ដល់ពេលខ្មែរត្រូវបង្កើតមោទនភាពសម្រាប់វប្បធម៌ចម្រៀងខ្មែរ ដោយឈប់ចម្លងពីបរទេស!

ជាតិ

បទវិភាគ

សង្គមជាតិ

ដល់ពេលខ្មែរត្រូវបង្កើតមោទនភាពសម្រាប់វប្បធម៌ចម្រៀងខ្មែរ ដោយឈប់ចម្លងពីបរទេស!

15, Dec 2015 , 3:50 pm

រូបភាព

ដោយ: ថ្មីៗ

ជាញឹកញាប់ផលិតកម្មក្រៅប្រទេស តែងបរិហារធ្ងន់ៗអ្នកចម្រៀងឬផលិតកម្មខ្មែរថា ពូកែតែខាងលួចពីគេ គ្មានគំនិតបង្កើតខ្លួនឯង ហើយជួនកាលផលិតកម្មបរទេសទាំងនោះ ព្រមានប្តឹងទារសំណងជំងឺចិត្តទៀតផង។ ដូច្នេះរឿងអាម៉ាស់ទាំងអស់នេះ ល្មមដល់ពេលដែល តារាចម្រៀង ឬផលិតកម្មចម្រៀងស្រុកខ្មែរឈប់ធ្វើតទៀត ដោយងាកមកបង្កើនស្មារតីជាតិនិយម និងបង្កើតស្នាដៃដោយខ្លួនឯងវិញម្តង។

វាល្មមដល់ពេលហើយដែលតារាចម្រៀង ឬម្ចាស់ផលិតកម្មចម្រៀងស្រុកខ្មែរ ត្រូវមានស្មារតីជាតិនិយម ហើយឈប់លួចចម្លងបទចម្រៀងពីបរទេសបន្តទៀត។ កន្លងមកនេះក្នុងវិស័យចម្រៀងនេះ កិត្តិយសរបស់កម្ពុជា រងភាពអាម៉ាស់ ដោយសារតែតារាចម្រៀង និងផលិតកម្មខ្មែរ លួចចម្លងបទចម្រៀងបរទេសមកច្រៀង ឬផលិតបន្ត។ ផលិតកម្មបរទេសដែលបរិហារអ្នកចម្រៀង និងផលិតកម្មខ្មែរកន្លងមក មានដូចជា ថៃ វៀតណាម និងកូរ៉េខាងត្បូង ជាដើម។

ក្នុងចំណោមភាពអាម៉ាស់ជាច្រើន មានភាពអាម៉ាស់ធ្ងន់ធ្ងរចំនួន ៤ យ៉ាង ដែលកើតចេញមកពីការលួចចម្លងចម្រៀងពីបរទេសនេះ ទី ១ បាត់បង់មោទនភាពជាតិ ពោលគឺមិនមែនត្រឹមតែខូចកិត្តិយសរបស់តារាចម្រៀង និងផលិតកម្មផ្ទាល់ដែលលួចចម្លងពីបរទេសនោះទេ តែវាក៏ធ្វើប៉ះពាល់ដែរដល់មុខមាត់ប្រជាជនខ្មែរទាំងមូល។ ហើយពាក្យថា មោទនភាពភាពជាតិខ្មែរក្នុងវិស័យចម្រៀងនេះ នឹងត្រូវហិនហោច។ ទី ២ តារាចម្រៀង ឬផលិតកម្មចម្រៀងខ្មែរ អាចត្រូវគេហៅថា ជា«ចោរ» ពីព្រោះតែលួចម្លងពីគេ ដែលធ្វើឲ្យវប្បធម៌ចម្រៀងខ្មែរចុះខ្សោយ។ ទី ៣ អ្នកចម្រៀង ឬផលិតកម្មចម្រៀងបច្ចុប្បន្ន គ្មានស្នាដៃអ្វីថ្មីដែលជារបស់ខ្លួន សម្រាប់បន្សល់ទុកឲ្យកូនចៅជំនាន់ក្រោយ។ ហើយទី ៤ ធ្វើឲ្យបរទេសមើលងាយកម្ពុជា។

ដូច្នេះនៅពោះមុខភាពអាម៉ាស់ទាំងនេះ តារាចម្រៀង ម្ចាស់ផលិតកម្មចម្រៀងខ្មែរទាំងអស់ ត្រូវតែបញ្ឈប់សកម្មភាពលួចចម្លងចម្រៀងពីបរទេសឲ្យបាន ហើយងាកមកបង្កើតស្នាដៃដោយខ្លួនឯង។ ស្នាដៃខ្លួនឯងជារបស់ខ្មែរ គឺមោទនភាពជាតិខ្មែរ។ ស្មារតីជាតិនិយម មនសិការជាតិ ឧត្តមគតិ និងសតិសម្បជញ្ញៈជាជនជាតិខ្មែរ ត្រូវតែមាននៅក្នុងបេះដូងតារាចម្រៀង និងម្ចាស់ផលិតកម្មចម្រៀងខ្មែរ ទើបអាចលើកស្ទួយវប្បធម៌ចម្រៀងខ្មែរបាន។

ជាការពិតការផលិតខ្លួនឯង វាពិតជាមានការលំបាក និងត្រូវការធនធានមនុស្ស ព្រមទាំងចំណាយដើមទុន និងពេលវេលាច្រើន ហើយពេលខ្លះមិនទទួលបានការគាំទ្រច្រើនពីសំណាក់អ្នកស្តាប់ទៀត។ តែមិនអាចយកលេសនេះ ហើយលួចចម្លងពីបរទេសនោះឡើយ។ ទន្ទឹមនឹងនេះ ប្រជាជនខ្មែរ ជាពិសេសគឺយុវជន ក៏ត្រូវមានស្មារតីជាតិនិយមដែរ ពោលគឺត្រូវប្រកាន់ជំហរឈប់គាំទ្រ ឈប់ស្តាប់ បទចម្រៀងដែលតារាចម្រៀង ឬផលិតកម្មចម្រៀងខ្មែរដែលលួចពីបរទេស។ តែផ្ទុយទៅវិញ យុវវ័យត្រូវនាំគ្នាលើកស្ទួយ គាំទ្រ តារាចម្រៀង ឬផលិតកម្មចម្រៀងខ្មែរ ដែលផលិតដោយខ្លួនឯង ដោយមិនចម្លងពីបរទេស។ សូមចាំថា ប្រសិនបើស្អប់ខ្ពើមការលួចចម្លងពីបរទេស ខ្មែរត្រូវគាំទ្រស្នាដៃរបស់ខ្មែរ៕