អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
នាយករដ្ឋមន្ត្រីឡេតូនី លោកស្រី Laimdota Straujuma បានប្រកាសចុះចេញពីតំណែងហើយបន្ទាប់ជួបប្រធានាធិបតី Raimonds Vejonis។ ចំណែកឯមូលហេតុពិតប្រាកដនៃការលាលែងនេះមិនត្រូវបានបញ្ចេញនោះទេ។
នៅចន្ទនេះ លោកស្រី Laimdota Straujuma នាយករដ្ឋមន្ត្រីស្ត្រីទីមួយរបស់ឡេតូនី បានប្រកាសលាលែងតំណែងហើយ។ លោកស្រី Straujuma បានប្រកាសដូច្នេះក្រោយពីលោកស្រីបានជួបជាមួយប្រធានាធិបតី Raimonds Vejonis។ លោកស្រីនិយាយថា៖ «ខ្ញុំបានប្រាប់លោកប្រធានាធិបតីរួចហើយ។ រដ្ឋាភិបាលមិនបានបំពេញការងារល្អនោះទេ»។
លោកស្រី Laimdota Straujuma ដែលបានឡើងកាន់អំណាចកាលពីឆ្នាំ២០១៤ ក្រោយការលាលែងរបស់លោក Valdis Dombrovskis នោះ បានក្លាយជាផ្ទាំងស៊ីបនៃពាក្យចចាមអារ៉ាមនៃការលាលែង ជាពិសេសចេញពីគណបក្សលោកស្រីផ្ទាល់តែម្ដង។ ជាក់ស្ដែងកាលពីថ្ងៃទី៤ ខែធ្នូ លោកស្រីបានបញ្ជាក់ថា មានការរៀបចំផែនការប្រឆាំងលោកស្រី។
ជាមួយគ្នានេះដែរ ក្រោយការប្រកាសលាលែងរបស់លោកស្រី Straujuma ប្រធានាធិបតី Vejonis បានប្រកាសថា លោកនឹងពិភាក្សាជាមួយគណបក្សនយោបាយទាំងអស់មុនពេលជ្រើសរើសបេក្ខជននាយករដ្ឋមន្ត្រីសម្រាប់បង្កើតរដ្ឋាភិបាលថ្មី។ លោកបន្តថា រដ្ឋាភិបាលបច្ចុប្បន្នសព្វថ្ងៃកំពុងញាំញីដោយទំនាស់នយោបាយ។
ម្យ៉ាងទៀត ក្នុងសន្និសីទកាសែតមួយ លោក Vejonis ក៏បានបញ្ជាក់ទៀតថា ៖«យើងត្រូវតែគិតពីបញ្ហាខាងក្រៅផងដែរដូចជា ការគំរាមកំហែងនៅអឺរ៉ុបក៏ដូចជាវិបត្តជនភៀសខ្លួន។ ដូច្នេះហើយបានជាយើងត្រូវការរដ្ឋាភិបាលថ្មីមួយដែលអាចដោះស្រាយរឿងនេះបាន»៕
© រក្សាសិទ្ធិដោយ thmeythmey.com
