អន្តរជាតិ
នយោបាយអន្តរជាតិ
កាណាដា ដកយន្តហោះចម្បាំងពីប្រតិបត្តិការកម្ទេចISIS ផ្គាប់ចិត្តប្រជាជន
×
ចុងក្រោយរដ្ឋាភិបាលកាណាដា សម្រេចដកយន្តហោះចម្បាំងចេញពីប្រតិបត្តិការកម្ទេចក្រុមរដ្ឋឥស្លាម ក្នុងប្រទេសស៊ីរី និងអ៊ីរ៉ាក់ពីសម្ព័ន្ធយោធាដែលកំពុងដឹកនាំដោយរដ្ឋាភិបាលអាមេរិក។ ការសម្រេចដក ទ័ពខណៈពេលដែលប្រតិបត្តិការកំពុងតែឡើងកម្តៅ គឺដើម្បីអនុវត្តដូចទៅនឹងការសន្យាររបស់លោកនាយករដ្ឋមន្ត្រី Justin Trudeau នៅអំឡុងពេលឃោសនាបោះឆ្នោត។
លោក ទេព អ៊ីវិសាល លម្អិតព័ត៌មាននេះ
រដ្ឋមន្ត្រីការបរទេសកាណាដា Stephane Dion បានបញ្ជាក់ជាថ្មីកាលពីថ្ងៃម្សិលមិញថា រដ្ឋាភិបាលកាណាដា នឹងដកយន្តហោះចម្បាំងចំនួន៦គ្រឿងពីសម្ព័ន្ធយោធាអាមេរិកដែលកំពុងប្រតិបត្តិការកម្ទេចក្រុមរដ្ឋឥស្លាមនៅស៊ីរី និង អីរ៉ាក។ ការដកទ័ពនេះ នឹងត្រូវធ្វើឡើងក្នុងរយៈពេលពីរឬបីសប្តាហ៍ខាងមុខនេះ។
តាមការអះអាងរបស់លោក Dion កាណាដា មានចំណែក២ភាគរយនៃប្រតិបត្តិការដែនអាកាស វាយកម្ទេចក្រុមរដ្ឋឥស្លាមនៅក្នុងប្រទេសស៊ីរី និងអីរ៉ាក់។ ប្រតិបត្តិការនេះដែរ បានចាប់ផ្តើមតាំងពីឆ្នាំ ២០១៤មកម្ល៉េះ ពោលគឺតាំងពីកាណាដា ស្ថិតក្រោមការដឹកនាំដោយអតីតនាយករដ្ឋមន្ត្រីកាណាដា លោក Stephen Harper ដែលមាននិន្នាការទៅរកអាមេរិក។
យ៉ាងណាក៏ដោយ ដូចដែលបានបញ្ជាក់ជាមួយនឹងអ្នកសារព័ត៌មាន ទ័ពអាកាសកាណាដា នឹងមិនមាន ទៀតទេ ក្នុងប្រតិបត្តិការកម្ទេចក្រុមរដ្ឋឥស្លាម។ ហើយចំណាត់ការនេះ គឺជាគោលនយោបាយការ បរទេសមួយដែលលោកនាយករដ្ឋមន្ត្រីថ្មីកាណាដា Justin Trudeau ប្រើប្រាស់ដើម្បីទាក់ទាញប្រជា ប្រិយភាពរបស់ខ្លួនមុនពេលនៃការបោះឆ្នោត។
តាមពិតទៅ លោក Justin Trudeau ក៏ធ្លាប់បានប្រកាសជាច្រើនមកហើយជុំវិញនៃការកងទ័ពអាកាសចេញប្រតិបត្តិការនេះ។ ពេលដំបូងបង្អស់ គឺធ្វើឡើងនៅពេលដែលបក្សសេរីនិយមរបស់លោក បាន ទទួលជ័យជម្នះភ្លូកទឹកភ្លូកដីលើបក្សកាន់អំណាចដែលធ្លាប់ដឹកនាំប្រទេសអស់រយៈពេលបីអាណត្តិ ហើយនោះ។ ហើយពេលចុងក្រោយ ដែលលោក Trudeau បានធ្វើឡើងនោះ គឺនៅក្នុងឱកាសនៃ កិច្ចប្រជុំកំពូលG20 ដែលមានវត្តមានប្រធានាធិបតី លោក បារ៉ាក់ អូបាម៉ានៅទីនោះផងដែរ។ គោលនយោបាយនេះ នឹងធ្វើឲ្យប្រជាជនកាណាដា កាន់តែមានទំនុកចិត្តលើលោក Trudeau ដ្បិត លោក ហ៊ានធ្វើអ្វីដែលខ្លួនបានសន្យាកាលពីកន្លងទៅ។
ថ្វីដ្បិត កាណាដា ដកកងទ័ពអាកាសរបស់ខ្លួនចេញពីប្រតិបត្តិការក៏ដោយ កាណាដា នៅតែបន្តផ្តល់ ជំនួយ និងត្រៀមបញ្ជូនទាហានបន្ថែមដើម្បីទៅហ្វឹកហ្វឺនកងទាហានដែលកំពុងតែប្រយុទ្ធជាមួយឧទ្ទាម Kurd នៅភាគខាងជើងនៃប្រទេសអីរ៉ាក់។
អ្វីគួរកត់សម្គាល់នោះ ជំនួសការបន្តប្រតិបត្តិវាយកម្ទេចក្រុមរដ្ឋឥស្លាម លោកនាយករដ្ឋមន្ត្រី Justin Trudeau បានប្រកាសទទួលយកជនភៀសខ្លួនប្រមាណជាងពីរម៉ឺននាក់នៅចុងឆ្នាំ២០១៥នេះ។ តែ ចំណាត់ការនេះ ហាក់ដូចជាមិនទទួលបានការស្វាគមន៍ពីសហគមន៍អន្តរជាតិប៉ុន្មាននោះទេ ដ្បិត គេខ្លាចក្រែងក្រុមភេរវជនរដ្ឋឥស្លាមបង្កប់ខ្លួនជាមួយនឹងជនភៀសខ្លួនទាំងនោះ៕
© រក្សាសិទ្ធិដោយ thmeythmey.com