អន្តរជាតិ
សិង្ហបុរីអនុញ្ញាតឲ្យអាមេរិកពង្រាយយន្តហោះស៊ើបការណ៍នៅលើទឹកដីខ្លួន
× សិង្ហបុរីបានអនុញ្ញាតឲ្យអាមេរិកពង្រាយយន្តហោះស៊ើបការណ៍មកធ្វើប្រតិបត្តិការនៅលើទឹកដីរបស់ខ្លួនដើម្បីជាជំនួយដល់ការការពារសន្តិសុខដែនសមុទ្រ។ ការសម្រេចនេះបានធ្វើឡើងនៅជំនួបរវាងរដ្ឋមន្ត្រីការពារជាតិអាមេរិកលោក Ashton Carter និងសមភាគីសិង្ហបុរីលោក Ng Eng Hen នៅឯមន្ទីរបញ្ចកោណកាលពីថ្ងៃចន្ទម្សិលមិញ។
រដ្ឋាភិបាលសិង្ហបុរីបានឲ្យមានការពង្រាយយន្តហោះស៊ើបការណ៍ប្រភេទ P8 Poseidon របស់សហរដ្ឋអមេរិកនៅក្នុងសិង្ហបុរី ដើម្បីជាការគាំទ្រដល់ប្រតិបត្តិការការពារដែនសមុទ្រ។ ក្នុងជំនួបរវាងរដ្ឋមន្ត្រីការពារជាតិអាមេរិកនិងសិង្ហបុរី ភាគីទាំងពីរបានអបអរសាទរដល់ការសម្រេចនេះ ចំពេលដែលប្រទេសទាំងពីរកំពុងតែពង្រឹងចំណងមិត្តភាពរវាងគ្នា។
ទាំងលោក Carterនិងលោក Ng សុទ្ធតែបានបង្ហាញពីការរីករាយចំពោះការពង្រាយយន្តហោះប្រភេទ P8 នេះ ហើយថែមទាំងបញ្ជាក់ថា ការពង្រាយនេះនឹងជួយដល់ជំរុញដល់ប្រតិបត្តិការរួមគ្នារវាងកងយោធានៃប្រទេសក្នុងតំបន់តាមរយៈការធ្វើសមយុទ្ធទ្វេភាគីនិងពហុភាគី។ ម្យ៉ាងទៀត វាក៏នឹងជួយដល់ប្រតិបត្តិការមនុស្សធម៌ក៏ដូចជាសន្តិសុខលំហសមុទ្រផងដែរ។សិង្ហបុរីបានក្លាយជាប្រទេសទីបួនហើយ ដែលអាមេរិកបានបានដាក់ពង្រាយយន្តហោះប្រភេទ P8 Poseidon បន្ទាប់ពីប្រទេសជប៉ុន ហ្វីលីពីននិងម៉ាលេស៊ី។
លើសពីនេះទៅទៀត មន្ត្រីការពារជាតិអាមេរិកបានបញ្ជាក់ដែរថា នៅថ្ងៃអនាគតអាចនឹងមានការដាក់ពង្រាយជាបន្តទៅទៀត។ ប៉ុន្តែការពង្រាយនេះ មិនបានធ្វើឲ្យចិនសប្បាយចិត្តនោះទេ ហើយវាគឺចំពេលដែលបញ្ហាសមុទ្រចិនខាងត្បូងនៅតែមានកម្ដៅខ្លាំងនៅឡើយដោយសារតែការទាមទាររបស់ចិនក្នុងការគ្រប់គ្រងសឹងតែទាំងអស់នៃសមុទ្រនេះ។
ទីក្រុងវ៉ាស៊ីងតោនតែងរិះទីក្រុងប៉េកាំងចំពោះការសាងសង់កោះសិប្បនិមិត្តក្នុងប្រជុំកោះសប្រ៉ាតលីដែលកំពុងមានជម្លោះនៅឡើយ។ ហើយអាមេរិកខ្លួនឯងក៏បានបញ្ជូនយន្តហោះទៅកាន់តំបន់នោះជាញឹកញាប់ផងដែរ។
គួរបញ្ជាក់ដែរ ចិននិងអាមេរិកតែងខ្វែងគំនិតគ្នារឿងសមុទ្រចិននេះ។ ជាក់ស្ដែង កាលពីខែមុន ប្រធានាធិបតី អូបាម៉ា បានស្នើឲ្យចិនបញ្ឈប់ការសាងសង់កោះសិប្បនិមិត្ត។ តែចិនបានឆ្លើយតបវិញថា ខ្លួននៅតែបន្តសកម្មភាពរបស់ខ្លួនដដែល ពីព្រោះនេះជាទឹកដីរបស់ចិន៕
© រក្សាសិទ្ធិដោយ thmeythmey.com