តំបន់ស្នូលព្រែកទាល់ ក្លាយជាតំបន់អភិរក្សរ៉ាមសារទី៤ នៅកម្ពុជា

ជាតិ

សង្គមជាតិ

តំបន់ស្នូលព្រែកទាល់ ក្លាយជាតំបន់អភិរក្សរ៉ាមសារទី៤ នៅកម្ពុជា

02, Dec 2015 , 8:19 pm

រូបភាព

ដោយ:

ភ្នំពេញ៖ រដ្ឋាភិបាលកម្ពុជា និងលេខាធិការដ្ឋានរ៉ាមសា បានប្រកាសដាក់បញ្ជូលតំបន់ស្នូល ព្រែកទាល់ គ្របដណ្តប់លើផ្ទៃដី ២១៣៤២ ហិកតា ដែលជាតំបន់ជម្រកពងកូនសត្វស្លាបទឹកធំជាងគេ នៅតំបន់អាស៊ីអាគ្នេយ៍នៃបឹងទន្លសាប ទៅជាតំបន់ដីសើមដែលមានសារៈសំខាន់ជាអន្តរជាតិ។ តំណាងអង្គការសត្វស្លាបចង់ឃើញ តំបន់ស្នួលព្រែកទាល់ក្លាយជាតំបន់អច្ឆរិយធម្មជាតិ នៃប្រទេសកម្ពុជា។ នេះបើតាមសេចក្តីប្រកាសព័ត៌មានរបស់ក្រសួងបរិស្ថាន ចុះថ្ងៃទី២ ធ្នូ ឆ្នាំ ២០១៥នេះ។

បើតាមប្រកាសព័ត៌មានក្រសួងបរិស្ថាន មូលហេតុដែលរដ្ឋាភិបាលសម្រេចបញ្ជូលតំបន់ស្នូល ព្រែកទាល់ ជាតំបន់រ៉ាមសារ ពីព្រោះតំបន់នេះ ជាជម្រកសត្វស្លាបធំតែមួយគត់ នៅអាស៊ីអាគ្នេយ៍ ហើយសត្វប្រភេទទុងប្រផេះបន្តពូជ និងសត្វត្រដក់ធំជិតពាក់កណ្តាលនៃ ចំនួនសត្វលើពិភពលោក ព្រមទាំងអំបូររនោល និងស្មោញរាប់ពាន់ក្បាលផងដែរ កំពុងរស់នៅ និងបន្តពូជ នៅទីនោះ។

ក្រសួងបរិស្ថានបញ្ជាក់ថា៖«មកទល់ពេលនេះ សត្វស្លាបទឹកជាង ៥ម៉ឺនក្បាល ក្នុងនោះ សត្វស្លាបចំនួន ១០ប្រភេទ ដែលកំពុងទទួលការគំរាមកំហែងលើ ពិភពលោកកំពុងបន្តពូជ នៅក្នុងតំបន់ស្នូលព្រែកទាល់។ ហើយវាក៏ជាតំបន់ទ្រទ្រង់ដល់ការរស់នៅ របស់ត្រីនៅបឹងទន្លេសាបយ៉ាងសម្បើមផងដែរ»។

ក្រៅពីជាតំបន់រអភិរក្សសត្វស្លាប ក្រសួងបានបញ្ជាក់ផងដែរថា តំបន់រ៉ាមសារព្រែកទាល់ បាន និងកំពុងទាក់ទាញភ្ញៀវទេសចររាប់ពាន់នាក់ចូលទស្សនាក្នុងមួយឆ្នាំៗ។

ប្រធានអង្គការសមាគមន៍អភិរក្សសត្វព្រៃ (WCS) ប្រចាំកម្ពុជា លោក Ross Sinclair មានមោទនភាពចំពោះកម្ពុជាដែល បានដាក់បញ្ជូលរតំបន់ព្រែកទាល់ជាតំបន់ដីសើមដែល មានសារៈសំខាន់ជា

