ជាតិ
សង្គមជាតិ
មេដឹកនាំសហជីពថា ស្ថាប័នសហជីពអាចរលាយ បើច្បាប់សហជីពត្រូវបានអនុម័ត
× តំណាងសហជីពប្រមាណជា២០រូប បាននាំគ្នាយកញត្តិទៅដាក់ជូនរដ្ឋសភា នៅព្រឹកថ្ងៃទី៣ ខែធ្នូ ឆ្នាំ២០១៥នេះ ដើម្បីស្នើសុំចរចា ឱ្យមានការកែប្រែសេចក្តីព្រាងច្បាប់ស្តីពីសហជីព។ តំណាងសហជីពខ្លះព្រួយបារម្ភយ៉ាងខ្លាំងចំពោះការដួលរលំស្ថាប័នសហជីពនៅកម្ពុជា ប្រសិនបើរដ្ឋសភាអនុម័តសេចក្តីព្រាងច្បាប់នេះ ដោយគ្មានការកែប្រែតាមសំណើរបស់ពួកគេ។
ប្រសិនបើរដ្ឋសភាអនុម័តសេចក្តីព្រាងច្បាប់សហជីព ដោយគ្មានការបញ្ជូលចំណុចមួយចំនួនដែលក្រុមសហជីពនៅកម្ពុជាបានស្នើនោះទេ ច្បាប់នេះនឹងបង្កផលប៉ះពាល់យ៉ាងខ្លាំងដល់ដំណើរការរបស់សហជីពក្នុងការការពារសិទ្ធិសេរីភាពកម្មករ។ នេះបើតាមប្រសាសន៍របស់ លោក ប៉ាវ ស៊ីណា ប្រធានសហព័ន្ធសហជីពចលនាកម្មករ ដែលបានថ្លែងប្រាប់សារព័ត៌មានថ្មីៗនៅថ្ងៃនេះ។លោកបានសង្កត់ធ្ងន់ៗយ៉ាងនេះថា៖«ស្ថាប័នសហជីពច្បាស់ជារលាយ បើច្បាប់នេះត្រូវបានអនុម័តដោយគ្មានការកែប្រែ»។
ចំណែកឯ លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ក៏ខ្វល់ខ្វាយដ៏ក្រៃលែងដែរ ចំពោះខ្លឹមសារនៃច្បាប់នេះ។ រូបលោកអះអាងថា ប្រសិនបើរដ្ឋសភាមិនបើកវេទិកាពិភាក្សារួមគ្នាជាមួយសហជីព ហើយអនុម័តដោយមិនយកមតិរបស់សហជីពដែលស្នើឡើងទេ ច្បាប់នេះនឹងរារាំងសិទ្ធិសេរីភាពរបស់សហជីពនៅកម្ពុជា។លោក វន់ ពៅ លើកឡើងពីផលប៉ះពាល់នៃច្បាប់នេះដូច្នេះថា៖«សហជីពលែងឯករាជ្យហើយ បើច្បាប់នេះកើតឡើង។ អ្វីដែលធ្ងន់ធ្ងរនោះ គឺគ្រប់ស្ថាប័នសហជីពទាំងអស់នឹងដួលរលំ ដោយសារតែការគាប់សង្កត់នៃច្បាប់នេះ»។
លោក បានលើកឡើងថា ខ្លឹមសារនៃច្បាប់នេះ មានចំណុចជាច្រើន ដែលរឹតត្បិតសិទ្ធិសេរីភាពរបស់សហជីព និងអាចបណ្តាលឲ្យសហជីពបាត់បង់។ លោកថា ចំណុចទាំងនោះមានដូចជា ការតម្រូវឲ្យសហជីពទាំងអស់ផ្ញើរបាយការណ៍ហិរញ្ញវត្ថុប្រចាំឆ្នាំទៅកាន់ក្រសួងការងារ, ការផាកពិន័យសហជីពចំនួន៦លានរៀលឡើងទៅ ក្នុងករណីដឹកនាំធ្វើបាតុកម្មខុសនីតិវិធីណាមួយ, ភាគីពាក់ព័ន្ធ ឬសមាជិកចំនួន៥០ភាគរយ អាចរំលាយសហជីពបាន, ការតម្រូវឲ្យសហជីពចុះបញ្ជីជាមុន ទើបអាចបង្កើតនិងដំណើរការបាន ជាដើម។
