លោក ហ៊ុន សែន កោតសរសើរកូនចៅព្រឹទ្ធចារ្យ ហែម ថុន

កីឡាជាតិ

ជាតិ

លោក ហ៊ុន សែន កោតសរសើរកូនចៅព្រឹទ្ធចារ្យ ហែម ថុន

02, Dec 2015 , 5:08 pm

រូបភាព

ដោយ: ថ្មីៗ

នាពិធីសម្ពោធ «មជ្ឈមណ្ឌលអាងហែលទឹកតេជោសែន» ដែលស្ថិតក្នុងខេត្តកំពង់ចាមនៅរសៀលថ្ងៃទី២ ខែធ្នូ នេះ លោកនាយករដ្ឋមន្ត្រី ហ៊ុន សែន បានកោតសរសើកូនចៅរបស់ព្រឹទ្ធចារ្យ ហែម ថុន ដែលបានខិតខំរក្សាវង្សត្រកូលអ្នកហែលទឹក ជាពិសេស កីឡាករ ហែម ថុនពន្លឺ ដែលជាកូន និងហែម ថុនវិទិនី ដែលជាចៅ។

លោក ហ៊ុន សែន និងភរិយា បានមើលការប្រកួតផ្តាច់ព្រ័ត្រកីឡាហែលទឹកដណ្តើមពានរង្វាន់ «តេជោសែន» ឆ្នាំ២០១៥ ដែលត្រូវបានប្រារព្ធឡើងនៅថ្ងៃសម្ពោធ «មជ្ឈមណ្ឌលអាងហែលទឹកតេជោសែន» ដែលស្ថិតក្នុងខេត្តកំពង់ចាម។

លោកបានកត់សម្គាល់ថា ត្រកូល ហែមថុន ពិតជាត្រកូលអ្នកហែលទឹកពិតប្រាកដ ពោលគឺការប្រឹងប្រែងបន្តវេនរបស់កីឡាករ ហែម ថុនពន្លឺ ជាកូន និងកីឡាការិនី ហែម ថុនវិទិនី ជាចៅរបស់លោក ហែម ថុន។

លោក ហែម ថុន អគ្គលេខាធិការរងនៃគណៈកម្មាធិការជាតិអូឡាំពិកកម្ពុជា (NOCC) និងជាអគ្គលេខាធិការសហព័ន្ធកីឡាហែលទឹកកម្ពុជា បានទទួលមរណភាពកាលពីថ្ងៃទី១២ ខែមករា ឆ្នាំ២០១៥នេះ ក្នុងអាយុ៧២ឆ្នាំ បន្ទាប់ពីលោកត្រូវបានបញ្ជូនចូលបន្ទប់សង្គ្រោះបន្ទាន់នៅមន្ទីរពេទ្យ កាល់ម៉ែត្រដោយសារបញ្ហាទឹកក្នុងសួត។ ក្រោយការទទួលមរណភាព លោក ហែម គិរី ដែលជាកូនប្រុសបានបន្តតំណែងជាអគ្គលេខាធិការសហព័ន្ធជំនួសឪពុក។

នាការប្រកួតផងដែរ ក្លិបហែលទឹកព្រឹទ្ធចារ្យ ហែម ថុន បានទទួលចំណាត់ថ្នាក់លេខមួយ ខណៈក្លិបក្រសួងមហាផ្ទៃ បានលេខ២ ក្លិបជ្រោយចង្វារបានលេខ៣ ។ អ្នកស្រី អ៊ុន សាម៉ុច ភរិយារបស់លោក ហែម ថុន រួមទាំងអតីតកីឡាករ-កីឡាការិនី ហែលទឹក កម្ពុជា ដែលមានវ័យចំណាស់ទៅហើយនោះ ក៏ទទួលបានរង្វាន់លើកទឹកចិត្តពីលោកនាយករដ្ឋមន្ត្រី ផងដែរ៕