កុមារក្រីក្រក្នុងក្រុងសៀមរាបទទួលបានកង់ពីធនាគារ អ អេច ប៊ី ឥណ្ឌូឆៃណា

ជាតិ

សង្គមជាតិ

កុមារក្រីក្រក្នុងក្រុងសៀមរាបទទួលបានកង់ពីធនាគារ អ អេច ប៊ី ឥណ្ឌូឆៃណា

15, Nov 2015 , 10:22 am

រូបភាព

ដោយ: សារព័ត៌មានថ្មីៗ

សៀមរាប៖ កុមារក្រីក្រចំនួន១០០នាក់ ដែលសិក្សានៅសាលាបឋមនិងវិទ្យាល័យក្នុងក្រុងសៀមរាប ទទួលបានកង់ម្នាក់មួយគ្រឿងពីធនាគារ អ អេច ប៊ី ឥណ្ឌូឆៃណា (RHB Indochina)។ កុមារក្រីក្រទាំងនោះ សព្វថ្ងៃកំពុងសិក្សានៅវិទ្យាល័យ ហ៊ុន សែន វត្តស្វាយ និងសាលាបឋមសិក្សា ទួលរវៀង។

នៅព្រឹកថ្ងៃអាទិត្យនេះ ពិធីចែកកង់ដល់សិស្សក្រីក្រ បានរៀបចំឡើងនៅបរិវេណវិទ្យាល័យ ហ៊ុន សែន វត្តស្វាយ ដែលមានលោកគ្រូ អ្នកគ្រូ សិស្ស អាណាព្យាបាល ថ្នាក់គ្រប់គ្រង និងបុគ្គលិកធនាគារ អ អេច ប៊ី ប្រមាណជិត២០០នាក់ចូលរួម។

នាយកសាលាវិទ្យាល័យ ហ៊ុន សែន វត្តស្វាយ លោក ភិន សុវណ្ណារិទ្ធ បាននិយាយថា សិស្សភាគច្រើនដែលកំពុងសិក្សានៅវិទ្យាល័យរបស់លោក គឺមានជីវភាពក្រីក្រ។ លោកបន្តថា ពួកគេភាគច្រើនខ្វះមធ្យោបាយធ្វើដំណើរ និងមានទីលំនៅឆ្ងាយពីសាលារៀនជាដើម។ លោក សុវណ្ណារិទ្ធ បានអរគុណដល់ធនាគារ អ អេច ប៊ី ចំពោះការឧបត្ថម្ភកង់ទាំង១០០គ្រឿង ហើយលោកសង្ឃឹមថា វប្បធម៌ចែករំលែកនេះ នឹងមានជាបន្តបន្ទាប់ទៀត។

អគ្គនាយកធនាគារ អ អេច ប៊ី លោក Lim Long Seng បានរម្លឹកពីប្រវត្តិកកើតរបស់ធនាគារ នៅក្នុងប្រទេសកម្ពុជា។ ក្រោយពីចាប់ផ្តើមបើកដំណើរតាំងពីឆ្នាំ២០០៨ បច្ចុប្បន្នធនាគារបានពង្រីកសាខារហូតដល់ ១០សាខាទូទាំងប្រទេស ជាមួយនឹងការរីកចម្រើន គួរឲ្យកត់សម្គាល់។ លោក Lim Long Seng បញ្ជាក់ថា ដោយសារតែការរីកចម្រើនរបស់ធនាគារនេះហើយ ធ្វើឲ្យធនាគារត្រូវបែងចែកពេលវេលាកាន់តែច្រើន ដើម្បីជួយកុមារក្រីក្រនៅកម្ពុជា ក្នុងបំណងរួមចំណែកអភិវឌ្ឍសង្គម។

កម្មវិធីនៅព្រឹកថ្ងៃទី១៥ វិច្ឆិកានេះ សិស្សានុសិស្ស ព្រមទាំងបុគ្គលិកនៃធនាគារ អ អេច ប៊ី ក៏បានចូលរួមសំអាតបរិស្ថាននៅក្នុងបរិវេណសាលាវិទ្យាល័យ ហ៊ុន សែន វត្តស្វាយផងដែរ មុនពិធីចែកកង់ និងសម្ភារសិក្សាដល់កុមារក្រីក្រទាំង១០០នាក់។ ពិធីនេះដែរ គឺជាកិច្ចសហការរវាង ធនាគារ អ អេច ប៊ី និងក្លឹបអ្នកជិះកង់ដើម្បីសហគមន៍។ គួរបញ្ជាក់ថា សិស្សវិទ្យាល័យ ហ៊ុន សែន វត្តស្វាយ មានចំនួន ១៥២៧នាក់ ក្នុងនោះស្រី ៧៥៣នាក់ ភាគច្រើនជាសិស្សក្រីក្រ៕