ជប៉ុនផ្តល់គ្រឿងចក្រមានតម្លៃជាង៧៦ម៉ឺនដុល្លារសម្រាប់ជួសជុលស្ពានហាលអង្គរ

ជាតិ

សង្គមជាតិ

ជប៉ុនផ្តល់គ្រឿងចក្រមានតម្លៃជាង៧៦ម៉ឺនដុល្លារសម្រាប់ជួសជុលស្ពានហាលអង្គរ

03, Dec 2015 , 4:12 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ រដ្ឋាភិបាលជប៉ុនតាមរយៈស្ថានទូតខ្លួនប្រចាំនៅកម្ពុជា បានសម្រេចផ្តល់ជំនួយឥតសំណង ដែលសរុបជាទឹកប្រាក់ជាង ៧៦ម៉ឺនដុល្លារសហរដ្ឋអាមេរិក។ ជំនួយរបស់ជប៉ុននៅពេលនេះ គឺដើម្បីអភិរក្សរមណីយដ្ឋានអង្គរ តាមរយៈការផ្តល់សម្ភារជាគ្រឿងចក្រ សម្រាប់ជួសជុលស្ពានហាលនៅប្រាសាទអង្គរវត្ត។

គ្រឿងចក្រដែលមានតម្លៃសរុបទឹកប្រាក់ ៩៤,៧០០,០០០ យ៉េន ឫស្មើនឹង ៧៦៧,០០០ដុល្លារអាមេរិក បានប្រគល់ឲ្យស្ថាប័នអាជ្ញាធរជាតិអប្សរា ដើម្បីរៀបចំដំណើរការជួសជុលស្ពានហាល ផ្លូវចូលខាងលិខនៃប្រាសាទអង្គរវត្ត។ ស្ពានហាលនេះមានប្រវែងប្រមាណ១០០ម៉ែត្រ ដែលបច្ចុប្បន្នរងការខូចខាត ដោយសារការស្រុតធ្លាក់នៃថ្ម។

គ្រឿងចក្រដែលជាជំនួយរបស់រដ្ឋាភិបាលជប៉ុនរួមមាន ម៉ាស៊ីនស្ទួច និងគ្រឿងបរិក្ខារធុនធ្ងន់មួយចំនួនទៀត ដែលត្រូវការជាចាំបាច់ សម្រាប់លើកផ្ទាំងដុំថ្មធំៗ និងមានទម្ងន់ធ្ងន់។ តាមរបាយការណ៍របស់អ្នកជំនាញ ទម្ងន់ជាមធ្យមនៃថ្មបាយក្រៀម ដែលត្រូវផ្លាស់ទី គឺមានចន្លោះពី ៣០០ទៅ៤០០គីឡូក្រាម និងថ្មភក់ មានទម្ងន់ពី ៥០០ទៅ៨០០គីឡូក្រាម ហើយថ្មខ្លះទៀតក៏អាចមានទម្ងន់លើសពីមួយតោនផងដែរ។

ពិធីប្រគល់គ្រឿងចក្រ ដែលជាជំនួយឥតសំណងរបស់ជប៉ុន ធ្វើឡើងនៅរសៀលថ្ងៃទី៣ ធ្នូ ក្នុងកិច្ចប្រជុំលើកទី២៥ អាយស៊ីស៊ីអង្គរ ក្រោមវត្តមានលោកអគ្គរាជទូតជប៉ុនប្រចាំកម្ពុជា លោក គូម៉ាម៉ារ៉ូ យូជិ (Kumamaru Yuji) និងលោក សុខ អាន ប្រធានអាជ្ញាធរជាតិអប្សរា នៅសាលសន្និសីទអង្គរ នៃអាជ្ញាធរជាតិអប្សរា៕