អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
ចិននិងរុស្សីបានប្រឆាំងគម្រោងការរបស់អាមេរិកដែលចង់កោះប្រជុំក្រុមប្រឹក្សាសន្តិសុខលើករណីរំលោភសិទ្ធិមនុស្សនៅកូរ៉េខាងជើង។ នេះបើយោងតាមការប្រាប់របស់មន្ត្រីការទូតនៅអង្គការសហប្រជាជាតិ។
ប្រភពពីអង្គការសហប្រជាជាតិបានឲ្យដឹងថា ចិននិងរុស្សីបានចេញមុខប្រឆាំងអាមេរិកដែលចង់បើកកិច្ចប្រជុំក្រុមប្រឹក្សាសន្តិសុខដើម្បីពិភាក្សាលើបញ្ហារំលោភសិទ្ធិមនុស្សរបស់ទីក្រុងព្យុងយ៉ាង។ ផែនការកោះប្រជុំនេះបានលេចជារូបរាង ក្រោយពេលអង្គការសហប្រជាជាតិបញ្ចេញរបាយការណ៍ថា ស្ថានភាពសិទ្ធិមនុស្សកូរ៉េខាងជើងមានលក្ខណៈដូចនឹងអ្វីដែលបានកើតឡើងកាលពីសម័យណាស៊ី។
កាលពីថ្ងៃសុក្រសប្ដាហ៍មុន សហរដ្ឋអាមេរិកដែលជាប្រធានប្ដូរវេនរបស់ក្រុមប្រឹក្សាសន្តិសុខប្រចាំខែឆ្នូនេះ បានកោះប្រជុំសមាជិកទាំង១៥ដើម្បីពិភាក្សាករណីសិទ្ធិមនុស្សកូរ៉េខាងជើង។ ប្រទេសជាសមាជិកចំនួន៨ ដែលភាគច្រើនជាសម្ព័ន្ធមិត្តរបស់អាមេរិក បានគាំទ្រការកោះប្រជុំនេះ ខណៈចិននិងរុស្សីបានឲ្យដំណឹងពីការមិនយល់ស្របចំពោះរឿងនេះ។
មន្ត្រីការទូតម្នាក់បានដកស្រង់សម្ដីមន្ត្រីទូតចិនប្រចាំUN ថា ចិនបានប្រាប់ទៅកាន់ប្រទេសសមាជិកថា ក្រុមប្រឹក្សាសន្តិសុខមិនខ្វល់ជាមួយរឿងសិទ្ធិមនុស្សទេ ហើយគួរតែផ្ដោតលើបញ្ហាសន្តិសុខវិញ។ ចំណែករុស្សីវិញបានលើកឡើងពីនីតិវិធីនៃកិច្ចប្រជុំនេះ ដោយបាននិយាយថា អាមេរិកមិនបានបញ្ចូលបញ្ហានេះទៅក្នុងរបៀបវារៈប្រចាំខែធ្នូនោះទេ។
កាលពីឆ្នាំមុន UN បានបញ្ចេញរបាយការណ៍មួយស្ដីពីស្ថានភាពសិទ្ធិមនុស្សនៅកូរ៉េខាងជើង។ របាយការណ៍នេះបានបង្ហាញថា មានការរំលោភសិទ្ធិមនុស្សយ៉ាងធ្ងន់ធ្ងរដូចជា ជំរំឃុំខ្លួន ការធ្វើទារុណកម្មជាប្រព័ន្ធ គ្រោះអត់ឃ្លាននិងការសម្លាប់មនុស្សតាមរបៀបណាស៊ីជាដើម។
ជាមួយរបាយការណ៍ខាងលើនេះ មហាសន្និបាតUN បានទាមទារឲ្យក្រុមប្រឹក្សាសន្តិសុខសម្រេចបញ្ជូនករណីរំលោភសិទ្ធិរបសកូរ៉េខាងជើងទៅកាន់តុលាការឧក្រិដ្ឋកម្មអន្តរជាតិចំពោះឧក្រិដ្ឋកម្មប្រឆាំងមនុស្សជាតិ។ យ៉ាងណាក៏ដោយ ការប៉ុនប៉ងនេះប្រហែលតែជាការស្រមើស្រមៃមួយប៉ុណ្ណោះ។ វត្តមានចិននិងរុស្សីដែលជាបងធំរបស់ទីក្រុងព្យុងយ៉ាងក្នុងក្រុមប្រឹក្សាគឺជារឿងពិបាកមួយ។ ប្រទេសទាំងពីរនេះនឹងវ៉េតូរាល់ការសម្រេចនេះជាមិនខានឡើយ។
Tag:
កូរ៉េខាងជើង
សិទ្ធិមនុស្ស
© រក្សាសិទ្ធិដោយ thmeythmey.com
