ជាតិ
សង្គមជាតិ
កម្ពុជាធ្វើសៀវភៅស China Ready ទាក់ទាញទេសចរចិន
× ភ្នំពេញ៖ កម្ពុជាកំពុងរៀបចំសេចក្តីព្រាងសៀវភៅសស្តីពី ការត្រៀមលក្ខណៈសម្បត្តិទទួលទេសចរចិន (China Ready ឬ Be Ready for China Ready) សម្រាប់ទាក់ទាញភ្ញៀវទេសចរចិនបន្ថែមទៀតឲ្យមកទស្សនាកម្ពុជា។ នេះបើតាមការបញ្ជាក់របស់លោក ថោង ខុន។
សៀវភៅសស្តីពី ការត្រៀមលក្ខណៈសម្បត្តិទទួលទេសចរចិន (China Ready) ក្នុងគោលដៅតាមដាន និងជំរុញកំណើនទីផ្សារទេសចរចិន និងស្ថានភាពឧស្សាហកម្មទេសចរនៅកម្ពុជា។ រដ្ឋមន្ត្រីក្រសួងទេសចរណ៍លោក ថោង ខុន និយាយក្នុងកិច្ចប្រជុំបូកសរុបលទ្ធផលការងារ កំណែទម្រង់របស់ក្រសួងទេសចរណ៍ រយៈពេល ៩ខែ ឆ្នាំ២០១៥ និងទិសដៅអនុវត្តបន្ត នៅកាលពីថ្ងៃទី១០ វិច្ឆិកានេះ ថា សេចក្តីព្រាងសៀវភៅស ជាយុទ្ធសាស្ត្រត្រៀមទទួលទេសចរចិននេះ គឺផ្តោតលើការកំណែទម្រង់ផ្នែកទេសចរណ៍ដែលបម្រើឲ្យសេចក្តីត្រូវការសេវាកម្មរបស់ភ្ញៀវទេសចរណ៍ចិន និងធ្វើឲ្យកម្ពុជាក្លាយជាគោលដៅទេសចរណ៍របស់ចិន។
លោកថ្លែងយ៉ាដូច្នេះថា៖«បើមានសៀវភៅសនេះ បានវាជាខួរក្បាលសម្រាប់យើងទាំងអស់គ្នាតែម្តង ហើយយើងធ្វើព្រមៗគ្នាទៅបាន។ សៀវភៅសនេះ ត្រូវទទួលស្គាល់ពីរាជរដ្ឋាភិបាល។ ព្រោះ បើយើងមិនទៅ យើងដើរមិនទាន់គេទេ។ ហើយយើងនឹងបន្តពិភាក្សាគ្នាបន្ថែមទៀត»។
បើតាមរដ្ឋមន្ត្រីក្រសួងទេសចរណ៍ សៀវភៅស នឹងសម្រួលភាពងាយស្រួលដល់ទេសចរចិន ក្នុងការទទួលបានព័ត៌មានទេសចរណ៍មកទស្សនាកម្ពុជា ពីព្រោះរាល់សេវាកម្មឧស្សាហកម្មទេសចរណ៍នៅកម្ពុជាសរសេរជាភាសាខ្មែរ ចិន និងភាសាអង់គ្លេស រួមមាន សេវាកម្មម្ហូបអាហារ និងភេសជ្ជៈ សេវាកម្មស្នាក់នៅ សេវាកម្មដឹកជញ្ជូន តំបន់ឆ្នេរ ការកម្សាន្ត និងហាងលក់ទំនិញផ្សេងៗ ។ ជាមួយគ្នានេះ ក្រសួងនឹងរៀបចំប្រព័ន្ធ Hot line ជាភាសាចិន ឯកសារអន្តោប្រវេសន៍ជាភាសាចិន បង្កើតគេហទំព័រ និង Mobile App China Ready ដែលទទួលស្គាល់ដោយក្រសួងទេសចរណ៍ សម្រាប់បង្កលក្ខណៈងាយស្រួលដល់ទេសចរណ៍ជនជាតិចិន ស្វែងរកព័ត៌មានពីសេវាកម្មឧស្សាហ៍កម្មទេសចរណ៍នានា នៅកម្ពុជា។
ក្រៅពីនេះ លោក ថោង ខុន និយាយ កម្ពុជាក៏នឹងត្រៀមបង្កើតមជ្ឈមណ្ឌលទ្រទ្រង់ China Ready សម្រាប់ទេសចរណ៍កម្ពុជា (Center of China Ready For Cambodia Tourism) ទៀតផង។
គួរបញ្ជាក់ផងដែរ បើតាមរបាយការណ៍ផែនការកំណែទម្រង់វិស័យទេសចរណ៍កម្ពុជា ឆ្នាំ ២០១៥ ដល់ ២០១៨ របស់ក្រសួងទេសចរណ៍ កាលពីឆ្នាំ២០១៤ កន្លងទៅនេះ កម្ពុជាទទួលបានភ្ញៀវទេសចរបរទសចំនួន ៤លាន៥សែននាក់ និងចំណូលពីវិស័យទេសចរណ៍ជិត ៣ពាន់លានដុល្លារអាមេរិកចូលថវិការរដ្ឋ ហើយវាបានបង្កើតឱកាសការងារដល់ពលរដ្ឋជាង ៦២ម៉ឺននាក់។ ជាងនេះទៀត ក្រសួងទេសចរណ៍ ព្យាករណ៍ថា នៅឆ្នាំ ២០២០ ភ្ញៀវទេសចរណ៍បរទេសមកកម្ពុជានឹងកើនដល់ ៧,៥លាននាក់ និងនាំចំណូលប្រមាណ ៥ពាន់លានដុល្លាអាមេរិកចូលថវិការដ្ឋ ហើយបង្កើតឱកាសការងារបានជិត ១លាននាក់៕
© រក្សាសិទ្ធិដោយ thmeythmey.com