អន្តរជាតិ
ប្រជាជនកូរ៉េខាងត្បូងរាប់ម៉ឺននាក់ទាមទារឲ្យលោកស្រីប៉ាក ហ្គឺនហេចុះពីតំណែង
×
នៅក្រុងសេអ៊ូល ថ្ងៃសៅរ៍ម្សិលមិញ ប្រជាជនកូរ៉េខាងត្បូងប្រមាណ៣០០០០នាក់ បានចុះបាតុកម្មតាមដងផ្លូវ ទាមទារអោយប្រធានាធិបតីចុះពីអំណាច។ ពួកគេរិះគន់លោកស្រីប៉ាក ហ្គឺនហេ ថាចង់កែទម្រង់ការសិក្សាប្រវត្តិសាស្ត្រ ដើម្បីលើកតំកើងឳពុកលោកស្រី ដែលធ្លាប់កាន់អំណាចជាប្រធានាធិបតី។ ក្រុមបាតុករក៏រិះគន់ដែរថា ប៉ាក ហ្គឺនហេ ចង់ផ្តល់អាទិភាពដល់សហគ្រាសធំៗក្នុងស្រុក។
បាតុករជាច្រើននាក់បាននាំគ្នាបិទមុខ និងលើកបដាចែងថា "ប៉ាក ហ្គឺនហេ ចុះពីអំណាច!"។ បាតុកម្មដ៏ធំនេះមានការចូលរួមពីក្រុមសហជីពការងារ និងគ្រូបង្រៀន រួមទាំង ក្រុមអង្គការប្រជាកសិករផងដែរ។ ក្រុមបាតុករចោទប្រធានាធិបតីថាចង់កែទម្រង់សៀវភៅសិក្សាអប់រំ ដើម្បីលើកតំកើងលោក Park Chung-Hee ជាឳពុក។
លោកPark Chung-Hee ធ្លាប់ដឹកនាំកូរ៉េខាងត្បូង ពីឆ្នាំ១៩៦២ រហូតដល់ត្រូវគេធ្វើឃាតក្នុងឆ្នាំ១៩៧៩។ ចាប់ពីឆ្នាំ២០១៧ សៀវភៅប្រវត្តិសាស្ត្រនេះអាចនឹងត្រូវគណៈកម្មការគ្រូបង្រៀនយល់ព្រមអោយចងក្រង។ ដោយឡែក គឺរដ្ឋាភិបាលជាអ្នកតែងតាំងគណៈកម្មការអប់រំនេះឡើង។ ក្រុមបាតុករក៏បន្ទោសរដ្ឋាភិបាលដែរថា ចង់បើកទីផ្សារកសិកម្មអោយទូលាយជាងមុន ដើម្បីងាយស្រួលបណ្តេញមនុស្សចេញពីការងារ និងកាត់បន្ថយប្រាក់ចំណូលរបស់អ្នកធ្វើការដែលមានវ័យចំណាស់។
ម្សិលមិញ ក្នុងក្បួនបាតុកម្ម ក្រុមអ្នកកាន់ពុទ្ធសាសនា និងគ្រិស្តសាសនា៣០០នាក់ បាននាំគ្នាដើរជួរមុខ ដើម្បីធានាសុវត្ថិភាពសន្តិសុខក្រុមបាតុករផ្សេងទៀត។ បាតុកម្មម្សិលមិញ ជាបាតុកម្មលើកទី២ ប្រឆាំងប្រធានាធិបតី។ បាតុកម្មលើកទី១ បានប្រព្រឹត្តទៅ កាលពីថ្ងៃ១៤វិច្ឆិកា មានមនុស្សចូលរួមជិត៦០០០០នាក់ឯណោះ។ ប៉ុន្តែ កាលនោះ មានការប៉ះទង្គិចជាមួយប៉ូលិស។ ប៉ូលិសបានប្រើកាំភ្លើងបាញ់ទឹក ធ្វើអោយបាតុករម្នាក់សន្លប់៕
© រក្សាសិទ្ធិដោយ thmeythmey.com