អន្តរជាតិ
កម្ចាត់សហាយស្មន់ ជាមុខរបរថ្មីនៅប្រទេសចិន
× កម្ចាត់ជនទីបីពីផ្លូវអាពាហ៍ពិពាហ៍ គឺជាមុខរបរថ្មីសន្លាងមួយនៅចិន។ មុខរបរនេះបានរីករាលដាលក្នុងប្រទេសនេះ ដោយសារតែអត្រាលែងលះកើនឡើងឥតឈប់ឈរ ហើយមូលហេតុសំខាន់ដែលធ្វើឲ្យចំណងប្តីប្រពន្ធត្រូវបែកបាក់នេះ គឺដោយសារតែ « ជនទីបី » ចូលមកជ្រៀតជ្រែក។
អត្រានៃការលែងលះនៅចិនបានកើនឡើង ៥ ដង ក្នុងរយៈពេលជាង ១៤ ឆ្នាំមកនេះ។ មិនតែប៉ុណ្ណោះ ៥០ % នៃចំណងអាពាហ៍ពិពាហ៍បែកបាក់នេះគឺដោយសារតែ « សហាយ » ឬ « ជនទីបី »។ ជាមួយនឹងអត្រាដ៏ខ្ពស់នៃភាពមិនស្មោះត្រង់រវាងប្តី-ប្រពន្ធ ក្រុមហ៊ុនជំនាញ « សង្គ្រោះអាពាហ៍ពិពាហ៍ » ឬអាចហៅម្យ៉ាងទៀតថា « កម្ចាត់ជនទីបី »ចេះតែកើនឡើងជាបន្តបន្ទាប់ ដោយបង្កើតឡើងជាដំបូងនៅ Chengdu និង Shenzhen នៃទីក្រុងសៀងហៃ។
ក្រុមហ៊ុនទាំងនេះផ្តល់ជូនអតិថិនជននូវការប្រឹក្សាជាមួយមេធាវី អ្នកជំនាញផ្នែកចិត្តសាស្ត្រ និងអ្នកឯកទេសផ្សេងៗទៀត ទៅតាមតម្រូវការរបស់អតិថិជន។ លោក Luo Rong ម្ចាស់ក្រុមហ៊ុនជំនាញកម្ចាត់ជនទីបីមួយរូបបានបញ្ជាក់ថា ពេលនេះ ក្រុមហ៊ុនរបស់លោកយកថ្លៃសេវាកម្មសម្រាប់ការផ្សះផ្សាប្តីប្រពន្ធមួយករណី ប្រមាណពី ១ ៥០០ ទៅ ១ ៨០០ ដុល្លារ។ ដោយហេតុថា វាមិនមែនជាការងាយស្រួលទេក្នុងការកម្ចាត់ជនទីបី។ ជួនកាល គេត្រូវប្រើពេល ៣-៤ ខែទើបអាចដកបន្លានោះចេញពីផ្លូវអាពាហ៍ពិពាហ៍បាន។
វិធីសាស្ត្រក្នុងការកម្ចាត់នោះគឺ ជាដំបូង បុគ្គលិករបស់លោកត្រូវចូលទៅទាក់ទងជាមួយជនទីបីនោះជាមុនសិន ពោលគឺត្រូវធ្វើយ៉ាងណាឲ្យក្លាយទៅជាមិត្តរបស់ជននោះ ទើបអាចយល់ច្បាស់ពីហេតុផលដែលជននោះទាក់ទងជាមួយប្តី ឬប្រពន្ធរបស់អតិថិជន។ បន្ទាប់មក ទើបឈានដល់ការបញ្ចុះបញ្ចូល ឬប្រើល្បិចកលផ្សេងៗទៅតាមស្ថានការណ៍ជាក់ស្តែង។ ប៉ុន្តែ ទោះជាយ៉ាងណា វិធីទាំងនោះគឺជាវិធីដ៏ត្រឹមត្រូវ មិនមែនជាអំពើគំរាមកំហែងអ្វីនោះទេ។ សកកម្មត្រូវចាត់ទុកថា ជោគជ័យ ក្នុងករណីដែលប្តី ឬប្រពន្ធលែងទៅរកជនទីបីនោះក្នុងអំឡុងពេល ៣ ឬ ៤ ខែ៕
© រក្សាសិទ្ធិដោយ thmeythmey.com