ជាតិ
សង្គមជាតិ
មហាវិថីចំនួន៥ក្នុងក្រុងភ្នំពេញ នឹងលែងមានខ្សែកាបរញ៉េរញ៉ៃជាប់ខ្សែភ្លើង
×
សាលារាជធានីភ្នំពេញ បានប្រកាសផ្តើមរៀបចំខ្សែកាបរាយប៉ាយលើអាកាសរបស់ឲ្យក្រុមហ៊ុនទូរទស្សន៍ ទូរសព្ទ និងអ៊ីនធឺណេត នៅលើបង្គោលភ្លើង ទម្លាក់កប់ចូលទៅក្នុងដី។ តាមរយៈហ្វេសប៊ុករបស់សាលារាជធានីភ្នំពេញ ខ្សែកាបរញ៉េរញ៉ៃនៅលើអាកាស នៅតាមដងវិថីនានាក្នុងរាជធានីភ្នំពេញ បានបណ្តាលឲ្យបាត់បង់សោភ័ណភាពទីក្រុង និងអាចបង្កជាគ្រោះថ្នាក់ផ្សេងៗ។
សាលារាជធានីភ្នំពេញ ក៏បានទទួលស្គាល់ដែរថា ស្ថានភាពខ្សែកាបរបស់ក្រុមហ៊ុនទាំងនោះ រាយប៉ាយគ្មានច្បាប់ទម្លាប់នៅលើបង្គោលភ្លើងរបស់អគ្គិសនីកម្ពុជានេះ គឺដោយសារការគ្រប់គ្រងមិនបានល្អរបស់អាជ្ញាធរ។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានបញ្ជាក់ប្រាប់សារព័ត៌មានថ្មីៗនៅថ្ងៃនេះថា មហាវិថីចំនួន៥នៅក្នុងក្រុងភ្នំពេញ នឹងត្រូវរៀបចំសោភណភាពខ្សែកាបលើអាកាសនេះមុនគេ។ មហាវិថីទាំងនោះ រួមមនាមហាវិថីព្រះនរោត្តម ព្រះមុនីវង្ស សហព័ន្ធរុស្ស៊ី កម្ពុជាក្រោម និងមហាវិថីម៉ៅសេទុង។
ការទម្លាក់ខ្សែកាបលើអាកាសរញ៉េរញ៉ៃ ដូចជាការកាត់ខ្សែកាបទូរសព្ទ ខ្សែកាបអុបទិក ចេញពីបង្គោលភ្លើងកប់ចូលក្នុងដីនេះ គឺជាផ្នែកមួយនៃការគ្រប់គ្រង់ចិញ្ចើមផ្លូវរបស់សាលារាជធានីភ្នំពេញ។ នេះបើតាមអ្នកនាំពាក្យដដែល។
បើតាម លោក ឡុង ឌីម៉ង់ សាលារាជធានីភ្នំពេញ កំពុងរៀបចំគោលការណ៍ដាក់ឆ្លងទៅក្រុមប្រឹក្សាដើម្បីចេញដីកា ក្នុងការគ្រប់គ្រង់ចិញ្ចើមផ្លូវ ដែលត្រូវបានរំលោភដោយម្ចាស់លំនៅឋានមួយចំនួន នៅក្នុងរាជធានីភ្នំពេញ។ គោលការណ៍នេះ កំពុងស្ថិតនៅក្នុងដំណាក់កាលនៃការសិក្សា ការស្រង់ទិន្នន័យ និងធ្វើការណែនាំដល់ប្រជាពលរដ្ឋអំពីការប្រើប្រាស់ចិញ្ចើមផ្លូវ មុននឹងឈានដល់ការចាត់វិធានការតាមច្បាប់កំណត់៕
Tag:
ខ្សែកាប
ខ្សែភ្លើង
© រក្សាសិទ្ធិដោយ thmeythmey.com