ជាតិ
សង្គមជាតិ
លោក ហ៊ុន សែន៖ ជនពិការជាធនធានមិនអាចខ្វះបានសម្រាប់អភិវឌ្ឍន៍ប្រទេស
×
នៅថ្ងៃទី៣ ខែធ្នូនេះគឺជាទិវាជនពិការកម្ពុជាលើកទី១៧ និងជនពិការអន្តរជាតិ៣៣ ។ «រួមគ្នាបង្កលក្ខណៈងាយស្រួលដលើម្បីជនពិការ ដើម្បីបរិស្ថានគ្មានពិការភាព» គឺជាប្រធានបទនៃទិវាជនពិការនៅឆ្នាំ២០១៥នេះ។ នៅក្នុងទិវានេះ លោក នាយករដ្ឋមន្ត្រីហ៊ុន សែន បានអំពាវនាវ ឲ្យបងប្អូនជនរួមជាតិទាំងអស់ ផ្តល់ការគាំទ្រដោយគ្មានការរើសអើងចំពោះជនពិការ ដែលជាធនធានមិនអាចមើលរំលងបាន ក្នុងការចូលរួមអភិវឌ្ឍន៍ប្រទេសជាតិ។
លោក នាយករដ្ឋមន្ត្រីបានបញ្ជាក់ថា ការប្រារព្ធពិធីនេះគឺជាការបង្ហាញអំពីឆន្ទៈ និងការប្តេជ្ញាចិត្តរបស់រាជរដ្ឋាភិបាល ក្នុងការលើកកម្ពស់សិទ្ធិសេរីភាព និងសុខុមាលភាពជនពិការ។ លោក ក៏មិនភ្លេចលើកឡើងពីសមិទ្ធផលដែលរដ្ឋាភិបាលសម្រេចបានក្នុងការវិស័យពិការភាពឡើយ តាមរយៈការជំរុញឲ្យមានការចូលរួម ពីស្ថាប័នរដ្ឋ វិស័យឯកជន សង្គមស៊ីវិល និងដៃគូអភិវឌ្ឍន៍នានា ដើម្បីគាំទ្រដល់ការអភិវឌ្ឍប្រកបដោយចីរភាពសម្រាប់កម្ពុជាគ្រប់រូប។
បើតាមលោកនាយករដ្ឋមន្ត្រី ជនពិការក្រីក្រនៅតាមសហគមន៍ បាន និងកំពុងទទួលបាននូវផលប្រយោជន៍ តាមរយៈការអនុវត្តការផ្តល់របបគោលនយោបាយ ដើម្បីចូលរួមចំណែកអនុវត្តន៍យុទ្ធសាស្ត្រជាតិ និងគោលនយោបាយជាតិនានា ដែលទាក់ទងនឹងការកាត់បន្ថយភាពក្រីក្រ។ លើសពីនេះកុមារពិការ ក៏ទទួលបានឱកាសសម្រាប់ការអប់រំនៅតាមសាលារៀនសាធារណៈដោយគ្មានការរើសអើង និងទទួលបានព័ត៌មានយ៉ាងទូលាយ តាមរយៈការបង្កើតឲ្យមានអក្សរស្ទាប និងភាសាសញ្ញាសម្រាប់ជនពិការភ្នែក និងគថ្លង់ ការបកប្រែជាសញ្ញាភាសានៅតាមកម្មវិធីទូរទស្សន៍។ អាគារសិក្សាមួយចំនួនបានរៀបចំឲ្យមានជម្រាលសម្រាប់សិស្សពិការ មជ្ឈមណ្ឌល និងសាលាសម្រាប់កុមារពិការភ្នែក និងគថ្លង់ក៏ត្រូវបានអភិវឌ្ឍន៍ដើម្បីឲ្យពួកគេមានឱកាសទទួលបានការអប់រំរហូតដល់ថ្នាក់ឧត្តមសិក្សា។ ជាមួយគ្នានោះយុវជនពិការ ក៏ត្រូវបានលើកទឹកចិត្តឲ្យចូលរួមប្រកួតប្រជែងជាសាកល ជាមួយយុវជនពិការក្នុងតំបន់ និងពិភពលោក។
ដើម្បីរួមចំណែកគាំទ្រទិវាជនពិការកម្ពុជា និងទិវាជនពិការអន្តរជាតិ ប្រមុខរដ្ឋាភិបាលកម្ពុជា ក៏បានអំពាវនាវឲ្យគ្រប់ក្រសួង ស្ថាប័នរដ្ឋ ក៏ដូចវិស័យឯកជន ត្រូវបន្តលើកទឹកចិត្តដល់ជនពិការដែលមានសមត្ថភាពចូលបំពេញការងារ។ ក្រសួង ស្ថាប័រដ្ឋក៏ត្រូវបន្តជំរុញឲ្យមានការលើកតម្កើងជីវភាពរស់នៅរបស់ជនពិការនៅតាមសហគមន៍ជាពិសេសការការពារផលប្រយោជន៍ដ៏ឧត្តុង្គឧត្តម ការទប់ស្កាត់ ការកាត់បន្ថយ និងការលុបបំបាត់ការរើសអើងជនពិការ ព្រមទាំងការស្តារលទ្ធភាពពលកម្មកាយសម្បទា សតិបញ្ញា និងវិជ្ជាជីវៈសំដៅធានាលទ្ធភាពក្នុងការចូលរួមដ៏ពេញលេញនិងដោយស្មើគ្នានៃជនពិការ ក្នុងគ្រប់សកម្មភាពនានា។
គិតក្នុងឆ្នាំ២០១៤ មានជនពិការចំនួន២,៣២០នាក់ បានចូលបម្រើការងារក្នុងក្រសួង ស្ថាប័នរដ្ឋចំនួន៤០ ស្មើនឹង១.១៧ភាគរយ នៃចំនួនបុគ្គលិកបច្ចុប្បន្ន។ ក្រសួងស្ថាប័ននីមួយៗ បាន និងកំពុងជ្រើសរើសឲ្យគ្រប់តាមអាត្រាកំណត់ចំនួន២ភាគរយ នៅក្នុងឆ្នាំ២០១៥ គឺស្មើនឹង៣,៩៤៩នាក់៕
© រក្សាសិទ្ធិដោយ thmeythmey.com