កន្លងមក ក្រុមសហជីពបានស្នើឲ្យរដ្ឋាភិបាលកែប្រែ និងលុបចោលនូវចំណុច៤២ ដើម្បីចៀសវាងការប៉ះពាល់ដល់សិទ្ធិសេរីភាពរបស់សហជីពក្នុងការទាមទាររកយុត្តិធម៌ជូនកម្មករ។ ចំណុចដែលស្នើសុំនោះ មានដូចជា សុំឲ្យកែប្រែនូវចំណុច ដែលចែងថា សហជីពចំនួន៩ឡើងទៅទើបអាចចងក្រងជាសហព័ន្ធសហជីពបាន និងសូមឲ្យកែប្រែចំណុច ដែលដាក់ទោសទណ្ឌនិងផាកពិន័យទឹកប្រាក់ចំនួន៦លានរៀល ក្នុងករណីធ្វើបាតុកម្មខុសនីតិវិធី ព្រមទាំងសុំឲ្យលុបចំណុច ដែលចែងថា សហជីពត្រូវធ្វើរបាយការណ៍ប្រចាំឆ្នាំ ដាក់ជូនក្រសួងការងារ។
ទោះបីជាយ៉ាងណាក៏ដោយ ទាក់ទងនឹងការលើកឡើងពីគុណវិបត្តិ និងការប៉ះពាល់នេះ ត្រូវបានលោក សោម អូន ប្រធានក្រុមប្រឹក្សាសហជីពជាតិកម្ពុជា និងជាសម្ព័ន្ធសហជីពកម្មករកម្ពុជាសហជីព បានច្រានចោលម្តងហើយម្តងទៀតថា ច្បាប់សហជីពនេះ មិនគួរព្រួយបាម្ភដូចប្រធានសហជីពអះអាងកន្លងមកនោះទេ។ ផ្ទុយទៅវិញ រូបលោក បែរជាយល់ថា ច្បាប់នេះគឺជាផលប្រយោជន៍ និងជារឿងល្អសម្រាប់សហជីពនិងកម្មករទៅវិញ ។ លោកបន្ថែមថា សហជីពរួមទាំងកម្មករពុំគួរព្រួយបារម្ភពេកនោះទេ ព្រោះច្បាប់នេះ មិនបានរារាំងសហជីពមិនឲ្យបញ្ចេញមតិ ឬទាមទាររកយុត្តិធម៌ជូនកម្មករឡើយ។ ប្រធានក្រុមប្រឹក្សាសហជីពជាតិកម្ពុជារូបនេះបញ្ជាក់ថា៖ «ច្បាប់នេះនឹងផ្តល់សិទ្ធិសេរីភាពគ្រប់គ្រាន់ដល់សហជីព ក្នុងការបញ្ចេញមតិ និងការការពារកម្មករ មិនដូចអ្វីដែលក្រុមសហជីពព្រួយបារម្ភនោះទេ»។
សូមរម្លឹងថា សេចក្តីព្រាងច្បាប់ស្តីពីសហជីពនេះ មាន៧ជំពូក និង១០០មាត្រ ត្រូវបានរាជរដ្ឋាភិបាលអនុម័ត និងបញ្ជូនទៅកាន់រដ្ឋសភា កាលថ្ងៃទី១៣ វិច្ឆិកា ឆ្នាំ២០១៥ ។ រដ្ឋសភាអាចនឹងបើកកិច្ចប្រជុំ ដើម្បីអនុម័តសេចក្តីព្រាងច្បាប់នេះ នៅថ្ងៃទី១៧ ខែធ្នូ ឆ្នាំ២០១៥ ខាងមុខ៕
Tag:
សហជីព
ច្បាប់សហជីព
© រក្សាសិទ្ធិដោយ thmeythmey.com