អន្តរជាតិ។ លោកនិយាយថា៖«ការដាក់បញ្ជូលនេះ ជាការទទួលស្គាល់ នូវកិច្ចខិតខំប្រឹងប្រែងអភិរក្ស ដែលបានធ្វើឡើងដោយមានកិចច្ចសហការរវាងរាជរដ្ឋាភិបាលកម្ពុជា សហគមន៍ និងអង្គការមិនមែនរដ្ឋាភិបាល ហើយវាក៏ជាការបើកផ្លូវសម្រាប់កិច្ចសហការរបៀបនេះ ជាច្រើនឆ្នាំទៅមុខទៀត ដើម្បីស្តារ និងការពារតំបន់ស្នួលព្រែកទាល់ឲ្យក្លាយជាតំបន់អច្ឆរិយធម្មជាតិ នៃប្រទេសកម្ពុជា»។

ជាមួយគ្នាដែរ លោក Lew Young ទីប្រឹក្សាជាន់ខ្ពស់នៃលេខាធិការដ្ឋានអនុសញ្ញារ៉ាមសារ ប្រចាំអាស៊ី និងអូសេអានី បានសាទររដ្ឋាភិបាលដែលបានដាក់បញ្ចូលតំបននេះ ជាតំបន់រ៉ាមសារ។ លោកថា៖«យើងនឹងបន្តគាំទ្ររដ្ឋាភិបាលក្នុងការគ្រប់គ្រងតំបន់រ៉ាមសារទាំងនេះ សម្រាប់បម្រើប្រយោជន៍ ប្រជាសហគមន៍ និងបរិស្ថាន»។

រដ្ឋមន្ត្រីក្រសួងបរិស្ថាន លោក សាយ សំអាល់ កត់សម្គាល់បន្ថែមថា ការទទួលស្គាល់តំបន់ស្នួលព្រែកទាល់ ជាតំបន់រ៉ាមសារ មិនត្រឹមតែផ្តោតទៅលើភាពសំខាន់ជាអន្តរជាតិ នៃតំបន់ដី សើមនេះប៉ុណ្ណោះទេ តែវានឹងជាស្ពានសម្រាប់កម្ពុជាដាក់បញ្ជូលតំបន់ដីសើមច្រើនទៀត ទៅជាតំបន់រ៉ាមសារ នាពេលអនាគត»។

គួរបញ្ជាក់ថា ប្រទេសហត្ថលេខីនៃអនុសញ្ញារ៉ាមសានីមួយៗ ត្រូវដាក់បញ្ចូលតំបន់ដីសើម មួយយ៉ាងតិច ទៅក្នុងបញ្ជីតំបន់ដីសើមដែលមានសារសំខាន់ជាអន្តរជាតិ ហើយតំបន់ ទាំងនោះ ត្រូវបានជ្រើសរើសដោយផ្អែកលើភាពសំខាន់ជាអន្តរជាតិ នៃអេកូឡូស៊ី រុក្ខសាស្ត្រ សត្វសាស្ត្រ បឹងសាស្ត្រ ឬជលសាស្ត្រ។ បច្ចុប្បន្ននេះ តំបន់រ៉ាមសារមានជាង ២២៤០កន្លែង នៅទូទាំងពិភពលោក។

គួរបញ្ជាក់ផងដែរ បើតាមសេចក្តីប្រកាសព័ត៌មានក្រសួងបរិស្ថាន តំបន់ស្នូលព្រែកទាល់ ជាតំបន់ រ៉ាមសារទី៤ ត្រូវបានរដ្ឋាភិបាលចេញអនុក្រឹត្យប្រកាសទទួល ស្គាល់កាលពីថ្ងៃទី០២ ខែតុលា ឆ្នាំ២០១៥ ។ តំបន់ រ៉ាមសារនៅកម្ពុជាផ្សេងទៀត រួមមាន តំបន់រ៉ាមសារបឹងឆ្មា និងប្រព័ន្ធព្រែក តំបន់កោះកាពី និងតំបន់រ៉ាមសារស្ទឹងត្រែង៕