អន្តរជាតិ
នយោបាយអន្តរជាតិ
ប៉ូឡូញចង់ឲ្យណាតូពង្រាយគ្រាប់នុយក្លេអ៊ែរទៅការពារខ្លួន និងទប់ទល់រុស្សី
×![]()
ដោយ: តន ចាន់រិទ្ធារ៉ា
រដ្ឋមន្ត្រីការពារជាតិប៉ូឡូញបានបង្ហាញពីចេតនាស្នើឲ្យអង្គការណាតូពង្រាយអាវុធនុយក្លេអ៊ែរនៅលើទឹកដីរបស់ខ្លួនដើម្បីការពារការគំរាមកំហែងពីសំណាក់រុស្សី។ ប៉ុន្តែសំណើបែបនេះ ប្រហែលជាបង្កឲ្យរុស្សីខឹងសម្បារខ្លាំងមិនខានឡើយ។
ក្នុងពេលផ្ដល់សម្ភាសដល់ទូរទស្សន៍ Polsat រដ្ឋមន្ត្រីការពារជាតិប៉ូឡូញ លោក Tomasz Szatkowski បានបញ្ជាក់ពីគោលបំណងសុំពង្រាយអាវុធនុយក្លេអ៊ែររបស់បក្សសម្ព័ន្ធណាតូក្នុងទឹកដីប៉ូឡូញ។ លោក Szatkowski និយាយថា៖ «យើងកំពុងគិតថា គួរតែស្នើសុំប្រើប្រាស់កម្មវិធីនុយក្លេអ៊ែរឬទេ ដើម្បីយកមកពង្រឹងប្រព័ន្ធការពារប្រទេស»។
នេះគឺជាលើកដំបូងហើយដែលមន្ត្រីប៉ូឡូញបានថ្លែងពីគោលបំណងចង់ឲ្យមានការពង្រាយអាវុធប្រភេទនេះលើទឹកដីរបស់ខ្លួន។ ប៉ុន្តែប្រភពព័ត៌មានផ្សេងទៀតបានបញ្ជាក់ថា ទីក្រុងវ៉ាសូវីមិនបានស្នើឬក៏ស្វះស្វែងសុំអាវុធនុយក្លេអ៊ែរមកដាក់ក្នុងទឹកដីខ្លួនទេ។
យ៉ាងណាក៏ដោយ ប្រសិនបើនេះជារឿងពិតមែននោះ អ្នកដែលបារម្ភនិងមិនសប្បាយចិត្តជាងគេគឺទីក្រុងមូស្គូ។ រុស្សីប្រាកដជាឆ្លើយតបចំពោះសកម្មភាពបង្ករឿងនេះមិនខាន។ ជាក់ស្ដែងកាលពីខែមិថុនាកន្លងមក ប្រធានាធិបតីរុស្សី វ្ល៉ាឌីមៀ ពូទីន បានគំរាមហើយថា ប្រសិនបើណាតូគំរាមកំហែងដល់រុស្សី នោះខ្លួននឹងឆ្លើយតបជាមិនខាន។
ចំណែកឯរដ្ឋមន្ត្រីការបរទេសរុស្សីលោក Sergey Lavrov ក៏បានរម្លឹកពីការសន្យារបស់ប្រធានាធិបតី អូបាម៉ា ដែលថា ប្រសិនបើបញ្ហានុយក្លេអ៊ែររបស់អ៊ីរ៉ង់ត្រូវបានដោះស្រាយ នោះកម្មវិធីប្រព័ន្ធការពារអាកាសនៅអឺរ៉ុបនឹងមិនលេចជារូបរាងទេ។
គ្រប់គ្នាដឹងហើយថា ប៉ូឡូញគឺជាសម្ព័ន្ធមិត្តដ៏ស្មោះត្រង់មួយរបស់ណាតូ ចាប់តាំងពីឆ្នាំ១៩៩៩មក។ ហើយប៉ូឡូញតែងតែចង់ចងសម្ព័ន្ធភាពជាមួយណាតូកាន់តែរឹងមាំនាពេលអនាគត។ ជាពិសេសនោះ កាលពីខែកញ្ញា សភាប៉ូឡូញ បានផ្ដល់ភ្លើងខៀវដល់ប្រធានាធិបតី Andrzej Duda ដើម្បីផ្ដល់សច្ចាប័នកិច្ចព្រមព្រៀងរវាងរដ្ឋាភិបាលប៉ូឡូញនិងអាមេរិកក្នុងការបង្កើតមូលដ្ឋានប្រឆាំងមីស៊ីលនៅឯតំបន់ Redzikowo និងអាចចាប់ផ្ដើមប្រតិបត្តិការនៅឆ្នាំ២០១៨។
គួរបញ្ជាក់ដែរ ចាប់បន្ទាប់ពីឈ្នះឆ្នោតកាលពីខែឧសភាកន្លងមក ការងារដំបូងរបស់ប្រធានាធិបតី Andrzej Duda គឺស្នើសុំណាតូបញ្ជូនទ័ពបន្ថែមមកតាំងក្នុងទឹកដីប៉ូឡូញ។ លោកបានអះអាងថា ប៉ូឡូញមិនចង់ធ្វើជាតំបន់ទ្រនាប់នោះទេ តែជារណសិរ្សប្រយុទ្ធប្រចាំតំបន់អឺរ៉ុបខាងកើត៕
Tag:
ប៉ូឡូញ
© រក្សាសិទ្ធិដោយ thmeythmey.com
