ការបណ្តេញឧក្រិដ្ឋជនជាជនជាតិចិន១៦៨នាក់ គឺដើម្បីរក្សាសន្តិសុខកម្ពុជា

ជាតិ

សង្គមជាតិ

ការបណ្តេញឧក្រិដ្ឋជនជាជនជាតិចិន១៦៨នាក់ គឺដើម្បីរក្សាសន្តិសុខកម្ពុជា

12, Nov 2015 , 9:59 pm

រូបភាព

ដោយ: ម៉ៅ សុផា

ការបណ្តេញជនជាតិចិនចំនួន ១៦៨នាក់ ជាឧក្រិដ្ឋជន ពាក់ព័ន្ធនឹងការចាប់ជំរិនទារប្រាក់តាមប្រព័ន្ធទូរសព្ទ គឺដើម្បីរក្សាសន្តិសុខ សណ្តាប់ធ្លាប់សាធារណៈកម្ពុជា ដោយមិនពាក់ព័ន្ធនឹងបញ្ហានយោបាយអ្វីឡើង។ នេះជាការលើកឡើងរបស់លោក ស ខេង រដ្ឋមន្ត្រីក្រសួងមហាផ្ទៃ ក្នុងពីធីចែករំលែក បទពិសោធស្តីពីការងារដឹកនាំ និងគ្រប់គ្រងសន្តិសុខ សណ្តាប់ធា្នប់សាធារណៈសម្រាប់ការបោះឆ្នោត និងក្រោយពេលបោះឆ្នោតនៅកម្ពុជា នៅសាលាបណ្ឌិតសភានគរបាលកម្ពុជា នាពេលព្រឹកថ្ងៃទី១១ខែវិច្ឆិកា ម្សិលមិញ។

យោងតាមអគ្គស្នងការដ្ឋាននគរបាលជាតិ លោក ស ខេង រដ្ឋមន្ត្រីក្រសួងមហាផ្ទៃ បានអះអាងថា ការបណ្តេញឧក្រិដ្ឋជន ជាជនជាតិចិនតទាំង១៦៨នាក់ ទៅកាន់ប្រទេសចិនវិញនោះ គឺជាការអនុវត្តច្បាប់អន្តោប្រវេសន៍កម្ពុជា ដោយមិនពាក់ព័ន្ធនឹងបញ្ហានយោបាយអ្វីឡើយ។ លោកបញ្ជាក់យ៉ាងនេះថា៖ «ជនសង្ស័យទាំងនោះ បើកម្ពុជា មិនចាត់វិធានការបង្ក្រាបឲ្យទាន់ពេលពេលនោះទេ វានឹងធ្វើឲ្យប៉ះពាល់ដល់សន្តិសុខជាតិ និងប៉ះពាលដល់ការវិនិយោគទុនបរទេស ព្រមទាំងសេដ្ឋកិច្ចជាតិផងដែរ»។

ពាក់ព័ន្ធនឹងបញ្ហានេះផងដែរ លោក ខៀវ សុភ័ក្រ អ្នកពាក្យក្រសួងមហាផ្ទៃ បានថ្លែងប្រាប់សារព័ត៌មានថ្មីៗថា ការចាំបញ្ជូនជនជាតិចិនទៅស្រុកកំណើតនេះ គឺធ្វើទៅតាមច្បាប់អន្តោប្រវេសន៍កម្ពុជា នឹងនីតិវិធីត្រឹមត្រូវ។ លោកបញ្ជាក់បែបនេះថា៖ «បើយើងមិនដេញពួកគេទៅស្រុកកំណើតវិញទេ កម្ពុជាអាចមានអសន្តិសុខក្នុងប្រទេស»។

ក្រោយពីឃាត់ខ្លួនជនជាតិចិនទាំងនោះ នៅថ្ងៃទី៣១ ខែតុលា ឆ្នាំ២០១៥ លោក អ៊ុក ហៃសីលា ប្រធាននាយកដ្ឋានស៊ើបអង្កេត និងអនុវត្តិនីតិវិធី នៃអគ្គនាយកដ្ឋានអន្តោប្រវេសន៍ បានបញ្ជាក់ប្រាប់សារព័ត៌មានថ្មីៗថា ជនជាតិចិនទាំង ១៦៨នាក់ បានជាប់ពាក់ព័ន្ធពីបទជំរិតទារប្រាក់តាមប្រព័ន្ធទូរសព្ទ ហើយត្រូវបានសមត្ថកិច្ចឃាត់ខ្លួន នៅសង្កាត់៣ ក្រុងព្រះសីហនុ ខេត្តព្រះសីហនុ ។ ប្រធាននាយកដ្ឋានរូបនេះបន្ថែមទៀតថា ជនល្មើសទាំងនេះរស់នៅក្នុងផ្ទះវិឡា១ និងសណ្ឋាគារ១ ដោយទាក់ទងគ្នាតាមប្រព័ន្ធទូរសព្ទក្នុងការចាប់ជំរិត ប៉ុន្តែពួកគេមិនជំរិតជនជាតិខ្មែរ ឬជនជាតិណាផ្សេងឡើយ គឺជំរិតតែជនជាតិចិនដូចគ្នាប៉ុណ្ណោះ។ ក្រោយពីឃាត់ខ្លួន សមត្ថកិច្ចប្រមូលបានទូរសព្ទលើតុចំនួន២០០គ្រឿង និងទូរសព្ទដៃជាង២០០គ្រឿងទៀត។ កាលពីថ្ងៃទី១០ វិច្ឆិកា ម្សិលមិញ អាជ្ញាធរកម្ពុជា សហការជាមួយអាជ្ញាធរចិន បញ្ជូនជនជាតិទាំងនោះទៅស្រុកកំណើតវិញ៕