អន្តរជាតិ
រុស្ស៊ីបន្តទិតៀនតួកគី ព្រោះជំនួបរដ្ឋមន្ត្រីការបរទេសគ្មានផ្លែផ្កា
× រដ្ឋមន្ត្រីការបរទេសរុស្ស៊ីលោក Sergei Lavrov ម្សិលមិញនេះបានសម្រេចជួបពិភាក្សាជាមួយរដ្ឋមន្ត្រីការបរទេសតួកគីជាលើកដំបូងតាំងពីយន្តហោះរុស្ស៊ីត្រូវតួកគីបាញ់ធ្លាក់។ ប៉ុន្តែជំនួបកម្រិតប្រមុខការទូតមិនមានផ្លែផ្កាទេ ព្រោះតួកគីរក្សាជំហររបស់ខ្លួន ដោយចោទរុស្ស៊ីថាជាអ្នកខុសដែលរំលោភដែនអាកាសខ្លួន។ ហើយរុស្ស៊ីក៏ត្រូវបន្តរិះគន់និងបកអាក្រាតរបបដឹកនាំក្រុងអង់ការ៉ាទៀតពាក់ព័ន្ធជំនួញប្រេងខុសច្បាប់។
សូមស្ដាប់ព័ត៌មានលម្អិត៖
*
ជំនួបពិសេសកម្រិតរដ្ឋមន្ត្រីការបរទេសរវាងរុស្ស៊ីនិងតួកគីលើកដំបូងបំផុតក្រោយទំនាក់ទំនងប្រទេសទាំងពីរល្អក់ករក បានបញ្ចប់ទៅដោយគ្មានផ្លែផ្កាបន្តិចសោះ។ កិច្ចពិភាក្សានេះត្រូវបានរៀបចំឡើងនៅក្រៅសន្និសីទអង្គការសន្តិសុខ និងសហប្រតិបត្តិការអឺរ៉ុបដែលបានរៀបចំឡើងនៅក្នុងទីក្រុងបែលក្រាត ប្រទេសស៊ែប៊ី។ រដ្ឋមន្ត្រីការបរទេស លោក Sergei Lavrov ដែលជាតំណាងលោក វ្ល៉ាឌីមៀ ពូទីន បានអះអាងថា លោកមិនបានលឺអ្វីថ្មីសោះពីមាត់រដ្ឋមន្ត្រីការបរទេសតួកគីលោក Mevlut Cavusoglu សោះក្រោយជជែកពិភាក្សាគ្នា ម្សិលមិញ។
រដ្ឋមន្ត្រីការបរទេសតួកគីដែលតំណាងឲ្យប្រធានាធិបតី Recep Tayyip Erdogan បានការពារជំហរ ដែលខ្លួនមានកន្លង ដោយអះអាងជាថ្មីថា តួកគីមិនខុស ហើយមានសិទ្ធិពេញលេញក្នុងការប្រើប្រាស់សិទ្ធិការពារខ្លួនដោយបាញ់យន្តហោះចម្បាំងរុស្ស៊ីទម្លាក់។ នេះបញ្ជាក់ច្បាស់ថា តួកគីមិនបានបន្ទន់ជំហរដោយសុំអភ័យទោសរុស្ស៊ីជាផ្លូវការឡើយចំពោះអ្វីដែលកើតមានឡើងនេះ។ ប៉ុន្តែយ៉ាងហោចណាស់ភាគីតួកគីបានទទួលស្គាល់ផងដែរថា ជំនួបម្តងប៉ុណ្ណេះមិនជួយដោះស្រាយអ្វីឡើយ ហើយវាចាំបាច់ត្រូវបន្តការទាក់ទងគ្នាទៅមុខទៀត។
គេមើលឃើញថា បើគ្មានការដោះស្រាយបញ្ហាបច្ចុប្បន្ននេះទេ ចំណងមិត្តភាពទ្វេភាគីរវាងរុស្ស៊ីនិងតួកគីនឹងវិវត្តទៅរកភាពអាក្រក់កាន់តែខ្លាំង។ វាអាចបណ្តាលឲ្យមានការប្រឈមមុខគ្នាកាន់តែខ្លាំងរវាងសមាជិកបក្សសម្ព័ន្ធណាតូនេះ ជាមួយនិងមហាអំណាចរុស្ស៊ី។
រុស្ស៊ីបានប្រើប្រាស់វិធានការសេដ្ឋកិច្ចដើម្បីសងសឹកតួកគីរួចហើយកន្លងមក។ទំនិញតួកគីមានចំណីអាហារ ផលិតផលវាយនភ័ណ្ឌជាដើមនឹងលែងអាចនាំចូលទៅកាន់ទីផ្សាររុស្ស៊ីបានទៀត ហើយតួកគីនឹងខាតបង់ចំណូលប្រហែល ៧៦៤លានដុល្លារក្នុងមួយឆ្នាំឯណោះ។ ចំណែកបុរសខ្លាំងរុស្ស៊ីលោក វ្ល៉ាឌីមៀ ពូទីន ក៏បានបន្តទិតៀនរបបដឹកនាំក្រុងអង់ការ៉ា និង តាមរកភ័ស្តុតាងមកបកអាក្រាតរឿងអាស្រូវរបស់ប្រធានាធិបតីតួកគីបច្ចុប្បន្នផងជុំវិញការលួចធ្វើអាជីវកម្មប្រេងជាមួយភេរវជន។
ម្សិលមិញនេះដែរ ក្នុងសុន្ទរកថាប្រចាំឆ្នាំ ប្រធានាធិបតីរុស្ស៊ីខាងលើឆ្លៀតឱកាសវាយប្រហារតួកគីនៅចំពោះមុខសមាជិកសភារុស្ស៊ីទាំងអស់ផង ដោយលោកចាត់ទុកការលួចរកស៊ីជាមួយក្រុមភេរវជនជាជំនួញឈាម។ ក្រៅពីនេះ លោក ក៏បន្តអំពាវនាវឲ្យបណ្តាប្រទេសជាមិត្តនិងមហាអំណាចទាំងអស់រួមកម្លាំងគ្នាដើម្បីបង្កើនយុទ្ធសាស្ត្រប្រយុទ្ធកម្ចាត់ក្រុមភេរវជនឲ្យមានប្រសិទ្ធភាពខ្ពស់៕
© រក្សាសិទ្ធិដោយ thmeythmey.com