អន្តរជាតិ
នយោបាយអន្តរជាតិ
មុនប្តឹង UN អ៊ីរ៉ាក់ដាក់ឱសានវាទឲ្យតួកគីដកទ័ពចេញពីដីខ្លួន៤៨ម៉ោង
× រដ្ឋាភិបាលអ៊ីរ៉ាក់បានចេញមុខគំរាមថានឹងប្រើប្រាស់រាល់វិធានការទាំងអស់រួមទាំងបញ្ជូនរឿងទៅក្រុមប្រឹក្សាសន្តិសុខអង្គការសហប្រជាជាតិផង បើសិនតួកគីមិនព្រមដកទ័ពចេញពីទឹកដីខ្លួនក្នុងពេល៤៨ម៉ោងទេ។ តែតួកគីថា វាជាទម្លាប់ដែលខ្លួនផ្លាស់ប្តូរកងទ័ពនៅតំបន់ Mosul ឲ្យជួយបង្វឹកទ័ពឃឺតដើម្បីច្បាំងដណ្តើមទឹកដីពីក្រុមភេរវជនរដ្ឋឥស្លាម។
លោក មុំ ពិទូរ្យ លម្អិតព័ត៌មាននេះ
វត្តមានទ័ពតួកគីនៅលើទឹកដីភាគខាងជើងអ៊ីរ៉ាក់ កំពុងធ្វើឲ្យរដ្ឋាភិបាលអ៊ីរ៉ាក់ខឹងសម្បារខ្លាំង ហើយរដ្ឋាភិបាលនេះគំរាមនាំយកសំណុំរឿងនេះទៅប្តឹងអង្គការសហប្រជាជាតិ។ នៅថ្ងៃចន្ទនេះ អ៊ីរ៉ាក់បានដាក់ឱសានវាទឲ្យរដ្ឋាភិបាលតួកគី ៤៨ ម៉ោង បើមុនដូច្នេះទេខ្លួននឹងសុំការអន្តរាគមន៍ពីស្ថាប័នក្រុមប្រឹក្សាសន្តិសុខឲ្យបង្ខំតួកគីមិនខាន។
នាយករដ្ឋមន្ត្រីអ៊ីរ៉ាក់ Haider al-Abadi ថ្លែងថា លោក ទុកពេលឲ្យតួកគី ៤៨ម៉ោង សម្រាប់ដកកងទ័ពចេញពីប្រទេសអ៊ីរ៉ាក់ បើមិនដូច្នោះទេរដ្ឋាភិបាលលោកនឹងសុំការអន្តរាគមន៍ពីស្ថាប័នអង្គការសហប្រជាជាតិ។ ក្រុងបាដាដ ប្រកាសថា ការពង្រាយទ័ពរបស់តួកគីមកលើទឹកដីអ៊ីរ៉ាក់ គ្មានការសុំអនុញ្ញាតជាមុនឡើយ ហើយវាពិតជារំលោភលើអធិបតេយ្យរបស់ខ្លួន។
យ៉ាងណាក៏ដោយ រដ្ឋាភិបាលក្រុងអង់ការ៉ា បានអះអាងថា វាជាទម្លាប់របស់កងទ័ពខ្លួនទៅហើយដែលមានវត្តមាននៅជំរុំនៅខេត្ត Mosul នៅភាគខាងជើងអ៊ីរ៉ាក់ ព្រោះកងទ័ពខ្លួនជួយបង្វឹកកងកម្លាំងអាជ្ញាធរឃឺត ដើម្បីទៅច្បាំងដណ្តើមយកទឹកដីពីក្រុមរដ្ឋឥស្លាមឬក្រុមដែស្ហមកវិញ។ តែគេឃើញការលើកឡើងពីខាងតួកគីផងដែរថា វានឹងមិនមានកងទ័ពថ្មីរបស់តួកគីទៅកាន់ទឹកដីអ៊ីរ៉ាក់ឡើយ។ ប៉ុន្តែនាយករដ្ឋមន្ត្រីតួកគី Ahmet Davutoglu មិនបានលើកឡើងពីការចេញបទបញ្ជាឲ្យដកទ័ពតួកគីចេញពីទឹកដីអ៊ីរ៉ាក់ឡើយ។
តួកគីបានអះអាងថា កងទ័ពរបស់ខ្លួនទៅជួយបណ្តុះបណ្តាលនិងផ្តល់ប្រឹក្សាដល់ទាហានអ៊ីរ៉ាក់ ក្នុងការប្រយុទ្ធប្រឆាំងក្រុមភេរវជនរដ្ឋឥស្លាមប៉ុណ្ណោះ។ ហើយតួកគីក៏ប្រកាសផងដែនថា ខ្លួនបន្តពង្រឹងការសហការជាមួយភាគីអ៊ីរ៉ាក់ និង បន្តការប្រឹក្សាគ្នាទៅវិញទៅមកដើម្បីដោះស្រាយបញ្ហានេះដែរ។
យ៉ាងណាមិញកន្លងមក រដ្ឋាភិបាលអ៊ីរ៉ាក់ បានបង្ហាញការជំទាស់រាល់វត្តមានទ័ពបរទេសលើទឹកដីរបស់ខ្លួន ហើយរដ្ឋាភិបាលនេះក៏ប្រឆាំងគម្រោងពង្រាយទ័ពអាមេរិកមកច្បាំងប្រឆាំងក្រុមរដ្ឋឥស្លាមលើទឹកដីអ៊ីរ៉ាក់ផងដែរ។ រដ្ឋាភិបាលក្រុងបាដាដនេះ បញ្ជាក់ថា បើសិនចង់បញ្ជូនទ័ពមកអ៊ីរ៉ាក់ ទាល់តែសុំការអនុញ្ញាតពីខ្លួនជាមុនសិន។
រដ្ឋបាលលោក បារ៉ាក់ អូបាម៉ា កំពុងពិចារណាបញ្ជូនទ័ពបន្ថែមទៅជួយផ្តល់ប្រឹក្សានិងបង្វឹកកងទ័ពរដ្ឋាភិបាលអ៊ីរ៉ាក់ និងក្រុមប្រដាប់អាវុធផ្សេងទៀតដើម្បីពង្រឹងយុទ្ធសាស្ត្រប្រឆាំងក្រុមភេរវជន។ ក្រុងវ៉ាស៊ីនតោនក៏បានសម្រេចរួចទៅហើយថានឹងបញ្ជូនកងទ័ពពិសេសប្រហែល៥០នាក់ទៅកាន់តំបន់ក្រុមឧទ្ទាមស៊ីរីកាន់កាប់ ដោយគ្មានការអនុញ្ញាតពីរដ្ឋាភិបាលក្រុងដាម៉ាស៕
© រក្សាសិទ្ធិដោយ thmeythmey.com