ជាតិ
សង្គមជាតិ
វេទិកាយុវជន FORUM ONE ស្ដីអំពី«នយោបាយសម័យបច្ចេកវិទ្យា»
×
ភ្នំពេញ៖ បណ្ដាញព័ត៌មានសង្គម បានរីកលូតលាស់ខ្លាំងនៅកម្ពុជាចាប់តាំងពីឆ្នាំ២០១៣ក្នុងស្រទាប់បណ្ដាយុវជន និងបញ្ញវន្ត និងសាធារណជនដែលមានលទ្ធភាពប្រើប្រាស់ប្រព័ន្ធបច្ចេកវិទ្យា។ បណ្ដាញសង្គមទាំងនេះបានដើរតួយ៉ាងសំខាន់ក្នុងទំនាក់ទំនងសង្គម ពាណិជ្ជកម្ម ការតស៊ូមតិ ការពារសិទ្ធិមនុស្ស ការអប់រំ តាមដានស្ថានភាពសង្គម កិច្ចការសាធារណៈ សង្គ្រាមពាក្យសម្ដី និងឧបករណ៍នយោបាយជាដើម។
នៅថ្ងៃអាទិត្យ ទី២០ ខែធ្នូ ឆ្នាំ២០១៥ អង្គការសភាយុវជនខ្មែរ នឹងរៀបចំកម្មវិធីវេទិការយុវជនFORUM ONE ដែលនឹងប្រព្រឹត្តទៅនៅសាកលវិទ្យាល័យ ហ្សាម៉ាន់(Zaman University )។ វេទិកានេះ គឺជាវេទិការពិភាក្សាគ្នាមួយក្នុងស្រទាប់យុវជន ដើម្បីធ្វើការវាយតម្លៃជាទូទៅអំពីផលវិជ្ជមាន និង ផលអវិជ្ជមាន នៃបណ្តាញព័ត៌មានសង្គមចាប់តាំង ពីឆ្នាំ២០១៣ មក។
ម្យ៉ាងវិញទៀតវេទិកានេះ នឹងពិភាក្សាដើម្បីរកដំណោះស្រាយផ្លូវគំនិត ឬគោលនយោបាយ ដើម្បីឲ្យយុវជនខ្មែរ ចេះប្រើប្រាស់នូវបណ្តាញព័ត៌មានសង្គម Facebook និង Twitter ឲ្យចំគោលដៅ និងមានប្រសិទ្ធភាព ក្នុងការតស៊ូមតិ ការពារសិទ្ធិមនុស្ស ធ្វើនយោបាយ និងសម្រាប់ការអភិវឌ្ឍជាតិជាវិជ្ជមានទៅថ្ងៃអនាគត។ ជាពិសេសការប្រើប្រាស់បណ្ដាញសង្គមទាំងនេះ គឺមានឥទ្ធិពលយ៉ាងខ្លាំងចំពោះ ការបោះឆ្នោតនាអាណត្តិទី៦ ឆ្នាំ២០១៨ខាងមុខនេះ។ នេះបើយោងទៅតាមសេចក្ដីប្រកាស់លើបណ្ដាញសង្គមហ្វេសប៊ុករបស់អង្គការសភាយុវជនខ្មែរ។
នៅក្នុងវេទិការយុវជនFORUM ONE ស្ដីអំពី«នយោបាយសម័យបច្ចេកវិទ្យា» មានការចូលរួមពីវាគ្មិន និងប្រធានបទសំខាន់ៗដូចជា៖
- ឧបករណ៍ឃោសនាមហាជន : វាគ្មិន លោក ឈាង វុន (TBC) ជាតំណាងរាស្ត្រ និងប្រធានគណៈកម្មការទី៥ នៃរដ្ឋសភាជាតិ
- ឧបករណ៍ប្រជាធិបតេយ្យ : វាគ្មិន លោក យ៉ែម បុញ្ញឬទ្ធិ (TBC) ជាតំណាងរាស្ត្រ និងប្រធានគណៈកម្មការទី៧ នៃរដ្ឋសភាជាតិ
- ឧបករណ៍សិទ្ធិមនុស្ស : វាគ្មិន លោកស្រី ចក់ សុភាព (TBC) ប្រធានមជ្ឈមណ្ឌល CCHR
- ឧបករណ៍បោះឆ្នោត : វាគ្មិន លោក គល់ បញ្ញា (TBC) នាយក Comfrel
-ឧបករណ៍តប្រឆាំងអំពើពុករលួយ : វាគ្មិន លោក ព្រាប កុល (TBC) នាយក TI-Cambodia
គួររម្លឹកថា វេទិកាយុវជន FORUM ONE ស្ដីអំពី«នយោបាយសម័យបច្ចេកវិទ្យា»នេះនិងកំណត់យកអ្នកចូលរួមចំនួន១៥០នាក់។ សាធារណជនចង់ចូលរួមអាចទៅ Register យកសំបុត្រនៅក្នុង
http://www.eventbrite.com/e/forum-one-tickets-19836154472។ ហើយវេទិកាយុវជន FORUM ONE: The Center of Dialogue for Young Liberal and Democrat ជាកម្មវិធីថ្មីមួយរបស់ អង្គការសភាយុវជនខ្មែរ ដែលនឹងរៀបចំឲ្យមានវេទិកាយុជនជាច្រើនជាបន្តបន្ទាប់ទាំងថ្នាក់ជាតិ និងថ្នាក់តំបន់ ដើម្បីជួបជុំ ពិភាក្សា រកដំណោះស្រាយ លើបញ្ហាប្រឈមសំខាន់ៗ របស់យុវជន៕
© រក្សាសិទ្ធិដោយ thmeythmey.com