ស្រា ស ស្រាថ្នាំ និងសាច់ឆ្កែ សម្លាប់ពលរដ្ឋ១០នាក់ហើយនៅស្នួល ខេត្តក្រចេះ

ជាតិ

សុខភាព

ស្រា ស ស្រាថ្នាំ និងសាច់ឆ្កែ សម្លាប់ពលរដ្ឋ១០នាក់ហើយនៅស្នួល ខេត្តក្រចេះ

11, Dec 2015 , 11:50 am

រូបភាព

ដោយ: ខន ចំប៉ា

មនុស្សយ៉ាងហោចណាស់១០នាក់ហើយ បានស្លាប់ដោយសារការបរិភោគស្រាស ស្រាថ្នាំ និងសាច់ឆ្កែ។ វាជាករណីដាច់ដោយឡែកពីគ្នា ប៉ុន្តែបានកើតឡើងជាបន្តបន្ទាប់នាអំឡុងខែធ្នូនេះ នៅក្នុងស្រុកស្នួល ខេត្តក្រចេះ។

លោក ឈ្នាង សុវុត្ថា ប្រធានមន្ទីរសុខាភិបាលខេត្តក្រចេះ បានថ្លែងប្រាប់សារព័ត៌មានថ្មីៗតាមទូរសព្ទនាថ្ងៃសុក្រនេះថា ពលរដ្ឋ១០នាក់ ដែលរស់នៅក្នុងស្រុកស្នួល ខេត្តក្រចេះ បានស្លាប់ដោយសារករណីបរិភោគស្រា និងសាច់សត្វដែលងាប់ គ្មានការត្រួតពិនិត្យ។

លោកបានរៀបរាប់លំអិតថា៖«ពលរដ្ឋក្នុងភូមិស្នួលកើត ឃុំស្នួល ចំនួន៦នាក់ស្លាប់ដោយសារផឹកស្រា និងហូបសាច់ឆ្កែដែលងាប់ ពលរដ្ឋ៣នាក់ទៀតរស់នៅភូមិស្រែថ្មី ឃុំឃ្សឹម ស្លាប់បន្ទាប់ពីផឹកស្រា និងម្នាក់ទៀតនៅភូមិគ្រង ឃុំស្នួល ស្លាប់ដោយសារផឹកស្រា»។

បើតាមប្រធានមន្ទីរសុខាភិបាលខេត្តក្រចេះ កាលពីខែវិច្ឆិកាកន្លងទៅ ក៏មានពលរដ្ឋក្នុងខេត្តក្រចេះ៣នាក់ដែរ បានស្លាប់ដោយសារពុលស្រា និងបរិភោគសាច់សត្វដែលងាប់នេះ ខណៈរយៈពេល២ខែចុងក្រោយ មានពលរដ្ឋដែលឈឺជាង១០០នាក់។

ទាក់ទងនឹងករណីបរិភោគស្រា និងសាច់ឆ្កែ ដែលបានបណ្តាលឲ្យមនុស្សនៅក្នុងភូមិស្នួលកើត ឃុំស្នួល៦នាក់ស្លាប់ កាលពីថ្ងៃទី៧ខែធ្នូកន្លងទៅ លោក ឈ្នាង សុវុត្ថា បានបញ្ជាក់ថា មន្ត្រីសុខាភិបាលខេត្តកំពុងបន្តការត្រួតពិនិត្យ និងអង្កេត នៅតាមភូមិ ឃុំ ផ្សេងទៀត។

លោក ឈ្នាង សុវុត្ថា ក៏បានស្នើឲ្យប្រជាពលរដ្ឋឈប់បរិភោគស្រា ជាពិសេសស្រាគ្មានការត្រួតពិនិត្យត្រឹមត្រូវ ឬសាច់សត្វងាប់ដោយសារការបំពុល ឬមានជំងឺ ឬអាហារមានជាតិពុល ឬមានមេរោគ ដើម្បីចៀសវាងការឈឺ ឬស្លាប់ដែលអាចកើតឡើង។ ជាមួយគ្នានោះ លោកក៏បានប្រាប់ឲ្យប្រជាពលរដ្ឋ រាយការណ៍ទៅមន្ទីរសុខាភិបាល នៅពេលឃើញមានសត្វងាប់ និងប្រញាប់ទៅមន្ទីរពេទ្យនៅពេលមានករណីមិនស្រួលខ្លួន។

សូមបញ្ជាក់ថា កាលពីថ្ងៃទី៧ធ្នូកន្លងទៅ ពលរដ្ឋរស់នៅភូមិស្នួលកើត ឃុំស្នួល ស្រុកស្នួល ខេត្តក្រចេះ បានបាត់បង់ជីវិតដល់ចំនួន ៦នាក់ហើយ ចំណោមពលរដ្ឋរងគ្រោះចំនួន៣៦នាក់ ដែលកំពុងសម្រាកព្យាបាលនៅមណ្ឌលសុខភាពស្រុកស្នួល និងមន្ទីពេទ្យបង្អែកខេត្តក្រចេះ ពាក់ព័ន្ធនឹងករណីហូបស្រា ជាមួយសាច់ឆ្កែដែលគេបំពុល៕