ជាតិ
សង្គមជាតិ
ក្រមប្រតិបត្តិអង្គរបង្កើតឡើងក្នុងន័យឲ្យទេសចរផ្តល់តម្លៃដល់វប្បធម៌ខ្មែរ
×![]()
សៀមរាប៖ នៅព្រឹកថ្ងៃទី៤ ធ្នូ ស្អែកនេះ អាជ្ញាធរជាតិអប្សរា នឹងប្រកាសឲ្យប្រើប្រាស់ក្រមប្រតិបត្តិអង្គរ នៅក្នុងរមណីយដ្ឋានអង្គរជាផ្លូវការហើយ។ មានមនុស្សជាច្រើនមិនទាន់យល់ច្បាស់ពីក្រមប្រតិបត្តិនេះ។ តាមពិតទៅក្រមប្រតិបត្តិនេះ បង្កើតឡើងក្នុងន័យឲ្យភ្ញៀវទេសចរ ដែលមកកម្សាន្តក្នុងតំបន់អង្គរទាំងអស់ ឲ្យតម្លៃដល់តំបន់ប្រវតិ្តសាស្ត្រ វប្បធម៌បុរាណ ដ៏ផូរផង់របស់ខ្មែរ។
កំណើនទេសចរក្នុងរមណីយដ្ឋានអង្គរ មានទាំងគុណសម្បត្តិ និងគុណវិបត្តិដល់ប្រាង្គប្រាសាទខ្មែរ។ និយាយពីគុណសម្បត្តិ កំណើនរបស់ភ្ញៀវទេសចរ ផ្តល់ចំណូលជាច្រើនលានដុល្លារចូលទៅក្នុងសេដ្ឋកិច្ចជាតិ។ សម្រាប់គុណវិបត្តិវិញ អ្នកទេសចរខ្លះ គឺជាអ្នកបំផ្លាញវប្បធម៌ និងប្រាង្គប្រាសាទ ដូចជាការប៉ះថ្មប្រាសាទ និងការស្លៀកបំពាក់មិនសមរម្យ ដែលប្រាស់ចាកពីទំនៀមទម្លាប់របស់ខ្មែរជដើម។
ប្រវត្តិការបង្កើតក្រមប្រតិបត្តិអង្គរ
នៅឆ្នាំ២០១០ ដល់ឆ្នាំ២០១៣ «ផែនការគ្រប់គ្រងទេសចរណ៍» ត្រូវបានបង្កើតឡើង តាមសំណើររបស់គណៈកម្មាធិការអន្តរជាតិសម្របសម្រួលកិច្ចគាំពារ និងអភិរក្សរមណីយដ្ឋានប្រវត្តិសាស្ត្រអង្គរ ហៅកាត់ថា អាយស៊ីស៊ីអង្គរ ដោយមានការគាំទ្រពីអង្គការសហប្រជាជាតិ សម្រាប់ការអប់រំ វិទ្យាសាស្ត្រ និងវប្បធម៌ ហៅកាត់ថា យូណេស្កូ រាជរដ្ឋាភិបាលកម្ពុជា និងប្រទេសអូស្ត្រាលី។ នៅក្នុងផែនការគ្រប់គ្រងទេសចរណ៍ បានបង្ហាញពីបញ្ហាប្រឈមមួយចំនួន ដែលកំពុងកើតមានក្នុងរមណីយដ្ឋានអង្គរ ដែលត្រូវដោះស្រាយជាចាំបាច់។ នៅពេលនោះហើយ ដែលក្រមប្រតិបត្តិអង្គរ បានលេចចេញជារូបរាងបន្តិចម្តងៗ និងត្រូវបានរៀបចំឡើងចាប់ពីឆ្នាំ២០១២មក តាមរយៈការសិក្សា និងពិគ្រោះយោបល់ជាមួយស្ថាប័នពាក់ព័ន្ធមួយចំនួន មានក្រសួងទេសចរណ៍ និងអង្គការយូណេស្កូ ក៏ដូចជាតំណាងមកពីវិស័យទេសចរណ៍ ភ្ញៀវទេសចរជាតិនិងអន្តរជាតិ សហគមន៍មូលដ្ឋាន និងព្រះសង្ឃផងដែរ។
អ្វីទៅជាក្រមប្រតិបត្តិអង្គរ?
