អន្តរជាតិ
លោកស្រីស៊ូជី៖ រដ្ឋាភិបាលថ្មីនឹងប្រឆាំងអំពើពុករលួយ តែមិនសងសឹកអ្នកធ្លាប់ប្រព្រឹត្តខុសទេ
× ខណៈការបង្កើតរដ្ឋាភិបាលនីតិកាលថ្មី កាន់តែខិតជិតមកដល់ ម្ចាស់លាភីនៃការបោះឆ្នោតមីយ៉ាន់ម៉ា លោកស្រី អ៊ុងសាន សូជី បានលើកឡើងថា ការប្រឆាំងអំពើពុករលួយ គឺជាវិស័យអាទិភាពមួយដែល ស្ថាប័ននីតិប្រតិបត្តិ ត្រូវធ្វើ។ តែលោកស្រី ក៏បានសន្យាថា មិនសងសឹងទៅលើអ្នកដែលធ្លាប់ប្រព្រឹត្ត ខុសកាលពីអាណត្តិមុននោះទេ។
កាលពីចុងសបា្តហ៍កន្លងទៅ មេដឹកបក្សសម្ព័ន្ធជាតិដើម្បីប្រជាធិបតេយ្យ លោកស្រី អ៊ុងសាន ស៊ូជី បានបើកកិច្ចប្រជុំជាន់ខ្ពស់មួយជាមួយនឹងសមាជិកបក្ស ដែលជាតំណាងរាស្ត្រដែលទើបតែត្រូវបាន ជ្រើសរើសក្នុងការបោះឆ្នោតកាលពីថ្ងៃទី០៨ ខែវិច្ឆិកា ដើម្បីពិភាក្សាគោលនយោបាយសម្រាប់អាណត្តិ ថ្មី។ នេះបើយោងតាមសារព័ត៌មាន Eleven ។
ក្នុងជំនួបជាមួយនឹងសមាជិកបក្សរបស់ខ្លួន លោកស្រី ស៊ូជី បានលើកឡើងពីបញ្ហាបីចម្បងដែលរដ្ឋាភិបាលថ្មី នឹងត្រូវធ្វើ រួមមាន ការអនុវត្តនីតិរដ្ឋ សន្តិភាពក្នុងប្រទេស និងការផ្សះផ្សាជាតិ។
តែអ្វីគួរកត់សម្គាល់នោះ លោកស្រី បានសង្កត់ថាស្ថាប័ននីតិប្រតិបត្តិថ្មី នឹងចាប់ផ្តើមយុទ្ធនាការប្រឆាំង អំពើពុករលួយ។ ទន្ទឹមនឹងយុទ្ធនាការនេះ លោកស្រី ក៏បានសង្កត់ធ្ងន់ថា « ការសងសឹងគ្នាក្នុងស្ថាប័ន កំពូល គឺមិនត្រូវឲ្យមាននោះទេ។ ធម្មជាតិមនុស្ស គឺគ្មានអ្នកណាមិនចេះខុស ហើយយើងនឹងផ្តល់ឱកាសសម្រាប់អ្នកដែលធ្លាប់បានប្រព្រឹត្តខុសដើម្បីកែប្រែ»។
លោកស្រី ស៊ូជី ក៏បានប្រាប់ទៅកាន់សមាជិកបក្សខ្លួនទៀតថា រដ្ឋបាលរដ្ឋាភិបាលថ្មី ត្រូវតែបង្ហាញឲ្យ ប្រជាជនឃើញពីសមត្ថភាពពិតរបស់ខ្លួន។ ជាពិសេសនោះ រាល់តំណាងរាស្ត្រទាំងអស់ ត្រូវគិតប្រយោជន៍ប្រជាជន ជាជាងផលប្រយោជន៍ផ្ទាល់ខ្លួន។
សូមបញ្ជាកផងដែរថា បក្សសម្ព័ន្ធជាតិដើម្បីប្រជាធិបតេយ្យលោកស្រី អ៊ុងសាន ស៊ូជី បានទទួល សំឡេងលើសពីភាគច្រើនដាច់ខាតក្នុងការបង្កើតរដ្ឋាភិបាលថ្មីមួយបាន។ ហើយ ចុងក្រោយនេះ លោកស្រី ក៏បានទទួលការស្វាគមន៍ និងសហការក្នុងការផ្ទេរអំណាចដោយសន្តិវិធី ពីរដ្ឋាភិបាលជិតផុតអាណត្តិលោកថេន សេន និង មេយោធា លោក មិន អ៊ុងឡាំងផងដែរ។ ចុងក្រោយនេះ អតីតមេដឹកនាំផ្តាច់ការលោក ថាន់ ស្វេ ក៏បានទទួលស្គាល់ថា លោកស្រី ស៊ូជី នឹងកា្លយជាមេដឹកនាំ មីយ៉ាន់ម៉ានាពេលអនាគតផងដែរ។
ដោយឡែក អ្វីដែលលោកស្រី ស៊ូជី ត្រូវធ្វើក្នុងអាណត្តិរដ្ឋាភិបាលថ្មី នោះគឺការបង្ហាញសមត្ថភាពទៅកាន់ប្រជាជនដើម្បីកសាងទំនុកចិត្ត ក្នុងការដឹកនាំប្រទេសជាលើកដំបូង៕
© រក្សាសិទ្ធិដោយ thmeythmey.com