អន្តរជាតិ
នយោបាយអន្តរជាតិ
លោកស្រី អ៊ុងសាន ស៊ូជី បានការគាំទ្រពីអតីតមេដឹកនាំផ្តាច់ការ លោក ថាន់ ស្វេ
× អតីតមេដឹកនាំយោធាផ្តាច់ការលោក ថាន់ ស្វេ បានបង្ហាញពីគាំទ្រចំពោះលោកស្រី អ៊ុងសាន ស៊ូជី ទៅតាមអ្វីដែលលោកអាចធ្វើបាន ក្នុងករណីមេដឹកនាំគណបក្សសម្ព័ន្ធជាតិដើម្បីប្រជាធិបតេយ្យ (NLD) ធ្វើកិច្ចការដើម្បីអភិវឌ្ឍប្រទេសមីយ៉ាន់ម៉ា។ នេះបើតាមការផ្សាយរបស់កាសែត The Irrawady ដោយដកស្រង់សម្តីរបស់ចៅប្រុសបង្កើតរបស់លោក ថាន់ ស្វេ។
ជំនួបរវាងលោកស្រី អ៊ុងសាន ស៊ូជី និងលោក ថាន់ ស្វេ បានប្រព្រឹត្តកាលពីថ្ងៃសុក្រកន្លងមក ដោយមានលោក Nay Shwe Thway Aung ចៅប្រុសបង្កើតរបស់លោក ថាន់ ស្វេ ធ្វើជាអន្តរការី។ លោក Thway Aung បានសរសេរនៅលើហ្វេសប៊ុករបស់ខ្លួនថា៖ «បន្ទាប់ពីការបោះឆ្នោត ភាពពិតទាំងអស់ត្រូវតែទទួលយកទាំងអស់គ្នា ដែលថា លោកស្រី អ៊ុងសាន ស៊ូជី គឺជាអនាគតអ្នកដឹកនាំប្រទេសមីយ៉ាន់ម៉ា»។
ចៅប្រុសលោក ថាន់ ស្វេ ដែលមានទំនាក់ទំនងយ៉ាងល្អជាមួយលោកស្រី ស៊ូជី មិនបានបញ្ជាក់ថា អនាគតដឹកនាំប្រទេសនោះ មានន័យថា យ៉ាងម៉េចនោះឡើយ ប៉ុន្តែលោកបានអះអាងថា ជីតារបស់ខ្លួនត្រៀមជួយ និងផ្តល់ប្រឹក្សាដល់លោកស្រី ស៊ូជី ទាក់ទងនឹងការដឹកនាំប្រទេសមីយ៉ាន់ម៉ា៊
ជំនួបរវាងលោកស្រី អ៊ុងសាន ស៊ូជី និងលោក ថាន់ ស្វេ បានប្រព្រឹត្តទៅអស់រយៈពេលជាង២ម៉ោង នៅគេហដ្ឋានរបស់លោក ថាន់ ស្វេ ក្នុងទីក្រុងណៃពីដោ។ លោក Nay Shwe Thway Aung បានទម្លាញពីដំណឹងនៃជំនួបនេះ បន្ទាប់ពីមានការយល់ព្រមពីភាគីទាំងសងខាង៕
© រក្សាសិទ្ធិដោយ thmeythmey.com