បង្កើតនៅឆ្នាំ២០១២ ក្រមប្រតិបត្តិអង្គរ គឺជាសេចក្តីណែនាំដល់ភ្ញៀវទេសចរ ដែលមកកម្សាន្តក្នុងរមណីយដ្ឋានអង្គរ ក្នុងបំណងឲ្យពួកគេស្គាល់ពីតម្លៃនៃតំបន់អង្គរ គោរព និងប្រកាន់រាល់អាកប្បកិរិយាសមរម្យ ក្នុងន័យរួមចំណែកកាត់បន្ថយផលប៉ះពាល់អវិជ្ជមានទៅលើអង្គរ ដែលមានប្រាសាទ វប្បធម៌ និងបរិស្ថានជាដើម។ វាមិនមែនជាច្បាប់ ដែលមានលក្ខណៈបង្ខិតបង្ខំនោះទេ តែក្នុងន័យអប់រំ ឲ្យភ្ញៀវទេសចរ មិនត្រូវប្រព្រឹត្តិអំពើមិនគប្បីមួយចំនួន ដូចជាការស្លៀកពាក់ស៊ិចស៊ី ការប៉ះចម្លាក់ឫថ្មប្រាសាទ ការរំខានដោយសំឡេងនៅកន្លែងទីសក្ការៈបូជា ការចូលទីតាំងហាមឃាត់ និងទីគ្រោះថ្នាក់ជាដើម។ ក្រមប្រតិបត្តិនេះ ក៏ហាមរាល់ភ្ញៀវទេសចរទាំងអស់មិនឲ្យជក់បារីក្នុងបរិវេណប្រាសាទ ចោលសំរាមគ្មានសណ្តាប់ធ្នាប់ ការប៉ះពាល់ព្រះសង្ឃ ដូចជាសុំព្រះសង្ឃថតរូប និងហាមមិនឲ្យភ្ញៀវទេសចរឲ្យស្ករគ្រាប់ និងថវិកាដល់ក្មេងៗនៅតំបន់អង្គរជាដើម។
រាល់ភ្ញៀវទេសចរ ដែលប្រព្រឹត្តិដូចក្រមប្រតិបត្តិ ឫសេចក្តីណែនាំខាងលើ អាចនឹងមានការណែនាំ ឫតាមរយៈរូបភាពផ្សេងៗ ប៉ុន្តែសម្រាប់សកម្មភាពលួច និងធ្វើឲ្យថ្មប្រាសាទបែកបាក់ ក៏ដូចជាធ្វើសកម្មភាពអាសអាភាសឫអាក្រាតនៅទីសាធារណៈនោះ ចាត់ទុកជាអំពើល្មើសច្បាប់។
ក្រមប្រតិបត្តិអង្គរនេះ មានការសាទរពីសាធារណៈជនជាច្រើន ហើយអាជ្ញាធរជាតិអប្សរា ដែលមានតួនាទីគ្រប់គ្រងរមណីយដ្ឋានអង្គរ រំពឹងជឿជាក់ថា ភ្ញៀវទេសចរទាំងអស់ និងអ្នកពាក់ព័ន្ធទាំងអស់ នឹងចូលរួមគោរព ក៏ដូចជាអនុវត្តន៍ ក្នុងបំណងរួមចំណែកថែរក្សារមណីយដ្ឋានអង្គរ ក៏ដូចជាឲ្យតម្លៃដល់វប្បធម៌ខ្មែរ៕
Tag:
អង្គរ
© រក្សាសិទ្ធិដោយ thmeythmey.com
