុងដំណាក់កាលទី២ ក្នុងគម្រោងជំនួយប្រព័ន្ធផ្សព្វផ្សាយ ជាកម្មវិធីមានមូលនិធិ៣,៥លានដុល្លាអូស្ត្រាលី សម្រាប់រយៈពេល៣ឆ្នាំ។

ពិធីចុះហត្ថលេខាទទួល និងផ្តល់ជំនួយត្រូវបានធ្វើឡើងនៅថ្ងៃទី១១ខែវិច្ឆិកា រវាងលោក ខៀវ កញារីទ្ធ រដ្ឋមន្ត្រីក្រសួងព័ត៌មាន និងលោកស្រី Alison Burrows ឯកអគ្គរដ្ឋទូតអូស្ត្រាលីប្រចាំកម្ពុជា។

នៅក្នុងពិធីចុះហត្ថលេខានោះ លោកស្រី Alison Burrows បានមានប្រសាសន៍ថា វិទ្យុនៅតែជាប្រភពដំណឹង និងព័ត៌មានដ៏សំខាន់សម្រាប់នៅកម្ពុជា ដែលពលរដ្ឋភាគច្រើនរស់នៅជនបទស្តាប់។

បើតាមលោកស្រី Alison Burrows ការផ្សព្វផ្សាយវិទ្យុ អាចឲ្យសាធារណជនធ្វើការពិភាក្សាបានទូលាយ និងរួមបញ្ចូលពីគុណភាពនៃការឆ្លើយតបនឹងការផ្តល់សេវាកម្មរបស់រដ្ឋ និងការផ្តល់ការទទួលស្គាល់កាន់តែប្រសើរឡើងនូវទស្សនៈ និងសំឡេងរបស់ប្រជាពលរដ្ឋ។ លោកស្រីបានបញ្ជាក់ទៀតថា ស្ថាប័នសោទស្សន៍អូស្ត្រាលីABC នឹងបន្តកិច្ចសហការជាមួយក្រសួងព័ត៌មាន ដើម្បីគាំទ្រការអភិវឌ្ឍប្រព័ន្ធផ្សព្វផ្សាយ និងការទទួលព័ត៌មាននៅខេត្តចំនួន៥ គឺខេត្តបាត់ដំបង កំពង់ចាម កំពត សៀមរាប និងខេត្តក្រចេះ។

លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានបញ្ជាក់ថាជំនួយរបស់រដ្ឋាភិបាលអូស្ត្រាលីសម្រាប់គាំទ្រការងារប្រព័ន្ធផ្សព្វផ្សាយ គឺជាទុនមួយសម្រាប់កម្ពុជា។ លោកសង្ឃឹមថា អូស្ត្រាលីនៅបន្តកិច្ចសហការគាំទ្រដល់អភិបាលកិច្ច និងជួយកសាងសមត្ថភាពរបស់មន្ទីរព័ត៌មាននៅខេត្តផ្សេងទៀតដែរ៕

ប្រភព៖AKP