អន្តរជាតិ
នយោបាយជាតិ
អូបាម៉ាថា អាមេរិកមិនភ័យស្លន់ស្លោរ ក្រោយក្រុមISវាយប្រហារកាលីហ្វនីញ៉ា
×![]()
ប្រធានាធិបតីអាមេរិកលោក បារ៉ាក់ អូបាម៉ា បានថ្លែងថា សហរដ្ឋអាមេរិកនឹងមិនស្ថិតក្នុងស្ថានភាពភ័យស្លន់ស្លោរព្រោះការគំរាមកំហែងរបស់ក្រុមភេរវជនរដ្ឋឥស្លាមឬ ដែស្ហ (Daesh)ឡើយ។ ប្រធានាធិបតីអាមេរិកលើកឡើងបែបនេះ ក្រោយក្រុមភេរវជនដែស្ហប្រកាសកោតសរសើរប្តីប្រពន្ធមួយគូដែលប្រព្រឹត្តអំពើភេរវកម្មដោយសម្លាប់មនុស្ស១៤នាក់នៅកាលីហ្វនីញ៉ាកាលពីដើមសប្តាហ៍។
លោក ជាវ សំណាង លម្អិតព័ត៌មាននេះ
ក្រោយករណីវាយប្រហារសម្លាប់រង្គាលមនុស្ស១៤នាក់ដោយខ្មាន់កាំភ្លើងជាប្តីប្រពន្ធនៅរដ្ឋកាលីហ្វនីញ៉ា ក្រុមភេរវជនដែស្ហ បានចេញមុខប្រកាសទទួលខុសត្រូវនិងបង្ហាញការកោតសរសើរខ្មាន់កាំភ្លើងដែលបូជាជីវិតដើម្បីសាសនា។ តែភ្លាមៗលោក បារ៉ាក់ អូបាម៉ា បានចេញមុខថ្លែងសុន្ទរកថាដែលត្រូវបានគេចាក់ផ្សាយតាមវិទ្យុ ដើម្បីឲ្យប្រជាជនអាមេរិកទប់ស្មារតីនិងកុំឲ្យស្លន់ស្លោរ។
លោកថា៖« យើងជាជនជាតិអាមេរិក។ យើងនឹងនៅរក្សាការពារតម្លៃរបស់យើងដែលមានសេរីភាព និងការបើកទូលាយសង្គម ។ យើងនឹងមិនភ័យស្លន់ស្លោរព្រោះទង្វើភេរវកម្មនេះឡើយ»។
ក្រោយការវាយប្រហារប៉ុន្មានថ្ងៃលោក អូបាម៉ា ក៏បានជួបជាមួយមន្ត្រីសន្តិសុខជាន់ខ្ពស់ផងដែរ ដែលពួកគេបានចង្អុលបង្ហាញថា ខ្មាន់កាំភ្លើងទាំងពីរជាប្តីប្រពន្ធត្រូវបានដុសខាត់ខួរក្បាលនិងបញ្ច្រាបមនោគមន៍វិជ្ជាជ្រុលនិយម ប៉ុន្តែមន្ត្រីសន្តិសុខទាំងនោះមិនបានបញ្ជាក់ថា អ្នកទាំងពីរពិតជាបណ្តាក្រុមភេរវជនឡើយ។
យ៉ាងណាមិញ ដោយសារការវាយប្រហារនេះពាក់ព័ន្ធក្រុមភេរវជន តិចឬច្រើនវាបានបំភ័យប្រជាជនអាមេរិករួចទៅហើយ។ ហើយគេក៏មិនបានដឹងច្បាស់ដែរថា តើមានក្រុមជ្រុលនិយមប៉ុន្មាននាក់នៅសហរដ្ឋអាមេរិកឡើយ។
មកទល់ពេលនេះ រឿងរ៉ាវពីរយ៉ាងដែលលោក បារ៉ាក់ អូបាម៉ា ផ្តោតការយកចិត្តទុកដាក់ខ្លាំង ក្នុងនោះមានការពង្រឹងយុទ្ធសាស្ត្រប្រឆាំងក្រុមភេរវជនដែស្ហ និងមួយវិញទៀតគឺការជំរុញការគ្រប់គ្រងអាវុធនៅសហរដ្ឋអាមេរិក។ ជុំវិញការពង្រឹងយុទ្ធសាស្ត្រយោធាកម្ចាត់ក្រុមភេរជនរបស់រដ្ឋបាលក្រុងវ៉ាស៊ីនតោន មិនសូវមានប្រសិទ្ធភាពឡើយ ។ គេរង់ចាំមើលថា តើលោក អូបាម៉ា នឹងបញ្ជូនទ័ពថ្មើជើងទៅប្រយុទ្ធប្រឆាំងក្រុមរដ្ឋឥស្លាមនៅមជ្ឈិមបូព៌ាឬយ៉ាងណា។
ចំណែក ការបាញ់ប្រហារសម្លាប់រង្គាល វាពិបាកដោះស្រាយណាស់ ព្រោះក្លាយជាទម្លាប់ប្រចាំថ្ងៃនៅអាមេរិកក៏ថាបាន។ ប្រធានាធិបតី អូបាម៉ា បានរិះគន់ថា ហិង្សាប្រដាប់អាវុធបែបនេះមានតែនៅអាមេរិកប៉ុណ្ណោះដែលកើតញឹកញាប់ជាងគេ ហើយលោកយល់ថា វាបណ្តាលមកពីមនុស្សគ្រប់គ្នាមានសិទ្ធិកាន់អាវុធ និងអាចរកអាវុធបានងាយ។ ប្រមុខរដ្ឋអាមេរិករូបនេះចង់ឲ្យមានការអនុម័តច្បាប់រឹតបន្តឹងការទិញលក់និងប្រើប្រាស់អាវុធនៅអាមេរិក ប៉ុន្តែអ្នកនយោបាយអាមេរិកច្រើនដែរមិនចង់ឲ្យប្រពៃណីកាន់អាវុធរបស់ប្រជាជនអាមេរិកបាត់បង់ឡើយ៕
© រក្សាសិទ្ធិដោយ thmeythmey.com
