អន្តរជាតិ
ប្រេស៊ីល ៖ សត្វកណ្តុរមួយក្បាលត្រូវអ្នកទោសចិញ្ចឹម ឲ្យនាំគ្រឿងញៀននៅក្នុងគុ
×
សត្វកណ្តុរមួយក្បាលត្រូវមន្ត្រីប៉ូលិសប្រេស៊ីលរកឃើញថា បានដឹកជញ្ជូនគ្រឿងញៀន និងរបស់ផ្សេងៗទៀតឲ្យអ្នកទោសពីបន្ទប់មួយទៅបន្ទប់មួយ នៅក្នុងពេលចុះត្រួតពិនិត្យក្នុងមន្ទីរឃុំឃាំងមួយនៅរដ្ឋ Tocantins ដែលស្ថិតនៅភាគខាងជើងនៃប្រទេសនេះ។
សត្វកណ្តុរនេះស៊ាំជាមួយមនុស្សណាស់។ គេថែមទាំងអាចប៉ះអង្អែលក្បាលវាបានទៀតផង។ សត្វកកេរនេះបានទាក់ទាញចំណាប់អារម្មណ៍របស់ប៉ូលិស ដោយសារតែមានខ្សែយ៉ាងវែងចងភ្ជាប់នឹងកន្ទុយរបស់វា។ ប៉ូលិសបានតាមដានមើលសកម្មភាព ហើយក៏ឃើញសត្វមួយក្បាលនេះរត់ទៅកាន់អគារ A បន្ទាប់មកទៅអគារ C ។ ក្រុមអ្នកទោសបានបន្សុំាសត្វកណ្តុរនេះ ដើម្បីដឹកជញ្ជូនគ្រឿងញៀន និងវត្ថុចាំបាច់ផ្សេងៗទៀតដូចជា ស៊ីមកាតទូរស័ព្ទជាដើម។ នៅពេលដែលសត្វកកេរនេះរត់ទៅដល់គោលដៅ អ្នកទោសនឹងស្រាយយករបស់ដែលចងភ្ជាប់នឹងកន្ទុយរបស់វា។
នៅក្នុងការត្រួតពិនិត្យនេះ គ្រឿងញៀនជាច្រើនប្រភេទត្រូវបានរកឃើញនៅក្នុងមន្ទីរឃុំឃាំង។ ក្នុងករណីនេះ ប៉ូលិសនឹងពិនិត្យមើលកាមេរ៉ាសុវត្ថិភាព ដើម្បីស្វែងរកម្ចាស់សត្វកណ្តុរ។ រីឯសត្វកកេរនេះវិញ វាត្រូវបានគេព្រលែងនៅក្រៅមន្ទីរឃុំឃាំង បើទោះបីជាវាជាប់ពាក់ព័ន្ធនឹងការដឹកជញ្ជូនគ្រឿងញៀនឲ្យអ្នកទោសក៏ដោយ៕
© រក្សាសិទ្ធិដោយ thmeythmey.com