ជាតិ
សង្គមជាតិ
កម្ពុជាបណ្តេញបរទេសខុសច្បាប់៤៣១២នាក់ ក្នុងរយៈពេល១១ខែ នាឆ្នាំ២០១៥នេះ
× ជនអន្តោប្រវេសន៍ខុសច្បាប់ចំនួន៤៣១២នាក់ ត្រូវបានអាជ្ញាធរកម្ពុជាឃាត់ខ្លួននិងបណ្តេញចេញ ដោយគិតត្រឹមខែមករា ដល់ខែវិច្ឆិកា ឆ្នាំ២០១៥ ។ ក្នុងចំណោមជនបរទេសទាំងនោះជនជាតិវៀតណាមមានចំនួនច្រើនជាងគេ ដែលមានរហូតដល់ ៣៨៨០នាក់។ នេះបើតាមរបាយការណ៍ពីនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ។
ជនបរទេសខុសច្បាប់៤៣១២នាក់ (ស្រី៥៥៣នាក់) មានចំនួន៤៨សញ្ជាតិ ត្រូវបានសមត្ថកិច្ចអន្តោប្រវេសន៍ឃាត់ខ្លួននិងបញ្ជូនទៅស្រុកកំណើតវិញ ដោយគិតត្រឹម១១ខែ គឺចាប់ពីខែមករា ដល់ខែវិច្ឆិកា ក្នុងឆ្នាំ២០១៥នេះ។
លោក អ៊ុក ហៃសីលា ប្រធាននាយកដ្ឋានស៊ើបអង្កេតនិងអនុវត្តនីតិវិធី បានមានប្រសាសន៍ថា ក្នុងចំណោមជនអន្តោប្រវេសន៍ទាំងនោះ អន្តោប្រវេសន៍វៀតណាមចំនួន៣៨៨០នាក់ (ស្រី១១៥នាក់)។ លោកបន្ថែមថា ចំពោះជនជាតិវៀតណាម ភាគច្រើនប្រកបមុខរបរជាជាងឈើ ជាងសំណង់ ជាងដែន និងជាងកែច្នៃផ្សេងៗ ហើយខ្លះទៀតក៏មានមុខរបរខ្លួនឯងដែរ ដូចជាបើកហាងលក់កាហ្វេ លក់បាយ ជាដើម។ ជាងនេះទៅទៀត ជនជាតិវៀតណាមខ្លះទៀត ក៏ធ្វើជាអ្នកម៉ាស្សា និងធ្វើការក្នុងហាងខារ៉ាអូខេផងដែរ»។
សូមបញ្ជាក់ថា ក្នុងឆ្នាំ២០១៤ ជនអន្តោប្រវេសន៍សរុបចំនួន១៣០៧ (ស្រី២៧៧នាក់) មាន២៤សញ្ជាតិ ដែលត្រូវបានឃាត់ខ្លួននិងបណ្តេញចេញពីកម្ពុជា។ ចំពោះជនបរទេសខុសច្បាប់ ក្នុងឆ្នាំ២០១៤ ជនជាតិវៀតណាមមានរហូតដល់ចំនួន១០១៥នាក់ (ស្រី២៤៥នាក់)៕
© រក្សាសិទ្ធិដោយ thmeythmey.com