អន្តរជាតិ
នយោបាយអន្តរជាតិ
×![]()
ថ្វីត្បិត អាជ្ញាធរថៃ មិនទាន់រកឃើញពីមុខសញ្ញានៃការមកដល់របស់ក្រុមរដ្ឋឥស្លាមស៊ីរីទាំងដប់នាក់ដូចទៅនឹងលិខិតរបស់ភ្នាក់ងារស៊ើបអង្កេតរុស្ស៊ីមួយដែលបានបែកធ្លាយក៏ដោយ បញ្ហាសន្តិសុខនៅតែជាក្តីបារម្ភ និងត្រូវរឹតបន្តឹង ដ្បិតនៅចុងឆ្នាំ២០១៥នេះ ថៃនឹងត្រូវរៀបចំព្រឹត្តិការណ៍ធំៗជាច្រើនផងដែរនោះ។
មកទល់ថ្ងៃសៅរ៍នេះ អាជ្ញាធរថៃ បានចាប់ផ្តើមរឹតបន្តឹងសន្តិសុខ និងសុវត្ថិភាពទាំងក្នុងរាជធានី និងខេត្តជាច្រើនរបស់ថៃ ដែលរូមបញ្ចូលទាំងស្ថានទូតបរទេស ជាពិសេសស្ថានទូតរុស្ស៊ីប្រចាំប្រទេសថៃ ។ ចំណាត់ការនេះ ធ្វើឡើងខណៈពេលដែលថៃត្រូវប្រារព្ធពិធីធំៗ និង ខ្លាចក្រែង មានការវាយប្រហារពីក្រុមជ្រុលនិយម ដ្បិតអាជ្ញាធរថៃទើបតែទទួលបានលិខិតព្រមានពីការគំរាមកំហែងរបស់ក្រុមទាំងនោះ។ នេះបើយោងតាមសារព័ត៌មាន The Nations ។
សូមរម្លឹកផងដែរ កាលពីម្សិលមិញ មានការបែកធ្លាយឯកសារសម្ងាត់មួយដែល បានបញ្ជាក់ថា មានពលរដ្ឋស៊ីរី១០នាក់ ដែលជាបណ្តាញរបស់ក្រុមរដ្ឋឥស្លាម បានចូលទៅដល់ប្រទេសថៃ ដែលវត្តមានរបស់ក្រុមនេះ ត្រូវបានជឿជាក់ថាមានគោលបំណងតាមវាយប្រហារ ទីកន្លែងរបស់រុស្ស៊ីនៅក្នុងប្រទេសថៃ។
បើតាមឯកសារដែលបានបែកធា្លយ និងត្រូវបានចែកចាយនៅបណ្តាញសង្គមថៃ ភា្នក់ងារស៊ើបអង្កេត របស់សហភាពសន្តិសុខរុស្ស៊ី បានផ្ញើលិខិតទៅអាជ្ញាថៃពីវត្តមានរបស់ក្រុមរដ្ឋឥស្លាមនៅទីនោះ។ ក្នុង ឯកសារនោះ បានបញ្ជាក់ថា ក្រុមរដ្ឋឥស្លាមទាំងដប់នាក់ បានទៅដល់ថៃនៅចន្លោះថ្ងៃទី១៥-៣១ ខែតុលាកន្លងទៅនេះ។
តាមឯកសារបែកធ្លាយដដែល គោលបំណង និងទិសដៅសំខាន់នៃការប្រហាររបស់ក្រុមនេះ គឺទីតាំង ផ្សេងៗដែលជាកម្មសិទ្ធិរបស់រុស្ស៊ីនៅក្នុងប្រទេសថៃ ហើយ បានទទូចឲ្យអាជ្ញាធរថៃ បង្កើនសន្តិសុខ នៅតាំងទាំងនោះផងដែរ។ តែក្នុងឯកសារនោះ មិនបានកំណត់អត្តសញ្ញាណរបស់ក្រុមជ្រុលនិយមនោះទេ ដោយគ្រាន់តែបញ្ជាក់ថា ក្នុងចំណោមជនសង្ស័យទាំង១០នាកក់ មាន៤នាក់បានធ្វើ ដំណើរ ទៅកាន់ខេត្ត Pattaya ពីរនាក់ទៅខេត្ត Phuket ពីរនាក់ទៀតទៅក្រុង Bangkok និង ពីរនាក់ផ្សេងទៀត មិនទាន់មានទិសដៅច្បាស់លាស់នៅទេ។
តែម្សិលមិញ អ្នកនាំពាក្យប៉ូលិសថៃ Songpol Wattanachai បានអះអាង ប៉ូលិស មិនទាន់ទទួល ការព្រមានពីសកម្មភាពរបស់ក្រុមរដ្ឋឥស្លាមពីភា្នក់ងារស៊ើបអង្កេតបរទេសណាមួយនៅឡើយនោះទេ ។ លោក បន្ថែមទៀតថា ប៉ូលីស មិនមានព័ត៌មានអត្តសញ្ញាណ ឬគោលដៅណារបស់ក្រុមរដ្ឋឥស្លាម តែ ប៉ូលីស កំពុងព្យាយាមធ្វើការបញ្ជាក់ថាតើក្រុមទាំងនោះពិតជាបានមកដល់ថៃពិតប្រាកដឬអត់។
ជាមួយគ្នានេះ មន្ត្រីរដ្ឋាភិបាលថៃ លោក Suwaphan Tanyuvardhana បានបញ្ជាក់ថា រុស្ស៊ី បានផ្លាស់ប្តូរព័ត៌មាន ជាមួយនឹងរដ្ឋាភិបាលមែន ពោលគឺ រុស្ស៊ី គ្រាន់តែចង់ដឹងថា ក្រុមបណ្តាញរដ្ឋឥស្លាមទាំងដប់នោះ ពិតជាបានដល់ប្រទេសថៃពិតប្រាកដឬយ៉ាងណា។ តែ មន្ត្រីរដ្ឋាភិបាលថៃដដែល បានបញ្ជាក់ថា អាជ្ញាធរថៃ មិនទាន់រកឃើញមុខសញ្ញាណាមួយរបស់ក្រុមរដ្ឋឥស្លាមនៅឡើយនោះទេ។ យ៉ាងណាក៏ដោយលោក បានសង្កត់ធ្ងន់ថា អាជ្ញាថៃ នៅតែបង្កើនការរឹតបន្តឹងសន្តិសុខ និងសុវត្ថិភាព ដ្បិតនៅចុងឆ្នាំនេះ មានព្រឹត្តិការណ៍ជាច្រើន ដែលនឹងត្រូវប្រារព្ធរាប់បញ្ចូលទាំងថ្ងៃចម្រើនព្រះជន្មព្រះមហាក្សត្រថៃ។
ជុំវិញបញ្ហានេះដែរ មន្ត្រីអន្តោប្រវេសន៍ថៃ លោក Nattorn Prohsunthorn បានអះអាងថា ក្នុងចន្លោះ ថ្ងៃទី១៥-៣១ ខែតុលា មានពលរដ្ឋស៊ីរី ២៣១នាក់ បានចូលក្នុងប្រទេសថៃ។ តែ លោក ថា មានតែពលរដ្ឋ២១នាក់ប៉ុណ្ណោះកំពុងស្នាក់នៅប្រទេសថៃ ដែលក្នុងនោះរួមមាន ៦នាក់ បម្រើការនៅស្ថានទូត និង ១៥នាក់ផ្សេងទៀតជាភ្ងៀវទេសចរ៕
© រក្សាសិទ្ធិដោយ thmeythmey.com
