ជាតិ
សង្គមជាតិ
បារាយណ៍ទឹកថ្លាជួយកសិករផលិតស្រូវប្រាំងបាន៤ពាន់ហិកតា
× សៀមរាប៖ បារាយណ៍ទឹកថ្លា ឫបារាយណ៍ខាងលិច គឺជាតំបន់មួយសំខាន់ នៅក្នុងតំបន់អង្គរ។ ក្រៅពី ជាតំបន់រមណីយដ្ឋានដ៏ទាក់ទាញមួយហើយនោះ បារាយណ៍ទឹកថ្លា ក៏ជាប្រភពទឹកមួយយ៉ាងសំខាន់ សម្រាប់កសិករបង្កបង្កើតផលកសិកម្មផងដែរ។ ផលពីទឹកបារាយណ៍នេះ ធ្វើឲ្យកសិករដែលពឹងអាស្រ័យលើទឹក អាចបង្កបង្កើតផលស្រូវប្រាំងបាន ចំនួន៤០០០ហិកតាក្នុងមួយឆ្នាំៗ ។
ពលរដ្ឋប្រមាណ៨០០នាក់ បានចូលរួមសកម្មភាព ស្ដារ និងសម្អាតប្រឡាយបារាយណ៍ទឹកថ្លា ឫហៅបារាយណ៍ខាងលិច ដែលជាប្រព័ន្ធទឹកយ៉ាងសំខាន់សម្រាប់ពួកគេ។ សកម្មភាពនេះ ធ្វើឡើងនៅព្រឹកថ្ងៃទី ៩ ធ្នូ ក្នុងបំណង ដើម្បីឲ្យប្រព័ន្ធទឹក ហូរបានលឿន និងងាយស្រួលក្នុងការបូមបញ្ចូលស្រែ។
ប្រធានសមាគមកសិករប្រើប្រាស់ទឹកបារាយណ៍ខាងលិច លោក ហួត ហាយ បានឲ្យដឹងថា កសិករដែលពឹងអាស្រ័យផលដោយទឹកបារាយណ៍មាន៩ឃុំសង្កាត់ ដែលស្ថិតនៅក្នុងក្រុងសៀមរាប និងស្រុកពួក។ ផ្ទៃដីធ្វើស្រែមានចំនួន ១២០០០ហិកតា ដែលបាននិងកំពុងពឹងអាស្រ័យលើប្រព័ន្ធបារាយណ៍ទឹកថ្លា ក្នុងនោះ ៤០០០ហិកតា ជាស្រែប្រាំង។ នេះជាការបញ្ជាក់របស់ លោក ហាយ ដែលជាប្រធានសមាគម និងដឹកនាំកសិករចុះសម្អាតប្រឡាយ។
នៅដើមខែ កក្កដា ឆ្នាំ២០១៤ រាជរដ្ឋាភិបាល បានចេញសេចក្តីសម្រេច ប្រគល់បារាយណ៍ទឹកថ្លា ដែលពីមុនស្ថិតក្រោមការគ្រប់គ្រងរបស់ក្រសួងធនធានទឹក មកឲ្យអាជ្ញាធរអប្សរា គ្រប់គ្រងជំនួស។ ជាបន្តបន្ទាប់ បារាយណ៍ទឹកថ្លា មានការជួសជុល និងរៀបចំហេដ្ឋារចនាសម្ព័ន្ធជាច្រើន ក្នុងនោះមានការជួសជុលទ្វារទឹក ស្ដារប្រឡាយចាស់ៗក្នុងភូមិឃុំមួយចំនួន ដើម្បីឲ្យពលរដ្ឋប្រើប្រាស់។ សកម្មភាពជាច្រើនមានជាហូរហែរ តួយ៉ាងការសម្អាតប្រឡាយនៅពេលនេះ ក្នុងបំណងជួយសម្រួលទឹក ឲ្យហូរលឿនជាពេលមុន ហើយដែលអាចស្រោចស្រពដល់ស្រែប្រាំង ដែលនៅខាងក្រោមៗបាន ។
លោក ជូ រ៉ាឌីណា អនុប្រធាននាយកដ្ឋានគ្រប់គ្រងទឹក នៃអាជ្ញាធរជាតិអប្សរា បានឲ្យដឹងថា រយៈពេលជាងមួយឆ្នាំក្នុងកាគ្រប់គ្រងរបស់ខ្លួន អាជ្ញាធរជាតិអប្សរា បានសហការគ្នាយ៉ាងល្អជាមួយសហគមន៍ ដែលប្រើប្រាស់ទឹកបារាយណ៍ ដើម្បីដឹងពីតម្រូវការរបស់កសិករ។ លោកបញ្ជាក់ថា ពលរដ្ឋមានចិត្តរីករាយជាងមុន ព្រោះអាចផលិតស្រូវប្រាំង និងមិនខ្វះទឹកដូចពេលមុន។ លោក រ៉ាឌីណា បន្ថែម៖ យើងឃើញថា មានស្រែខ្លះ ដែលពេលមុនមិនអាចធ្វើស្រែបាន ឥឡូវគាត់ធ្វើវិញបាន។ ដូចនៅខាងសង្កាត់ស្វាយដង្គំ ពីមុនគាត់មិនអាចទាញប្រយោជន៍ពីទឹកក្នុងបារាយណ៍ តែពេលនេះគាត់អាចប្រើប្រាស់បាន។ នេះជាជោគជ័យរបស់យើង»។
អាជ្ញាធរជាតិអប្សរា ទទួលសិទ្ធិគ្រប់គ្រងបារាយណ៍ទឹកថ្លាពីរដ្ឋាភិបាល ដោយក្នុងនោះត្រូវទទួលខុសត្រូវទាំងស្រុងលើតម្រូវការទឹកសម្រាប់ស្រូវចំនួន ១២០០០ហិកតា ក្នុងនោះមានស្រូវប្រាំង ៤០០០ហិកតា រួមនិងដំណាំរួមផ្សំមួយចំនួនទៀតប្រមាណ ១០០០ហិកតា។ ក្នុងការគ្រប់គ្រងនេះ ត្រូវធានាដោះស្រាយរាល់គ្រោះទឹកជំនន់ រាំងស្ងួត ដែលអាចកើតមានជាយថាហេតុក្នុងតំបន់ទាំងនោះ៕
© រក្សាសិទ្ធិដោយ thmeythmey.com