ជាតិ
នយោបាយជាតិ
រដ្ឋសភាអនុម័តច្បាប់ស្ដីពីការបង្កើតមជ្ឈមណ្ឌលជីវៈចម្រុះអាស៊ាន លោក សាយ សំអាល់ រដ្ឋមន្ត្រីក្រសួងបរិស្ថាន
×
រដ្ឋសភាអនុម័តផ្ដល់សច្ចាប័នលើច្បាប់ស្ដីពីការបង្កើតមជ្ឈមណ្ឌលជីវៈចម្រុះអាស៊ាន ដោយសំឡេងគាំទ្រជាឯកច្ឆ័ន ១០១ សំឡេង ខណៈដែលបណ្ដាប្រទេសជាសមាជិកអាស៊ានចំនួន៨ហើយ ដែលបានផ្ដល់សច្ចាប័នលើកិច្ចព្រមព្រៀងនេះ។
លោក សាយ សំអាល់ រដ្ឋមន្ត្រីក្រសួងបរិស្ថាន បានលើកឡើងនៅក្នុងកិច្ចប្រជុំសភាកាលពីថ្ងៃម្សិលមិញថា ការផ្ដល់សច្ចាប័នរបស់កម្ពុជា ជាការរួមចំណែកយ៉ាងសំខាន់ ដើម្បីធានាបាននូវនិរន្តរភាពនៃ មជ្ឈមណ្ឌលជីវៈចម្រុះអាស៊ាន (ACB) សម្រាប់អនុវត្តការងារថ្នាក់តំបន់ និងកិច្ចសហប្រតិបត្តិការរវាងស្ថាប័នអាស៊ាន សំដៅធានាបាននូវប្រសិទ្ធភាពនៃការគ្រប់គ្រងធនធានជីវៈចម្រុះ និងការរៀបចំយុទ្ធសាស្ត្រគ្រប់គ្រងបរិស្ថាន និងធនធានធម្មជាតិប្រកបដោយនិរន្តរភាព។
លោក សាយ សំអាល់ បន្ថែមថា ក្រសួងបរិស្ថានបានជួបពិភាក្សា និងពិគ្រោះយោបល់ជាមួយក្រសួងពាក់ព័ន្ធ ដើម្បីពិនិត្យទៅលើលទ្ធភាពនៃការបង់វិភាគទាន និងនិតិវិធីផ្ដល់សច្ចាប័នរបស់កម្ពុជា ។ លោកថា ការចុះសច្ចាប័ននេះ កម្ពុជាត្រូវបង់វិភាគទានចំនួន៥ម៉ឺនដុល្លារ ដើម្បីយកទៅរក្សាទុកនៅក្នុងធនាគារ ជាមួយមូលនិធិទាយជ្ជទាន សម្រាប់ដំណើការមជ្ឈមមណ្ឌលជីវៈចម្រុះអាស៊ាន ។
រហូតមកដល់បច្ចុប្បន្ននេះ បណ្ដាប្រទេសជាសមាជិកអាស៊ានចំនួន៨ហើយ បានផ្ដល់សច្ចាប័នលើកិច្ចព្រមព្រៀង ស្ដីពីការបង្កើតមជ្ឈមណ្ឌលជីវៈចម្រុះអាស៊ាននេះ នៅសល់តែប្រទេសពីរប៉ុណ្ណោះ គឺកម្ពុជា និងឥណ្ឌូនេស៊ី ដែលមិនទាន់បានផ្ដល់សច្ចាប័ន។
កន្លងមកមជ្ឈមណ្ឌលជីវៈចម្រុះអាស៊ាន ធ្លាប់បានសម្របសម្រួលការងារជាច្រើនដល់បណ្ដាប្រទេសអាស៊ាន ក៍ដូចជាប្រទេសកម្ពុជាលើផ្នែកអភិរក្សជីវៈចម្រុះ ទាំងបច្ចេកទេស និងថវិកា ក្នុងការអនុវត្តគម្រោងថ្នាក់តំបន់ ការកសាងសមត្ថភាពដល់មន្ត្រីជំនាញ និងការងារមួយចំនួនទៀតទាក់ទងនឹងការគ្រប់គ្រងតំបន់ការពារធម្មជាតិ។
រដ្ឋសភាអនុម័តសេចក្ដីព្រាងច្បាប់ ស្ដីពីការអនុម័តយល់ព្រមលើកិច្ចព្រមព្រៀង ស្ដីពីការបង្កើតមជ្ឍមណ្ឌលជីវៈចម្រុះអាស៊ាន ដោយសំឡេងគាំទ្រជាឯកច្ឆ័ន ១០១ សំឡេង ដោយមានការចូលរួមពីសមាជិកសភាមកពីគណបក្សប្រជាជនកម្ពុជាចំនួន ៦៧រូប និងពីខាងគណបក្សសង្គ្រោះជាតិចំនួន៣៤រូប៕
© រក្សាសិទ្ធិដោយ thmeythmey.com