ព្រះអង្គ រណឫទ្ធិ ចង់ធ្វើមេអណ្តើកឲ្យលោក ហ៊ុន សែន និងលោក សម រង្ស៊ី

ជាតិ

នយោបាយជាតិ

ព្រះអង្គ រណឫទ្ធិ ចង់ធ្វើមេអណ្តើកឲ្យលោក ហ៊ុន សែន និងលោក សម រង្ស៊ី

11, Dec 2015 , 12:41 pm

រូបភាព

ដោយ: ថ្មីៗ

ព្រះអង្គម្ចាស់ នរោត្តម រណឫទ្ធិ ប្រធានគណបក្សហ៊្វុនស៊ិនប៉ិច បានអះអាងថាព្រះអង្គនឹងស្ម័គ្រព្រះទ័យ ដើរតួជាមេអណ្តើកដើម្បីផ្សះផ្សាលោក ហ៊ុន សែន និងលោក សម រង្ស៊ី។ តែប្រសិនបើគ្មានការស្នើសុំនោះទេ ព្រះអង្គដាច់ខាតមិនលូកដៃចូលក្នុងបញ្ហារបស់គណបក្សទាំងពីរនេះឡើយ។

ប្រធានគណបក្សហ៊្វុនស៊ិនប៉ិច ព្រះអង្គម្ចាស់ នរោត្តម រណឫទ្ធិ នៅតែបង្ហើបថា ព្រះអង្គសុខចិត្តធ្វើជាមេអណ្តើក ក្នុងការសម្រុះសម្រួលលោក ហ៊ុន សែន និងលោក សម រង្ស៊ី ឲ្យសាមគ្គីគ្នាឡើយវិញ បើប្រមុខបក្សទាំងពីរនេះ មកពឹងពាក់ព្រះអង្គ។

ប្រមុខបក្សរាជានិយមអង្គនេះបានបញ្ជាក់ដូច្នេះថា៖ «ប្រសិនបើសម្តេចហ៊ុន សែន និងឯកឧត្តម សម រង្ស៊ី លោកឲ្យខ្ញុំធ្វើជាមេអណ្តើក ខ្ញុំក៏ធ្វើជាមេអណ្តើតជូនដែរ។ ខ្ញុំនិយាយហើយនិយាយទៀត និយាយដដែលៗ ថា បើចង់ដោះស្រាយបញ្ហាជាតិ លុះត្រាតែខ្មែរទាំងអស់គ្នាចេះរួបរួមគ្នាជាមុនសិន»។

តែយ៉ាងណាព្រះអង្គម្ចាស់ នរោត្តម រណឫទ្ធិ បញ្ជាក់ថា កន្លងមក ព្រះអង្គមិនយកព្រះកាយទៅបៀត ឬពាក់ព័ន្ធនឹងបញ្ហារបស់លោក ហ៊ុន សែន ប្រធានបក្សកាន់អំណាច និងលោក សម រង្ស៊ី ប្រធានបក្សប្រឆាំង នោះទេ។ ព្រះអង្គបានបន្ថែមទៀតថា រឿងអ្វីក៏ដោយ ក៏ព្រះអង្គមិនប៉ះពាល់ជាដាច់ខាត សូម្បីតែវប្បធម៌សន្ទនា ក៏ព្រះអង្គមិនលូកដៃលូកជើងចូលដែរ។ ការថ្លែងដូច្នេះ ធ្វើឡើងក្នុងពិធីសំណេះសំណាលជាមួយតំណាងយុវជន និងតំណាងចលនាអ្នករាជានិយម ប្រមាណជាង៣០០នាក់ នៅទូទាំង២៥រាជធានីខេត្ត ដែលប្រព្រឹត្តទៅនៅសណ្ឋាគារភ្នំពេញ កាលពីព្រឹកថ្ងៃទី១១ ខែធ្នូ នេះ។